¹ Noho ty amy Ziona le tsy hitsy raho, naho noho ty amy Jerosalema le tsy hihili-vava raho, mandram-piakara ty hamarea mamirapiratre, naho ty famonjeane hoe ty fanilo mirehetre. ² Hahisake ty hamareanao reo firene, naho ty mpanjaka iaby ty hasinao. Ho kaihe amity agnara vaovao riha ze ho filie Yaveh. ³ Ho satron-kasy ty hasoa eo antagna Yaveh avao kea riha, naho satro ty fanjaka eo antagna ty Zagnaharenao. ⁴ Tsy ho rehafe ty aminao sase ty hoe:" Nafoe"; na ho rehafe amity tanenao sase ty hoe:" Maike." Fa kea, hatao ty hoe:" Ty teako," naho ty tanenao hoe:" Manambaly," satria tea Yaveh riha, naho hanambaly ty tanenao. ⁵ Manahake ty ajalahy manambaly ajampela vatane, ro hanambalia reo ananao anao, naho hoe ty mpampiakatre mifale amity ampiakare, ro hifalea ty Zagnaharenareo aminareo. ⁶ Nametrahako mpiambe teo amireo mandanao, ry Jerosalema; tsy mangike iereo andro aman'ale. Nareo ze mampahatiaro Yaveh, ko mijano. ⁷ Ko enga hitofa Re mandram-pametrahane Jerosalema ndraike vaho mandram-panoane zay ho fiantsa eto antane. ⁸ Nifanta tamity tagnane ankavana vaho tamity sandry ty herene Yaveh ty hoe:" Azo antoke fa tsy hagnomea ty varenareo ho sakafo hoahy reo fahavalonareo sase raho. Reo vahiny le tsy hino ty divay vaovaonareo, ze niasanareo. ⁹ Fa reo mihaza ty vare le hihina zay vaho hiantsa Yaveh, naho reo ze mihaza ty voaloboke le hino ty divay ao amity fitsara ty toerako masy." ¹⁰ Miakara, miakara amity vavahady! Vognono ty lala hoahy ndaty! Amboaro zay, amboaro ty lalam-bey! Avorio reo vato! Manangana say famantara ho ahy reo firene! ¹¹ Ingo, mitalily amity fara ty tane Yaveh ty hoe:" Ambarao amity anakampela Ziona ty hoe: Ingo, avy ty mpagnavotre anareo! Henteo, miarake amine ty soavalene, naho mindeha eo agnoloane ty valen-karokafane." ¹² Hikaike anareo iereo ty hoe:" Ty vahoake masy; ty navota Yaveh," naho riha le hatao ty hoe:" Pinay; tana tsy nafoe."