¹ Ingo, ty tagna Yaveh tsy bory mihintsy ka tsy hahavonje, vaho ty sofine tsy ngingy, la tsy haharey. ² Ty asa ratignareo, kanefa, ro nanarake anareo tamity Zagnaharenareo, vaho ty hadisoagnareo ro nahavy aze haminy ty tarehene aminareo ka tsy hinjajy anareo. ³ Fa lotoe ty lio ty tagnanareo vaho ty rambon tagnanareo lotoe ty hadisoa. Mivola mbade ty vavanao vaho ty lelanareo mivola aman kafetsea. ⁴ Tsy misy mikaike ty mare, vaho tsy misy mifona amity fahitia. Mitoky amity tsara mbade iereo, vaho mivola mbade; vande ro bekobekoene vaho hadisoa ro aterane. ⁵ Mikotreke atolim bibilava feno poizy iereo vaho maneno tragno kala. Ze iaby mihina ty atoline le mate, vaho laha misy atoly voahitsake, le foy ho bibilava feno poizy zay. ⁶ Tsy hae ampisae hatao siky ty tragno kalane, ndra afake manakoke ty vatane ty asane. Asa ty hadisoa ty asane, vaho asa ty hereloha antagnane eo. ⁷ Milay ho amity raty agne ty tombone, vaho milay hampipon dio tsy manan tsiny iereo. Handineke hadisoa ty dinene; hereloha naho handrobaha ro lalane. ⁸ Ty lala ty fiadagna tsy hae gniereo, vaho tsy misy rarene amity lalane eo. Nagnamboatse lala meloke iereo; ze iaby mandeha amy ze lala zay le tsy mahisake fiadagna. ⁹ Naho izay le lavitse anay ty rarene, vaho tsy mahatratse anay ty fahitia. Miambe hazava zahay, nefa mahisake ieke; mila famirapirata zahay, kanefa mandeha amity ieke. ¹⁰ Mitsapatsapa rindry manahake ty goa zahay, manahake reo ze tsy mahisake. Voafinga amity antoandro Nagnahare zahay manahake ty hoe amity takariva; amy reo mafe le manahake ty ndaty mate zahay. ¹¹ Mitrero manahake ty bera zahay vaho minderendere manahake ty voromahilala; miambe rarene zahay, feie tsy misy; miambe fagnavota, feie lavitse anay zay. ¹² Fa agnoloanao eo ty helognay, vaho ty hadisoanay ro magnasara anay; fa ty helonay le miarake aminay, vaho haenay ty hadisoanay. ¹³ Nivory zahay, nandietse ani Yaveh vaho niala tamity fagnoriha ty Zagnaharenay. Nivola fampijalea zahay vaho nivio lala, namoro Toreo baka ampognay ao naho volam bade. ¹⁴ Nafahe ty rarene, vaho mitsanga lavitse le vatane lavitse ty fahitia; fa mitonta agnivon tane egne ty fahitia, vaho tsy ho avy ty mare. ¹⁵ Fa lako lavitse ty sahazan pitokia, vaho iaze raike ze miala amity raty ro mahavy ty vatane ho tra doza. Hisa gn'Yaveh zay vaho tsy fale re fa tsy misy ty rarene. ¹⁶ Nahisake re fa tsy misy ndaty, vaho vere fa tsy mba militse ao. Naho izay le ty vatane avao ro ninday famonjea ho aze, vaho ty fahitia ro nanoha aze. ¹⁷ Misiky fahitia ho saron tratra re vaho sarondoha famonjea amity lohane eo. Nisiky siky valefate re vaho nanao ty zotom po ho aron akanjo. ¹⁸ Vinalene naho ze vitane iereo, le fitsara feno siake amity rafene, famalea ho ahy ty rafene, vaho fagnafaiza ho valen pitea reo. ¹⁹ Kea le hatahotse ty agnara Yaveh baka ahandrefa iereo, vaho ty hasine bakamity fiboaha ty masoandro; fa ho avy manahake ty riake mamaoke re, ze indese ty fofognay Yaveh. ²⁰ "Misy mpagnavotse avy a Ziona ao vaho amy reo ze miala amity asane feno vorivory amy Jakoba-izay ro fitalilia Yaveh. ²¹ Laha ty amiko, le izao ro fagnekeako amy gniereo-hoe Yaveh-ty fagnahiko ze amy gniereo ao, vaho ty tsarako ze natoboke tambavanao eo, le tsy hiala amity vavanao, na hiala amity vava anagnao reo, na hiala amity vava zafenao reo-hoe Yaveh-manomboke izao ka ho zisikagne."