¹ Boake aia ty nihirifa ty aly naho ty fifandieragne areo? O vao tsy salala boake amareo ty hialy ama ty mpikambagne agnivo areo eo? ² salala'e areo, fa ie tsy anagnagne. Mamono naho magniry nareo, fa ie tsy hahazo. Mialy naho mifandietse . Tsy managne nareo fa tsy mangatake. ³ Mangatake nareo fa ie tsy mahazo satria manao hata-draty, mba hahafaha areo mampiasa ze ho amy ty fagniria areo. ⁴ I nareo ry tsy vokatse! O tsy fanta areo vao te ie filongoagne ama ze kila raha an-tane etoy ro fifankalaignagne mandietse an'Andrianagnahare? A ndra ia ndra ia te ho mpilongo ama ze kila raha tane toy le manao ty tegnae ho fahavalon'Andrianagnahare. ⁵ Mieretseretse vao nareo fa ty Soratse Masigne le magnambara te tsimarem-pototse manao izao: " Natao'e saro-piaro vao ty fagnahy hiaigne amantika"? ⁶ Fa nagnomey ze kilam-pahasoavagne ty Andrianagnahre, le izao ty nataoty ty Soratse Masigne : "Lieren' Andrianagnahare ty mpieboebo, fa nimea'e fitahiagne ze miambane" ⁷ Naho ze magneke an'Andrianagnahare. Tohero ty raty, naho le hisintaha'e nareo. ⁸ Mikokoa an'Andrianagnahare, naho le hikoko anareo Reke. Liovo ty tagna areo, be hakeo, ara liovo ty fo areo, ry roe hevetse. ⁹ Miferegnesa, mandalà, ara le mitagnia. A ze Fikeakea areo le hanjare tagny, ara ze liofo areo le ho habose areo. ¹⁰ Miambanea agnatreha i Andriantompo, naho hampitoatse anareo Reke. ¹¹ Ko mifagnaraty nareo, ry roahalahy. Fa ndaty magnaraty ty roahalahy na mitsara ty roahalahi'e le mandietse naho mitsara ty lily. Naho mitsara ty lily nareo, le tsy magneke ze lily, fa mpitsara. ¹² Raike avao ty mpagnome lily naho le mitsara. Naho Ie raike ro afake mamonje naho manjamagne. Ia iheo , ro hitsara ty ragne'o? ¹³ Le tsanogno, areo ze mirehake te ie: anito na maraigne le hiditse an-tanagne ato tika, hijanogne tao'e raike agne, hanao varotse, ara le hangalake ty ambone'e. ¹⁴ Ia ty mahafantatse ze raha hisy maraigne, ara le ino ty fiaigna areo? Fa iegne mipeake anianiay avao nareo naho le levogne . ¹⁵ Fa ie tokoe hirehake nareo te ie: "Naho zoton' Andriantompo, le ho velogne tika, ara tsy hanao te intike naho indroke". ¹⁶ Fa le hirehereha nareo henaneo ama-pomba mieboebo. Ze kila rehareha raty manahake izay. ¹⁷ Fa hoe ze mahafantatse manao ty soa fa ie tsy manao izay, le ho hakeo hoaze zay.