¹ Zao ro safa Yaveh ty hoe:" Ty lagnitre ro sezan-droandriako, naho ty tane ro toeran-tomboko, aia are ty tragno ze haore ho Ahy? Aia ty toera ze hahafahako mitofa? ² Ty tagnako ro nanao reo zaka iaby reo; zay ro nahavy rey zaka reigne hisy-zay ro talily Yaveh. Zao ro ndaty ze ekeko, ze torotoro vaho manegne am-pagnahy, naho ze mihovitre amity rehako. ³ Zay mamono agnombe le mamono ndaty avao kea; ze manao soro ty anak'agnondry le mandily ty vozon'amboa; ze manolotre fagnatetre hohane le manolotre lion-koso; ze manolotre liten-ketae magnitre ho fahatiarova le misaotre ty haratia. Nifily reo lalane iereo, naho nangalake fihisa tamireo haratiane. ⁴ Manahake zay kea ro hifiliako ty fagnaliloa iereo avao; hoenteko eo amiereo ze atahorane, satria laha fa nikaike raho, le tsy nisy namale; laha fa nirehake raho, le tsy nisy na raike aza ka nidranjy. Nanao ze raty teo amasoko iereo, naho nifily ty hanao ze zaka nahameloke Ahy." ⁵ Midranjigna ty safa Yaveh, riha ze mititike amity rehane ty hoe:" Reo rahalahinao ze malay vaho manitake anao noho ty agnarako nirehake ty hoe:' Ao hamean-kasy Yaveh, le hahisake ty hafalea Re,' fa ho megnatre iereo. ⁶ Ty feon'aly mitabataba le bakagne amity tana, feo bakao amity tempoly, ty feo Yaveh mamale reo fahavalone. ⁷ Tamy mboe mihetse-kolo re, le terake; aloha ty fararea ho eo amine, le niterake ajalahy re. ⁸ Ia ro nanoro zaka hoe zay? Ia ro le fa nahisake zaka hoe zay? Feie vao ho terake agnate andro raike ty tane? Afake hiore agnate ty andro raike ty firene? Tamy mboe tsy nihetse-kolo ty Ziona, le fa niterake reo anane. ⁹ Feie vao minday kolo amity havognona ty fiteraha raho ka tsy mamototre ty kolo ho terake?_nagnontane Yaveh. Na ninday kolo amity andro ty fiteraha ka hagnere zay?_magnontane ty Zagnaharenao." ¹⁰ Mifalea miarake amy Jerosalema naho mifalea ho aze, nareo iaby ze tea aze; mifalea miarake amine, nareo iaby ze malahelo aze! ¹¹ Fa hiteza riha naho ho entsake; hampionogne eo amireo nonone riha; fa hino zay amity hafeno vaho soasoa ty hasine bey riha. ¹² Zao ro safa Yaveh:" Hindeha hizara fagnambina magnera aze manahake ty renerano raho, naho ty harea ty firene hanahake ty loharano mitondrake. Hinono amity ilane riha, ho eo antsandrine, naho hahindrahindra eo amireo ongone. ¹³ Manahake ty agnamafea ty rene ty anane, noho agnamafeako anao, naho ho hamafe riha ao Jerosalema." ¹⁴ Hahisake zay riha, le hifale ty arofonao, naho ty taolanao hitsimoke manahake ty aka-maintso. Hampahaie Yaveh reo mpanompone ty tagnane. Fa hanoro ty helone handietre reo fahavalone Re. ¹⁵ Fa ingo, avy miarake amity afo, naho avy manahake ty tafion-tioke reo kalesene mba hinday ty hafana ty helone vaho ty firehafane mafe miarake amireo lelan'afo. ¹⁶ Fa hanao ty fitsara amity ndaty amity alala ty afo vaho ty mesone Re. Ho maro reo ze ho vonoe Yaveh. ¹⁷ Magnamasy ty vatane vaho magnalio ty vatane iereo, ka afake militre ao ambaibo, magnorike ty raike ze eo agnivo mihina nofon-koso vaho reo zaka-ratiraty manahake ty valavo." Ho avy amity fiafara iereo_zay ro talily Yaveh." ¹⁸ Fa haetso reo asane vaho ty hevene. Ho avy ty andro laha fa hamory reo firene vaho reo rehake iaby Raho. Ho avy iereo naho hahisake ty hasiko. ¹⁹ Hametrake famantara mahere eo amiereo Raho. Bakeo le handefa reo sisa tsy mate bakamiereo agne amireo firene Raho: Agne Tarsisy, Pola, naho Lydia, mpandefa folese ze magnenja reo folese, Amy Tobala, Javana, naho reo amoron-tsirake lavitre ze tsy nahareiza iereo Ahy na nahisahane ty hasiko. Hagnombara ty hasiko magnera ty firene iereo. ²⁰ Hagnere rahalahenao iaby niboake reo firene iaby reo iereo, manahake ty raketse ho ahy Yaveh. Ho avy amity sovaly, naho agnate kalese reo, agnate fibata reo, ambone ampondra reo, vaho ambone rameva reo, ho a Jerosalema ambohiko masy agne hoe ty Yaveh. Fa ty vahoake Israely le hinday raketse vare agnate finga malio ho antragno Yaveh ao. ²¹ Ndra ty ilane amy iereo aza le hofilieko ho mpisoro naho Levita-hoe Yaveh. ²² Fa hanahake lagnitse vao reo naho tanen bao ze hanoeko le hitoboke agnoloako eo-izao ro fitalilia gn'Yaveh ka hitoboke fokognao reo, vaho hitoboke ty agnaranao. ²³ Fa amity vola raike ka zisikamity magnarake, vaho ty Sabata raike ka zisikamity magnarake, ho avy hiondreke amiko ndaty iaby reo-hoe ty Yaveh. ²⁴ Hiboake iereo vaho hahisake fate gnodaty reo ze nivory handietse ahy, fa ty soko mihina iereo le tsy ho mate, vaho ty afo handrava iereo le tsy ho mate; vaho hampangory ho ahy ty nofo iaby zay."