¹ Manao izay tika le mahay tsy miambeñe vatae ze nireintika, mba tsy hañorike rano bey amizay tika. ² Fa naho mareñe ty hafatse natalilie tamy alala ty anjely, naho ty fandikañe ze hene ty lily naho ty tsy fañorihañe le handrae saze ara-drare e, ³ akore ty hahaiantika milay naho tsy raharahaen-tika ze famonjeam-bey zay? Io ro famonjeañe natalilin' Andriatompo voalohae naho te le nihamafe iareo naharey aze aman-tika. ⁴ Tamy o andro avao le niporofoen' Andrianañahare tamy ty famantarañe, fahagagañe, navaho asa mahery sambe hafa, naho tamy ty fizara iareo fañomeam-pahasoava ty Fañahy Masiñe arake ze zotoe. ⁵ Fe ie tsy boake ty anjely ro nampañorihen' Andrianañahare ze kila raha ho avy, momba ty tsaraentika. ⁶ Fe ie, nisy ndaty nitsangañe ho voavolombeloñe amizay ty tañe, manao izao te: "Ino ty ndaty, ro vetsevetseo? Ndra ty tirin'olombeloñe, ro hotoroñeo? ⁷ Manao ndaty io ho ambane mandako ty anjely niheo; nisatroheo satro-bininahitse tamy ty laza naho ty volonahitse reke. [Fañamareñañe: Ty dikan-drehake taolo le mitovoñe tihoe te: "Naho le Ihe ro nampiambesatse aze ambone ty asa ty fitao."] ⁸ Ze raha iaby le nampañekeo ambane ty fandia eo." Fe ie ho aze ro nampañeken' Andrianañahare ze kila raha. Fe ie henaneo tika le mbe liae naho nahatrea ty raha nampañeke e aze. ⁹ Fa itika mahatrea ty raike natao e ambane mandako iareo anjely tañate ty andro tsy ampe: Jesosy, izay, naho ty fijaleae navaho ty havilasie, le nisanatroke sabaka-bolinahitse tamy ty laza naho ty volonahitse. Tamy ty alala ty fahasoavan' Andrianañahare te anito, ro nañoharae ty fahavilasiañe ho ey ty ndaty toy aby. ¹⁰ Fe ie mete amin' Andrianañahare zay, fa kila raha le misy ho Aze naho le tamy ty alalae, mba hinday anake tsiefa ho amy ty volonahitse añe. Zotoe ty hahavy ty mpitarike famonjeañe hoe iareo feno amy ty alala ty fijaleae. ¹¹ Fa ze ndaty mañamasine navaho iareo ze hamasiñeñe le manañe loharano raike. Manao izay le tsy meñatse ty mitoka iareo ho rahalahy Reke. ¹² Izao ty natao te: "Hañambara ty tahinao amy iareo rahalahiko Raho, hihira ty momba Azo iaby añate ty fivoriañe ao Raho." ¹³ Naho le, "Hatoky Aze Raho." Naho le: "Ingo, eto Raho navaho iareo anake nomein' Andrianañahare Ahy." ¹⁴ Manao izay, satria nofotse naho lio iareo anak'Andrianañahare, le nizara raha manahake izay nindre amae iareo naho le tama iareo ka ty Jesosy, mba ho amy ty alala ty havilasy ro hamoañae ty hery ty fahavilasiañe, le ry rekoko zay. ¹⁵ Izay le ty mba hahafaha iareo aby manao izay ty tahotse ty havilasy le niaiñe ty fiaiña iareo iaby iareo tamy ty fañandevoañe. ¹⁶ Fe ie mazava fa tsy iareo anjely ro vinonje e; fa , ze tarira i Abrahama. ¹⁷ Manao izay le mañeva Aze ty hatao manahake iareo rahalahy e amy ze fomba iaby, mba ho mpisorombey feno fahatokisañe naho famindrañe arofo Reke amy ty fifankahazoañe amy iareo raha Nañahare, naho le mba hinday momba famotsoran-kakeo ze ndaty. ¹⁸ Satria Jesosy ro nijale naho nalaem-pañahy, le afake mañampe iareo ze alaem-pañahy Reke.