¹ Toa are ty safa Davida farane__Davida anadahy Jese, ty lahilahy vatane namean-kasy, ty lahilahy ze voahoso ty Zagnahare Jakoba, ty mpanao salamo tea ty Israely. ² " Ty fagnahy Yaveh nirehake tamity alalako, naho teo amity lelako ty rehane. ³ Nirehake ty Zagnahare Israely, nirehake tamiko ty Vatolampy Israely hoe:' Ty mandily ty ndaty amity fahitia, ty mpandily amity tahotre an'Agnahare. ⁴ Re le hanahake ty hazava ty maray laha fa vaky ty andro, maray tsy misy raho, laha fa mitiry bakamity tane ty akata-maintso amity alala ty famirapira ty masoandro afara ty ora. ⁵ Eka mare, tsy hoe zay eo agnoloan'Agnahare vao ty fokoko? Tsy le fa nanao fagnenkea zisikezay, voalahatre vaho azo antoke amity fomba iaby tamiko vao Re? Feie tsy manombo ty famonjea ahy vaho mandefe ty fagniriako iaby vao Re? ⁶ Kanefa ty tsy mete le hanahake ty fatike aria iaby, satria tsy voavory ty tagna ty ndaty reigne. ⁷ Ty ndaty ze mikasa iereo le tsy maintsy mampiasa zaka vita amity vy na folesen-defo. Tsy maintsy oroa eo amize itobohane reigne."' ⁸ Toa iaby ty agnara reo miaramila sanga Davida: Josebala ty Takemonita ro mpitarike reo miaramila sangane. Namono lahilahy valonjato tao agnate ty aly raike re. ⁹ Magnorikorike aze ty Eleazara, anadahy Dodo, anadahy Ahohita, raike amireo lahilahy telo mahere Davida. Teo re tamity naharesea iereo ty Filistina ze nivory niarake mba hialy, vaho tamity nihemora ty lahilahy Israely. ¹⁰ Nitsanga ty Eleazara naho nialy tamity Filistina mandram-pirokafa ty tagnane naho nipiteke teo amity taho ty mesone ty tagnane. Ninday fandreseam-bey tamize andro zay ty Yaveh. Nihere nagnorike i Eleazara ty tafike, mba hitimpo ze amireo fate avao . ¹¹ Nagnorikorike aze ty Sama anadahy Age, ty Hararita. Niarake nivory teo amize nisy tanem-boagnemba ty Filistina, naho ty tafike nilay iereo. ¹² Fa Sama kea nitsanga teo agnivo ty baibo naho niaro zay. Vinonone ty Filistina, naho ninday fahareseam-bey Yaveh. ¹³ Ty telo tamireo miaramila telopolo le nimbaeo amy Davida tamity andro ty fararano, tao amity zohy Adolama. Nitobe teo amity Baibo Refaita ty tafike reo Filistina. ¹⁴ Tamize andro zay ty Davida le tao amity fiarovane mafe, zohy raike, laha nitoboke tao Betlehema ty Filistina. ¹⁵ Nipay rano ty Davida ka hoe re ty hoe:"Laha mba misy ndaty magnomea ahy rano ho nome bakamity lava-drano ao Betlehema, ty lava-drano eo agnila ty vavahady zao!" ¹⁶ Ka le namakivaky ty tafike ty Filistina reo telo lahy mahere reo naho nangalake rano bakao amity lava-drano Betlehema, ty lava-drano eo agnila ty vavahady. Nalae iereo ty rano naho nientene tagne amy Davida, kanefa nilietse ty hino zay re. Fa nailine ho ahy Yaveh kea zay. ¹⁷ Bakeo le hoe re ty hoe:" Ry Yaveh, Sagnatria, laha hanao zay raho. Tokone hino ty lio reo lahilahy ze nanao soro ty arofone vao raho?" Ka le nilietse ty hino zay re. Reo zaka reo ro natao reo telo lahy mahere. ¹⁸ Abisay, rahalahy Joaba naho anadahy Zeroia, ro kapitene ie telo. Nialy tamireo telo arivo lahy re naho namono iereo tamity lefo. Voatogno mateteke niarake tamireo miaramila telo re. ¹⁹ Tsy nalaza noho reo telo lahy vao re? Natao kapitene iereo re. Kanefa, ty lazane le tsy nitovy tamity laza reo miaramila telo lahy malaza vatane. ²⁰ Benaia bakagne Kabezela le anadahy Joiada; re le lahilahy mafe ze nanao asa foloay. Namono ty anake roe lahy i Ariela tagne Moaba re. Nizotro tao agnate lavake avao kea re naho namono liona laha mboe nisy havandra igne. ²¹ Naho le namono lahilahy Egyptiana maro re. Nana lefo tegne antagnane ty Egyptiana, kanefa tamity tehe avao ro nialia Benaia tamine. Nalaene tegne amity tagna ty Egyptiana ty lefo naho tamity lefone avao ro namonoane aze. ²² Benaia anadahy Joiada ro nanao ze asa foloay zay, naho nandaza niarake tamireo telo lahy mahere re. ²³ Nalaza noho reo miaramila telopolo re amity mare, kanefa tsy le tena nalaza manahake reo miaramila telo sangane vatane. Nefa Davida nanao aze ho mpiambe aze. ²⁴ Agnate reo telopolo ty lahilahy magnarake toa: Asahela rahalahy Joaba, Elanana anadahy Dodo bakagne Betlehema, ²⁵ Sama ty Harodita, Elika ty Harodita, ²⁶ Hezela ty Paltita, Ira anadahy Ikesy ty Tekoita, ²⁷ Abiezera ty Anatotita, Mebonay ty Hosatita, ²⁸ Zalmona ty Ahohita, Maharay ty Netofatita; ²⁹ Haleba anadahy Bana, ty Netofatita, Itahy anadahy Ribay bakagne Gibea ty foko Benjamina, ³⁰ Benaia ty Piratonita, Hiday bakamity baibo ty Gasy. ³¹ Abi-albona ty Arbatita, Azmaveta ty Psaromita, ³² Eliaba ty Salbonita, anadahy Jasena, Jonatana anadahy Sama ty Hararita; ³³ Ahiama anadahy Sarara ty Hararita, ³⁴ Elifeleta anadahy Ahasbay ty Makatita, Eliama anadahy Ahitofela ty Gilonita, ³⁵ Hezray ty Karmelita, Paray ty Arbita, ³⁶ Jigala anadahy Natana bakagne Zoba, Bany bakamity foko Gata, ³⁷ Zaleka ty Amonita, Naharay ty Berotita, mpinday ty zaka-fialia ho ahy Joaba anadahy Zeroia, ³⁸ Ira ty Jitrita, Gareba ty Jitrita, ³⁹ Oria ty Hetita__fito amby telopolo ie iaby.