¹ Bakeo ty foko Israely iaby nimbaeo amy Davida tagne Hebrona naho nanao ty hoe:" Ingo, nofotse vaho taolanao zahay. ² Mbe tsy mbia avao, te nanjaka teo amintika ty Saoly, le riha ro nitarike ty tafike Israelita. Yaveh nanao taminao ty hoe:' Hiambe Israely vahoakenao riha, naho ho lasa mpandily eo am'Israely."' ³ Ka niavy tagne amity mpanjaka tagne Hebrona reo olobey Israely iaby, naho Davida Mpanjaka nanao fagnenkea tamiereo teo agnoloa Yaveh. ⁴ Nagnosotre i Davida ho mpanjaka teo amy Israely iereo. Telopolo tao Davida ro nanomboke nanjaka, naho nanjaka zisike ty efapolo tao re. ⁵ Tagne Hebrona le nanjaka teo amy Joda zisike ty fito tao vaho enem-bola re, naho tagne Jerosalema le nanjaka zisike ty telo amby telopolo tao teo amy Israely vaho Joda iaby re. ⁶ Nindeha nimbaeo Jerosalema ty mpanjaka vaho reo ndatine mba handietse reo Jebosita, reo mpanompo ty tane. Hoe iereo tamy Davida ty hoe:" Tsy ho avy eto riha laha tsy ty goa vaho ty mandrava ro hampihere anao. Tsy fake ty ho avy eto Davida." ⁷ Na le zay aza, le nangalake ty fiaro mafe Ziona, aze tana i Davida amizao ty Davida. ⁸ Tamize andro zay ty Davida nanao ty hoe:" Reo ze manafike ty Jebosita le tsy maintsy handrio amity lalan-drano mba hahazo ty 'mandrava vaho ty goa ze fahavalo Davida." Zay ro irehafa ty ndaty ty hoe:" Ty 'goa vaho ty mandrava' le tsy mahazo militse ty lapa." ⁹ Ka nitoboke tao amity fiaro mafe i Davida naho nikaike ty hoe ty tana Davida. Nihamafesene ty magnodidy zay, bakegne amity lavaranga mbaeo agnatene. ¹⁰ Lasa natanjake bey Davida satria Yaveh, ty Zagnahare ty maro, ro niarake tamine. ¹¹ Bakeo Hirama mpanjaka i Tyra nagnirake mpinday talily, vaho hetae sedera, mpandrafetre, naho mpagnamboatre tragno tagne amy Davida. Nagnamboatre tragno ho ahy Davida iereo. ¹² Hay Davida fa le fa nametrake aze ho mpanjaka Israely ty Yaveh, naho le fa nagnakatre ty fanjakane noho ty amy Israely vahoakene re. ¹³ Bakeo Davida niala tao Hebrona naho nindeha tagne Jerosalema, nangalake valitsindrano vaho valy maromaro tagne Jerosalema re, naho nisy anadahy maro vaho anak'ampela maro naterane. ¹⁴ Toa iaby ty agnara reo anake naterane tagne Jerosalema: Samoa, Sobaba, Nafega, Jafia, ¹⁶ Elisama, Eliada, naho Elifeleta. ¹⁷ Naho laha fa rey reo Filisitina fa le fa voahosotre ho mpanjaka Israely ty Davida, le niakatre iereo iaby mba hipay aze. Nefa naharey momba zay Davida le nindeha nizotro tagne amity fiaro mafe. ¹⁸ Naho le niavy reo Filistina ka nizarazara tagne ambaibo i Refaima. ¹⁹ Le nipay vonje tamy Yaveh ty Davida. Hoe re ty hoe:" Tokone hanafike reo Filistina vao raho? Hagnomea faharesea amiereo vao riha?" Hoe ty Yaveh tamy Davida ty hoe:" Manafiha, fa hagnomea faharesea ho anareo eo amireo Filistina vatane raho." ²⁰ Ka nanafike tao Bala-Perazima ty Davida, naho tao ro nandreseane iereo. Nanoro hevetse re ty hoe:" Nisafoake tamireo fahavaloko teo agnoloako manahake ty fisafoke ty safo-drano ty Yaveh." ka lasa Bala-Perazima ty agnara ze toera zay. ²¹ Nienga reo Filistina teo ty sampe iereo, naho niente Davida vaho reo lahilahine lavitse reo. ²² Bakeo le niakatre ndraike reo Filistina naho nizarazara fagnindroene tegne ambaibo Refaima. ²³ ka le nipay vonje tamy Yaveh ndraike ty Davida, naho hoe ty Yaveh tamine ty hoe:" Ko manafike ty magnoloa iereo riha, fa iario bakao afara iereo naho mamonjea iereo eo amireo hetae balsama. ²⁴ Laha fa maharey ty feon-diabey egne amity tioke mitioke bakeo ambone ty hetae balsama riha, le ao hanafike amin-kere. Anovo zay satria hiakatre aloha nareo maba hanafike ty tafike reo Filistina ty Yaveh." ²⁵ Ka le nanao arke ze nandilia Yaveh aze ty Davida. Nivonoene namototre tagne Geba ka zisikagne amity lala iaby mbaeo Gezera reo Filistina.