¹ O Jakoba, mpanompon'Andrianagnahare naho Andriatompo Jesosy Kristy, hoe iareo foko folo roe ambe niparitake: arahabaigne. ² Raeso ho fifaliagne iaby zao, ry rahalahe, naho fa mibabe olagne isankaraza'e nareo. ³ Fanta'iareo fa ty fitsapagne ty finoa'iareo le mahavy ty faharetagne. ⁴ Engao ty faharetagne hahatanterake ty asa'e, mba hivoatse vata'e naho vata'e nareo, le tsy ho sahiragne ndre ino ndre ino. ⁵ Fe ie naho misy ama'areo ty mpiay fahendreagne le engao'areo reke hangatake zay aman'Andrianagnahare, ze raike magnome vokatse ty arofo'e naho tsy mitsikike ze mangatake iaby, le omeagne'aze zay. ⁶ Engao reke hangatake amy ty finoa'e, tsy misalasala ndre amy t'ino ndre amy t'ino. Ze misalasala le manahake o onjan-dranomasigne indes'o rivotse'o naho le mitopatopa. ⁷ Fe ie ze ndaty zay le tsy toko'e handinike ty handray ndre ino ndre ino boak'am'i Tompo. ⁸ Ty ndaty manao hoe zao'o le miroeroe saigne, miovaova amy ty lala'e iaby. ⁹ Ao ze rahalahe mahantra le hanao ty fagnondrotagne mba ho laza'e, ¹⁰ fa ty ndaty mana-kareagne amy ty fiambanea'e, satreia reke le hiezake manahake'o voninkazon'ala agnahetse'y. ¹¹ Fe ie le mibelagne i andro'oy amy ty hafana'e mahamay naho nagnamaike i ahetse'y. Voninkazo'oy le mihintsagne, nahole ho rava ty hasoa'e. Manao hoe izay ka, ty ndaty mpagnefoefo le hangegne amy ty antsasa ty lia'e egne. ¹² Tahie'e ze ndaty miaritse fitsapagne. Satria naho avy nandalo fitsapagne reke, le handrae ty satro-bolonahetse ty fiaignagne, ze nampitamanegne tama'iareo ze tea an'Andrianagnahare. ¹³ Naho misy ho tsohem-pagnahy le ao reke tsy hireheke te hoe: "Andrianagnahare ro mitsoke fagnahy ahy," satria i Andrianagnahare tsy azo ty raty ho tsohem-pagnahy, sady naho le tsy mba mangalake fagnahy ndre ia ndre ia. ¹⁴ Fe ie sambe tsohem-pagnahy amy ty fagniria'e manonkagne ty ndaty kirairaike, ze mampihemotse naho mandresy aze. ¹⁵ Naho avy nibanabanaigne ty fagniriagne, le miterake hakeo zay. Naho fa mitombo vata'e ty hakeo, le miterake havilasy. ¹⁶ Ko magneke ho fitahegne, ry rahalahe mamiko. ¹⁷ Ty fagnomezagne soa iaby naho ty fagnomezagne tsy manan-kandra iaby le boak'ambony agne. Zay le mizotso boak'am'i Rae'o fahazavagne'o. T y miarak'ama'e le tsy misy fiovagne na te olake noho'ty fiolahagne. ¹⁸ Andrianagnahare le nifily ty hagnome ty fisamahagne antika amy ty saontsi'ty fahamaregnagne, mba ho voaloham-bokatsy ze raha iaby namboare'e tika. ¹⁹ Fanta'areo zay, ry rahalahe mamiko: ao ty ndaty iaby halaky hijanjigne tsy ela, tsy hirehake malaky, naho tsy ho tsy ela boseke. ²⁰ Fe ie ty haboseha'o ndaty le tsy hahavita'o ty fahamaregnan'Andrianagnahare. ²¹ Le afaho iaby ze hakeo naho ty ze kila haratiagne. Ampiambaneam-batagne le raeso ty saontsy fa napetrake, ze afake mamonjy ty fagnahi'iareo. ²² Ao nareo ho mapagneke ty saontsy fa tsy ho mpijanjigne avao, ko mamaitake ty vata'areo. ²³ Fa naho misy mpijanjigne ty saontsy nefa tsy miantoke, le manahake ty ndaty mivetsevetse ty tarehe'e nataoan'Andrianagnahare agnaty ty hetsoro reke. ²⁴ Mandineke ty vata'e reke le mandeha naho boak'eo le avy le magnaligno ty momba aze. ²⁵ Fe ie ty ndaty ze mandineke soa ty lily'ty fagnavotagne tsy manan-kandra, naho ze manohy manao izay, fa tsy hoe mpijanjigne avao ze magnaligno, le ho tahiegne amy ty asa'e ze ndaty zay. ²⁶ Fa naho misy mihevetse ty vata'e fa mpivavake, fe ie tsy mamehe ty lela'e, le mamitake ty fo'e reke, le tsy misy vili'e ty fivavaha'e. ²⁷ Ty fivavahagne malio naho tsy misy handra'e eo agnatrehan'Andrianagnahare tika naho ty Raentika le ie zao: hagnampy iareo kamboty naho iareo mpivente ty ai'e amy ty fahoria'iareo, le miaro ty vata'e mba tsy handra'e avy amy ty tane toy.