¹ Toa iaby naho ty faritre ty tane ze niraese ty vahoake Israely ho lova iereo tagne amity tane Kanana, tinendre ho ahy iereo tamy Eleazara mpisoro, tamy Josoa ana i Nona, naho tamity mpitari-poko ty longo ty raza iereo niarake amity vahoake Israely. ² Ty lova iereo le voamare tamity loka ho ahy reo sive vaho ty antsasa reo foko, arake ze nandilia Yaveh tamity tana Mosesy. ³ Fa le fa namea Mosesy lova ty amity roe vaho antsasa reo foko tane andafe Jordana, kanefa re tsy nagnomea lova reo Levita. ⁴ Fa laha ty mare le foko roe ty foko i Josefa, le Manase vaho Efraima. Tsy namea anjara lova tane amity tane reo Levita, fa tane amireo tana ilane avao mba hitoboha, amireo tanem-bilo ho ahy ty biby hare vaho reo zaka-famokara iereo. ⁵ Le nanao arake ty nandilia Yaveh i Mosesy ty vahoake Israely, ka tinendre iereo ty tane. ⁶ Le niavy tagne amy Josoa tagne amy Gilgala ty foko Joda. Kaleba ana i Jefona Kenizita, nirehake tamine hoe:" Hainao ze nirehafe Yaveh Mosesy ty lahilahin'Agnahare mikasike ahy vaho riha tagne Kadesi-Barnea. ⁷ Efapolo tao raho laha nalefa i Mosesy mpanompo Yaveh bakagne Kadesi-Barnea mba hisafo ty tane. Tinaoko tamine ndraike ty talily mba hatao arake ty tea ty foko hatao. ⁸ Fa reo rahalahiko ze nindeha niakatre niarake tamiko nampaleme ty arofo ty vahoakene tamity tahotre. Nefa noriheko vatane Yaveh Zagnahareko. ⁹ Nifanta Mosesy tamize andro zay, naho nanao hoe:' Azo antoke fa ty tane ze nindehana ty tombonao le ho lova ho anao vaho ty ananao zisikagne, satria nagnorike vatane Yaveh Zagnahareko riha.' ¹⁰ Naho, ingo! Yaveh nita ahy ho velo zisike ze dime amby efapolo tao zay arake ze nirehafene__tamity andro ze nirehafa Yaveh ze rehake zay tamy Mosesy, zisike ty nindehana Israely tagne agnefetre. Naho ingo! Dime amby valompolo tao raho amizao andro zao. ¹¹ Mboe mafe zisikagne raho amizao andro zao manahake ty tamity andro nandroaha Mosesy ahy. Ty ozako amizao le manahake ty ozako tamizay, tamity aly vaho tamity nindeha vaho nihere. ¹² Ka laha zao ameo ahy ty tane tazoa toy, ze nampagnantegna Yaveh ahy tamize andro zay. Satria reinao tamize andro zay Anakita tagne amireo tana manda bey. Mete hiaro ahy Yaveh mba hahafahako mandroake iereo, arake ty safa Yaveh." ¹³ Bakeo le nitso-drano aze Josoa naho nagnomea i Hebrona ho lova i Kaleba ana i Jefone. ¹⁴ Laha zao le lasa mpandova ty Kaleba anadahy Jefone Kenizita ty Hebrona zisikezao, satria nagnorike Yaveh vatane re, ty Zagnahare Israely. ¹⁵ Naho le Kiriata ro agnara Hebrona taloha. (Arba ro lahilahy bey vatane eo amy Anakita.) Le nijano tamity aly ty tane.