¹ Naho le navory Davida niarake ndraike ty lahilahy Israely voafily iaby, telo ale. ² Nindeha ty Davida naho nindeha niakatre tamireo lahilahine iaby ze niarake tamine nanomboke tagne Bala agne Joda mba hinday ty tomabilen'Agnahare, ze kaihe amity agnara ty hoe Yaveh tompo ty maro, ze mitoboke ampiambonea eo ambone ty kerobima bakagne. ³ Natobo iereo teo ambone kalese vaovao ty tomabilen'Agnahare. Nakare iereo tao amity tragno Abinadaba, ze teo amity tazoa raike zay. Oza vaho Ahio, anadahine, ro nitari-dala ty kalese vaovao. ⁴ Nakare iereo tao antragno Abinadaba teo amity tazoa ty kalese vaho ty tomabilen'Agnahare teo ambonene. Ahio ro nindeha teo agnoloa ty tomabile. ⁵ Bakeo Davida vaho ty foko Israely iaby nanomboke nitsinjake teo agnoloa Yaveh, nandaza tamity zaka-magneno vita tamity hetae, lokanga, valiha, ampongatampake, korintsa naho kipantso. ⁶ Laha fa niavy teo amity famoloa Nakona iereo, le nitonta ty agnombe, naho Oza namototre ty tagnane mba hitarike ty tomabilen'Agnahare, ka nita zay re. ⁷ Le nirehetre tamy Oza ty helo Yaveh. Nagnisy aze teo noho ty hadisoane ty Zagnahare. Mate teo agnila ty tomabilen'Agnahare ty Oza. ⁸ Meloke ty Davida satria nagnisy Oza ty Yaveh, naho le nataone hoe Perez-oza ty agnara ze toera zay. Ze toera zay le atao ty hoe Perez-oza zisikandroany. ⁹ Natahotre Yaveh ty Davida tamize andro zay. Hoe re ty hoe:" Ino ro hahavy ty tomabile Yaveh amiko atoy?" ¹⁰ Ka tsy nagniry ty hinday ty tomabilen'Agnahare niarake tamine ho ao amity tana Davida re. Fa kea, nahajane tao antragno Obede-edoma ty Gitita zay. ¹¹ Nijano tao antragno Obed-edoma ty Gitita zisike ty telo vola ty tomabile Yaveh. Laha zao le tinahy Yaveh re vaho ty fokone iaby. ¹² Naho nirehafene tamy Davida Mpanjaka hoe:" Le fa nitahy ty tragno Obed-edoma vaho ty zaka iaby ze aze ty Yaveh noho ty tomabilen'Agnahare." Laha zao le nindeha ty Davida naho ninday ty tomabilen'Agnahare niakatre bakao antragno Obed-edoma tamim-pifalea ho agne amity tana Davida. ¹³ Laha fa namindra ignene iereo ze ninday ty tomabilen'Agnahare, le nanao soro agnombe raike vaho anakagnombe mifehe re. ¹⁴ Nandihy teo agnoloa Yaveh tamity herene iaby ty Davida; efoda rongone foty malineke avao ro nanovane. ¹⁵ Laha zao le niente Davida vaho ty foko Israely iaby niakatre niarake tamity korake vaho ty feon'anjomara ty tomabile Yaveh. ¹⁶ Naho laha fa niavy tao antana Davida ty tomabile Yaveh, le nijilo teo andafonete ty Mikala, anakampela Saoly. Nahisake i Davida Mpanjaka nitseka vaho nandihy teo agnoloa Yaveh re. Bakeo le nanao tsinontsino aze tao ampone re. ¹⁷ Nampilire iereo ty tomabile Yaveh naho natobone teo amity toerane zay, teo agnivo ty tragno ze la fa namboare Davida ho ahy Zay. Bakeo Davida nanolotre fagnatetre oroa vaho fagnate-pilongoa teo agnoloa Yaveh. ¹⁸ Laha fa vita Davida ty fagnatetre oroa vaho ty fagnate-pilongoa, le nitso-drano ty vahoake tamity agnara Yaveh tompo ty maro re. ¹⁹ Ka le nizara mofo, teten-kena, naho mofomamy misy voaloboke tamity vahoake iaby, ty Israely iaby, tamity lahilahy vaho ty ampela re. Le lasa ty ndaty iaby; sambe nihere tagne antragnone iaby. ²⁰ Le nihere mba hitso-drano ty fokone ty Davida. Mikala, ty anakampela Saoly, le niakatre mba hanalaka i Davida naho nanao ty hoe:" Hehe ty hasy ty mpanjaka Israely amizao, ze nagnary ty lambane teo amaso reo ndevo vave agnate reo mpirehake raty ty lany hegnatre magnary ty lambane!" ²¹ Davida namale Mikala hoe:" Nataoko teo agnoloa Yaveh zay, ze nifily ahy ho ambone ty raenao vaho ho ambone ty fokone iaby, ze nanendre ahy ho mpitarike eo amity vahoake Yaveh, eo amy Israely. Eo agnoloa Yaveh ro hifaleako! ²² Mboe tsy ho meten-kaja naho zay aza raho, naho ho afa-baraka eo amasoko avao raho. Kanefa amity alala reo ndevo vave ze nirehafenao reo, ro hagnomean-kasy ahy." ²³ Laha zao ty Mikala, anakampela Saoly, le tsy nanagnanake zisikamity andro nifatezane.