¹ Naho tamity tao fahasive nanjaka Zedekia Mpanjaka, tamity vola fahafolo, naho tamity andro fahafolo ty vola, le avy handietre i Jerosalema ty Nebokadnezara mpanjaka Babylona vaho reo tafine iaby. Nitobe teo agnila zay re, naho nanangana iereo rindry magnodidy zay. ² Ka le natao faherano zisikamity faha-raike amby folo tao nanjaka Zedekia Mpanjaka ty tana. ³ Tamity andro fahasive ty vola fahaefatre tamize tao zay, le nagnisy mafe ty kere tao antana ka tsy nisy hane ho ahy ty vahoake ty tane. ⁴ Le vahy ty tana, naho ty lahilahy mpialy iaby nilay tamity hale bakeo amity lala ty vavahady teo agnivo reo rindry roe, ze eo amity tane ty mpanjaka, na le nagnodidy ty tana iaby aza reo kaldeana. Nindeha tamity lala mbaeo Araba ty mpanjaka. ⁵ Kanefa nagnia i Zedekia Mpanjaka ty tafike Kaldeana ka nahatratre aze teo amity gebo ty baibo i Jordana agnila i Jeriko. Naho nizara niala tamine ty tafine iaby. ⁶ Tsinepa iereo ty mpanjaka naho nientene niakatre tagne amity mpanjaka Babylona tagne Ribla, tagne iereo ro nitsara aze. ⁷ Laha ty amireo anadahy Zedekia kea, vinono iereo teo amasone iereo. Bakeo le pinoa iereo ty masone, finehene tamity sene varahy re, naho nientene tagne Babylona. ⁸ Tamity vola fahadime, tamity andro fahafito ty vola, ty tao fahasive amby folo nanjaka i Nabokadnezara mpanjaka Babylona, le nimbaeo Jerosalema, ty Nebokadnezara, mpanompo ty mpanjaka Babylona vaho bey reo mpiambe. ⁹ Noroane ty tragno Yaveh, ty lampa ty mpanjaka, naho ty tragno iaby tao Jerosalema; naho noroane avao kea ze tragno bey manan-danja iaby tao antana. ¹⁰ Naho reo rindry magnodidy i Jerosalema iaby, le pinote reo tafike Babylona ze teo ambane fahe ty bey ty mpiambe. ¹¹ Laha ty amireo vahoake ze sisa tavela tao antana, reo ze niala ty mpanjaka Babylona, naho reo vahoake sisa__le nalefa Neborazadana, mpifehe ty mpiambe an-joron-tane iereo. ¹² Kanefa ty bey ty mpiambe le nagnenga ty ilane tamireo mahantra vatane amity tane mba hiasa reo tanem-boaloboke vaho reo baibo. ¹³ Naho ty amireo ambe varahy ze tao antragno Yaveh, vaho reo tsangana naho reo taven-drano varahy bey ze tao antragno Yaveh, le pinotepote reo Kaldeana naho niente iereo nihere tagne Babylona ty varahy. ¹⁴ Reo velagne, lapele, fisy jiro, sotro, naho reo fanake varahy iaby ze ampiasae ty mpisoro eo antempoly__le nalae reo Kaldeana iaby. ¹⁵ Ty velagne fagniligna lavenoke vaho ty finga ze vita tamity volamena, naho reo vita tamity volafoty__le nalae ty kapitene ty mpiambe ty mpanjaka avao kea. ¹⁶ Reo ambe roe, ty koveta, naho reo tsangana ze natao Solomona ho ahy ty tragno Yaveh le misy varahy tsy hisake ho lanjae. ¹⁷ Ty tazoa ty ambe voalohane le valo amby folo metatre, naho hengo kapitaly varahy ty tafo zay. Telo metatre ty haabo ty kapitaly, miarake amity rofia vaho ampongambein-dagnitse magnodidy ty kapitaly iaby, natao tamity varahy iaby. Mitovy amity rofia voalohane avao ty raike hafa. ¹⁸ Nalae ty bey ty mpiambe Seraia bey ty mpisoro, niarake tamy Zefania, mpisoro faharoe, naho reo mpiambe vavahady telo. ¹⁹ Bakao antana re ro nangalake tandapa raike ho gadra ze nita reo miaramila, naho dime lahy tamireo le mpagnomea hevetre ty mpanjaka, ze mboe tao antana. Ginadrane avao kea ty manam-pahefa ty tafike ty mpanjaka ze mita reo lahilahy mianatre ho ao amity tafike, niarake tamina enempolo lahy manan-kanja bakamity tane ao antana. ²⁰ Naho Nebozaradana, bey ty mpiambe, nangalake naho ninday iereo tagne amity mpanjaka Babylona tagne Ribla. ²¹ Vinono ty mpanjaka Babylona tao Ribla tao amity tane Hamata iereo. Hoe ze ro nagnanova sese-tane i Joda tagne ambaly ty tanene. ²² Laha ty amireo vahoake ze nijano tao amity tana Joda, reo ze nienga Nebokadnezara mpanjaka Babylona, le nametrake i Gedalia anadahy Ahikama ana i Safana, hita iereo re. ²³ Naho laha fa rey reo bey ty miaramila iaby, iereo vaho reo ndatine, fa le fa natao ty mpanjaka Babylona governora ty Gedalia, le nindeha tagne amity Gedalia tagne Mizpa iereo. Toa ze lahilahy zay, Ismaela anadahy Netania, Johanana anadahy Karea, Seraia anadahy Tanometa ty Netofatita, naho i Jazania anadahy ty Makatita__iereo vaho ty ndaty iereo. ²⁴ Nanao fifanta tamiereo vaho tamireo ndatine ty Gedalia, naho nirehake tamiereo hoe:" Ko matahotre reo manampahefa Kaldeana nareo. Mitoboha eo amity tane naho manompoa ty mpanjaka Babylona,naho ho soa ho anareo zay." ²⁵ Kanefa tamity vola fahafito Ismaela anadahy Elisama, bakamity foko ty mpanjaka, le nindeha niarake tamina folo lahy naho nanafike i Gedalia. Mate niarake tamireo ndaty Joda vaho reo Babylona ze niarake tamine tagne Mizpa ty Gedalia. ²⁶ Naho ty vahoake iaby, ty kele vatane ka zisikamity bey vatane, naho reo bey ty miaramila, le nindeha naho nimbaeo Egypta, satria natahotre reo Babylona iereo. ²⁷ Tafara atoy tamity fahafito amby telopolo naha-sese-tane i Joiakina mpanjaka Joda, ty vola faharoe amby folo, andro fahafito amby roapolo ty vola, le namototre i Joiakina mpanjaka Joda tagne ampi-gadra ty Evila-merodaka mpanjaka Babylona. Tamity tao nanomboha Evila-merodaka nanjaka zay ro nisy zay. ²⁸ Nirehake tamine tamity hasoam-pagnahy vaho nagnomea sezan-droandria manan-kaja kea noho ty ahy reo mpanjaka hafa ze niarake tamine tao Babylona re. ²⁹ Nafaha i Evila-merodaka ty akanjo maha-gadra i Joiakina, naho i Joiakina le nihina teo amity latabatre ty mpanjaka zisike ty androne. ³⁰ Namea solon-kane isan-andro re zisike ty androm-pivelognane.