¹ Simona Petera, mpagnompo naho aposotoly Jesosy Kristy, hoe ze nahazo finoagne fanjaka manahake ty norambese ay, finoagne am-po ty fahamaregnan'Andrianagnaharentika naho Jesosy Kristy mpandrombake. ² Lonike hionjogne ty fitahiantsoa naho ty fiadanagne amy ty fahafohignagne an'Agnahare naho Jesosy Andriantompotsika. ³ Ze kila raha miomba ty herin'Agnahare ho fiagne naho fagnahy le nimeagne antika amy ty fahafohignagne an'Agnahare, nikoike antika ama ty voninahi'e naho ty hasoa'e. ⁴ Amo zao raha iaby zao ro nagnomea'e antika ze raha soa fanjaka vatae vinetsevetse ty foentika intika, le ho raike amy ty fomban'Agnahare nareo, naho afake mienga ty raha ota an-tany eto amy ty fomba raty. ⁵ A izao, manoa soa hagnampeagne soa ty finoa'areo, fa boake amy ty hasoa'areo ty hilala. ⁶ Amy ty hilala'areo, ro hahaiagne minday fiaigne, ty findesagne ty fiaigne ro hahaiagne miaretse, amy ty fahareta'areo, ro hahaiagne minday ty fagnahy. ⁷ Ty findesa'areo ty fagnahiareo, ro hahaia areo mitea rahalahy, amy ty fiteagne rahalahy, ro hahaiagne fitiavagne. ⁸ Naho ama areo ao zao le ho ama'areo ao maro, le tsy ho enga izao tsy hahavokatse amy ty fahafantaragne Jesosy Kristy Andriantompontika inareo. ⁹ Le ndre ia ndra ia tsy managne o raha ao le tsy hahatrea naho tsy ze marine aze fa ho goa. Tsy nitiahi'e iareo ty nagnaliovagne hakeo iareo te taolo. ¹⁰ A ie zao rikiahe, ano'o ze fonga raha hiantoke ty koike naho ty jibogne anareo. Naho manao o raha ao nareo, le tsy ho voatsikambe. ¹¹ Le tsy hagnahiragne anareo ty fizilihagne amy ty fanjakagne tsitampetampetse ey ty Andriantompontika naho Jesosy Kristy mpandrombake. ¹² A izao le magnolobatagne raho hahatiarova areo zao raha iabike zao, ndre te ie fanta areo zao, ndre te ie mahozatse amy ty maregne nareo hinane zao. ¹³ Naho ty amako avao le ataoko te fagnevako naho mamoha anareo avao hahatiahy o raha reo, naho mbe ama ty tragno ho simba toy raho. ¹⁴ Fa toe haiko te tsy ho mbia avao le hoafahako ty tragnoko toy, manahake ty raha naboa Jesosy Kristy Andriantompontika ahy. ¹⁵ Le hanao ze hereko raho hahatiarova'areo ndre mbiambiagne o raha iabike reo naho fa agne ty andenako. ¹⁶ Fa tsy nagnorike talily nisoa tefe finorogne zahay naho nirehake ama'areo ty miomba ty hery naho ty niboaha i Jesosy Kristy Andriantompontika. Fa izahay le vavaolombelogne nagnatre-maso ty fanjaka'e. ¹⁷ Fa Ie le nahazo laza naho voninahitse boake amin'Agnahare Raentika naho fa niavy ze feo Amae eo amy ty hasi'e bey varae tihoeke ey te: "Intoy ty Anako teako, kisoko vatae." ¹⁸ Naharey zao tsara boake an-danitse agne zao zahay, naho fa nindre amae am-bohitse masigne ey. ¹⁹ Intika managne ty saontsy tokiegne fa soa fototse toy. A manoa soa ama izao inareo. Izao le manahake ty jiro mazava am-po ty iegne hatra ty hiavia ty maraigne naho ty kinta ty maraigne mibelagne agnate ty fo'e areo. ²⁰ Fantaro hey te, tsy misy ty tokiegne miboake amy ty raha safirie ty ndaty. ²¹ Fa tsy misy fitokiagne boake ama ty zotom-po ty ndaty. Fa tinary ty Fagnahy Masigne iareo hirehake ze saontsin'Agnahare.