¹ "Hehe, laha manarake ty lagnitre Riha ka mizotro! Le hihozongonzo eo agnoloanao ty vohitse, ² manahake ty afo laha fa mirehetre amity borosy hetae, na ty afo mampandeve reno. Hehe, fa ho hay reo fahavalonao ty Agnaranao, fa hihovitre eo agnoloanao ty firene! ³ Taloha, laha nanao zaka-mahagaga ze tsy linignenay Riha, le nizotro riha, naho nihovitre teo amity fiatrehanao ty vohitse. ⁴ Zisikamity taloha le tsy nisy naharey na nahay, na nahisake maso Zagnahare laha tsy Riha, ze manao zaka ho ahy ze miambe Aze. ⁵ Avy magnampe reo ze mifale amity fanoa ty mare Riha, reo ze mahatiaro reo lalanao vaho magnenke rey. Meloke Riha laha nanonta zahay. Avotre tamity lalanao avao zahay. ⁶ Fa lasa manahake reo mololo iaby zahay, naho reo asam-pahamareanay iaby le manhake ty raven-dambam-palim-bola. Malazo manahake ty rave nakata iaby zahay; reo helonay le manahake ty tioke, mindaisa anay lavitre. ⁷ Tsy misy mikaike amity angnaranao, na miezake mba hiarake aminao. Fa nagnaja ty tarehenao taminay Riha naho mandamake anay eo amity tagna reo helonay. ⁸ Nefa, ry Yaveh, Riha ro Raenay; zahay ro tanemanga. Riha ro mpametsevetse anay; naho zahay iaby ro asa ty tagnanao. ⁹ Ko meloke loatre, ry Yaveh, na kea mahatiaro reo hadisoanay handietre anay. Mba mangatake rie henteo zahay iaby, ndatinao. ¹⁰ Lasa tane maike reo tana nao masy; lasa tane maike ty Ziona, maike ty Jerosalema. ¹¹ Ty tempolinay masy vaho soa, ze niantsa ty razanay Anao, le rava ty afo, naho iaby reo ze maminay le niala. ¹² Ino ro mboe hagnenteanao avao, ry Yaveh? Magnino Riha ro mitam-bava naho mboe magnafa-baraka anay zisikagne?"