¹ Le nirehetre tamy Israely ndraike ty helo Yaveh, ka nataone nandietre iereo ty Davida nanao ty hoe:" Mindehana, isaho reo Israely vaho Joda." ² Nirehake tamy Joaba mpifehe ty tafike, ze niarake tamine ty mpanjaka ty hoe:" Mindehana magnera ty foko Israely iaby, manomboke agne Dana ka zisikagne Beri-sheba, naho isaho ty ndaty iaby, mba hahaiako ty fiharoa ty isa reo lahilahy sahaza ho amity aly." ³ Hoe ty Joaba tamity mpanjaka hoe:" Afake manombo ty isa ty vahoake injato vao Yaveh Zagnaharenao, naho afake manente ty atao zay vao ty maso ty mpanjaka tompoko. Nefa nagnino ro magniry zay ty mpanjaka tompoko?" ⁴ Na le zay aza, ty reha ty mpanjaka le nandietre Joaba vaho nandietre reo mpifehe ty tafike ty farane. Ka niakatre teo amity fiatrehane ty mpanjaka ty Joaba vaho reo mpifehe mba hagnisake ty vahoake Israely. ⁵ Nitsake i Jordana naho nitobe tao agnila Aroera, antimo ty tana agne ambaibo iereo. Le nimbaeo zisikagne Gada ka hatragne Jazera iereo. ⁶ Niavy tagne Gileada vaho tagne amity tane Tatima-hodsy iereo, bakeo le tagne Danajana naho nagnodidy zisikagne Sidona. ⁷ Niavy tagne amity fiaro mafe Tyro vaho ty tana ty Hivita vaho ty Kananita iaby iereo. Bakeo le nindeha nimbaeo Negeva agne Joda ao Beri-sheba iereo. ⁸ Ka laha fa baka nitete tane iaby iereo, le nihere tagne Jerosalema iereo tamity fara ty sive vola vaho roapolo andro. ⁹ Le nitao ty fiharoa ty isa reo lahilahy mpialy tagne amity mpanjaka ty Joaba. Nisy lahilahy bey herem-po 800.000 ze nagnafake meso tao amy Israely, naho reo lahilahy Joda le lahilahy 500.000. ¹⁰ Le nampijale aze ty arofo Davida laha fa baka nagnisake reo lahilahy re. Ka nirehake tamy Yaveh re ty hoe:" Nanonta vatane tamity hanoa zay raho. Amizao, ry Yaveh, afaho ty helo ty mpanomponao, fa le fa nanao hagegea vatane raho." ¹¹ Laha fa nifoha Davida ty maray, le niavy tamy Gada mpaminane, mpahisake Davida ty safa Yaveh, nanao ty hoe: ¹² "Ndeha ambarao amy Davida ty hoe:' Zao ro safa Yaveh:" Magnomea safidy telo anao Raho. Ka mifilia raike amireo.""' ¹³ Le nimbaeo amy Davida ty Gada ka nanao tamine hoe:" Mosare telo tao vao ro ho avy aminao ao amity tanenao? Sa hilay telo vola reo fahavalonao vao riha laha magnia anao iereo? Sa hisy arete-mandany telo andro ao amity tanenao? Amizao manampaha hevetre ty amize valene tokone havaleko Aze ty nagnirake ahy." ¹⁴ Le hoe Davida tamy Gada ty hoe:" Ao agnate koronta vatane raho. Ao tika ho lavo eo antagna Yaveh hoe zay eo antagna ty ndaty, satria vatane foloay ty fandeferane." ¹⁵ Ka nandefa ty arete-mandany teo amy Israely nanomboke ty maray ka zisikamity andro voatondro Yaveh, naho ndaty fito ale ro mate nanomboke tao Dana ka zisikagne Beri-sheba. ¹⁶ Laha fa namototre ty tagnane nimbaeo Jerosalema mba hamoteke zay ty anjele, le niova hevetre noho ty raty ze hakare zay Yaveh, ka nirehake tamity anjele ze namoteke ty ndaty Re hoe:" Ampe zay! Ahemoro ty tagnanao amizao." Tamio andro o ty anjele Yaveh le nitsanga teo ampamoloa Araona Jebosita. ¹⁷ Le nirehake tamy Yaveh ty Davida laha fa nahisake ty anjele ze nagnisy ty vahoake, naho nanao ty hoe:" Le fa nanonta raho, naho raty etam-bata. Nefa reo agnondry reo, ino ro nataone?" Ao rie mba zaho vaho ty fokon-draeko ro ho sazie ty tagnanao!" ¹⁸ Bakeo le niavy teo amy Davida tamio andro o ty Gada naho nirehake tamine ty hoe:" Mindeha naho magnamboara alitara ho ahy Yaveh eo ampamoloa Araona ty Jebosita." ¹⁹ Le nindeha arake ze nandilia Gada aze hatao Davida, arake ze nandilia Yaveh. ²⁰ Nanente tagne ambaly Araona naho nahisake ty mpanjaka vaho reo mpanompone namonje. Le niakatre ty Araona naho nagnohoke ty tarehene teo amity tane teo amity mpanjaka. ²¹ Le hoe ty Araona hoe:" Nagnino ro avy amiko eto, mpanompone, ty mpanjaka tompoko?" Namale ty Davida hoe:" Hivily ty famoloa, mba hahafahako magnamboatre alitara ho ahy Yaveh, mba hiala ty arete-mandany eo amity vahoake." ²² Hoe ty Araona tamy Davida ty hoe:" Anovo hoe ty anao zay, ry mpanjaka tompoko. Anovo amizay ze soa eo amasonao. Ingo, toa misy agnombe atao fagnatetre oroa vaho famofoham-bare naho jokan'agnombe atao hetae. ²³ Reo iaby reo, ry mpanjakako, zaho, Araona, le hagnomea anao zay." Le hoe re tamity mpanjaka ty hoe:" Hagnenke anao anie Yaveh Zagnaharenao." ²⁴ Hoe ty mpanjaka tamy Araona ty hoe:" Aha, hovilieko amity viline zay. Tsy hanolotre fagnatetre oroa ho ahy Yaveh amity zaka ze tsy nasaeko raho." Ka vinily Davida sekele volafoty dimampolo ty famoloa vaho reo agnombe. ²⁵ Nagnamboatre alitara ho ahy Yaveh tao ty Davida naho nanolotre fagnatetre oroa vaho fagnate-pilonoga teo amizay. Le nangatake tamy Yaveh ho ahy ty tane iereo, ka nampijano ty arete- mandany nagnera ty Israely Re.