¹ Hinane zao, ry longoko, manoratse ty taratasy faharoe toy hoanareo raho ho tiaro ndesegne mandrisike ty saigne malio areo, ² hahatiarovagne ty saontsy ty mpitoky masigne te taolo naho ty lily Andriantompo naho mpandrombake antika nimea o aposotoly reo. ³ Fantaro hey, te ty mpanivativa le ho tram-parae. Hanao tsikiky iareo le hanao ze raha tea iareo. ⁴ Hanao tihoeke iareo: "Aia ty nampitamagne amy ty hibaliha'e? Fa hatra ty nivilasia ze razantikagne, tsy trea ty kila raha niova, ndre hatra ty namotsoragne ty tanebey toy. ⁵ Atao iareo tsy fantatse fa ty lanitse naho ty tane le nisy tama ty rano naho nihirike ama ty rano, fotoagne ela, ⁶ amy ty lilin'Agnahare, le ty fisia o raha reo ro, nanjamanagne ze kila raha tan-tany eto tamy fotoagne zay, tamy ty tondra-drano. ⁷ A hinane zao ty lanitse naho ty tane le natokagne ho'e ty afo boake amo lily io avao. Iareo le natokagne handigny ty fitsaragne naho ty fanjamanagne ze raty fagnahy. ⁸ A ao tsy ho haligno areo ry longo, fa ty ndraike andro amy Andriantompo le hoe arivo taoge, le ty arivo taogne hoe indraike andro. ⁹ Tsy ela amy Andriantompo ty mandefe ze nampitamà'e, manahake ty atao ty ho hahela'e. Fie Reke ka, le haharetse ama'areo. Tsy tea ty hahamontso anareo, fa hoavy amy ty fiovan-kavelogne iabike. ¹⁰ Ndre izay, le hoavy hanahake ty dahalo ty andro i Andriantompo: Hanjavogne mindre amam-peo mafe o lanitse eo. Ho mae ty afo ze kila raha, ty tane naho ze asa iabike hambara. [Fagnamaregnagne: Ty fandikagne ilae vakiegne hoe izao: "Ze kila raha le ho mae ty afo, le ty tane naho ze asa amae ao le horoagne abik.") ¹¹ A naho ndra ho hara'e hoe izao aby ze kila raha izao, le ho fagneva ty ndaty manao akore inareo? Fagneva ty ho masigne naho hinday fiaigne mifagnorike amin'Agnahare nareo. ¹² Fa fagneva ty hitamà naho hanao ty hitsielà ty fiavy ty andron'Agnahare nareo. Amo zao andro zao, le ho levon-ty afo o lagnitse eo, le ze kila raha le ho sosore ty fana iabike. ¹³ Naho ty nambara'e, le mandigny ty lagnitse vaovao naho tane vaovao ze hisia ty raha maregne ntika. ¹⁴ A izao ry longo, toe ndra fa mitamà zao raha iabike izao nareo, manoa ze raha soa vatae ama'areo agne, tsy hanagnan-draty tsy hanagnan-tahegne miatreke Aze hiadagne. ¹⁵ Tsy zay avao, fa vetsevetseo ty fiareta i Andriantompo nandrombake antika, manahake ty sinora i rahalahy Paoly longontika ama'areo, amy ty hilala nimeagne aze. ¹⁶ Paoly le magnombara zao raha izao amy ze taratasy iabike sinorae, i misy raha sarotse safiriegne zay. Ndaty tsy maharendre-draha naho tsy miatreke raha ro magnova o zao, ampanahafe'e ty anoa'e ty soratse masigne ilae ka, le izao ty mitarike ty vata'e ama ty tane ty montso. ¹⁷ A ie zao ry longo, fa hai'areo zao raha zao, le ambeno soa ty fagnahi'areo tsy hoazo ty vande ty raty fagnahy hahamontso ty ható areo. ¹⁸ Aonjogno ty hasoa naho ty fahafantaragne i Andriantompontika naho Jesosy Kristy Mpandrombake antika. Ho amae anito ty voninahitse le tsihotampetampetse. Amena!