¹ Tamity andro Joiakima, le nanafike Joda ty Nebokadnezara mpanjaka Babylona; lasa mpanompone zisike ty telo tao ty Joiakima. Naho nivalike ka niarake nandietre i Nebokadnezara ty Joiakima. ² Nandefa reo tafike Kaldeana, Syriana, Moabita naho Amonita handietre i Joda mba handrava zay iereo. Mifagnarake amity safa Yaveh, ze nirehafene tamity alala reo mpaminane mpanompone zay. ³ Azo antoke fa tamity vava Yaveh ro nahavy zay tamy Joda, mba hagnafake iereo tsy ho eo amasone, noho ty hadisoa Manase, le iaby ze nataone, ⁴ naho noho ty lio tsy manan-tsiny ze napone avao kea, satria finenone tamity lio tsy manan-tsiny ty Jerosalema. Tsy nivogno ty hamototre zay ty Yaveh. ⁵ Laha ty amireo raraha hafa mikasike i Joiakima, vaho ze nataone iaby, feie tsy le fa voasoratre ao amity boke ty tantara reo mpanjaka Joda vao zay? ⁶ Nimate niarake tamireo razambeine ty Joiakima, naho Joiakina anadahine ro lasa mpanjaka nisolo aze. ⁷ Tsy nanafike tagne ambaly ty tanene sase ty mpanjaka Egypta, satria ty mpanjaka i Babylona le fa naharese ty tane iaby ze teo ambane fehe ty mpanjaka Egypta, zisikamity baibon-driake Egypta ka zisikamity rano Eofrata. ⁸ Valo amby folo tao ty Joiakina ro nanomboke nanjaka; nanjaka telo vola tamy Jerosalema re. Ty agnara ty renene le i Nehosta; anakampela Elnatana bakagne Jerosalema. ⁹ Nanao ze raty teo amaso Yaveh re; nanao iaby ze nataon-draene re. ¹⁰ Tamize andro zay ty tafike Nebokadnezara mpanjaka Babylona le nanafike i Jerosalema ka nanao faherano ty tana. ¹¹ Niavy teo antana ty Nebokadnezara mpanjaka Babylona laha mboe nanao faherano zay ty miaramilane, ¹² naho i Joiakina mpanjaka Joda nimbaeo amity mpanjaka Babylona, re, ty renene, reo mpanompone, reo roandriane, naho reo manampahefane. Nitsepake aze ty mpanjaka Babylona tamity tao fahavalo nanjakane. ¹³ Nalae Nebokadnezara bakao iaby reo zaka lafovily iaby tao antragno Yaveh, vaho reo tao andampa ty mpanjaka. Pinotepotene ty zaka volamena iaby ze natao Solomona mpanjaka Israely tao amity tempoly Yaveh, arake ze nirehafe Yaveh fa hiseho. ¹⁴ Nataone sese-tane ty Jerosalema iaby, ty mpitarike iaby, vaho reo lahilahy mpialy iaby, babo ray ale, vaho reo mpanao asa-tagna, naho reo mpifehe iaby. Tsy nisy niengane hijano laha tsy reo ndaty mahantra vatane teo amity tane. ¹⁵ Nalae Nebokadnezara ho sese-tane tao Babylona ty Joiakina, amity rene ty mpanjaka, reo valine, reo manam-pahefane, naho reo bey ty lahilahy teo amity tane. Nalaene ho sese-tane bakagne Jerosalema nimbaeo Babylona iereo. ¹⁶ Reo lahilahy mpialy iaby, fito arivo, mpanao asa-tagna vaho mpanefe vy ray ale, ie iaby reo le natao ho amity aly iaby__ty mpanjaka Babylona ninday reo lahilahy iaby reo ho sese-tane ho agne Babylona. ¹⁷ Natao ty mpanjaka Babylona ho mpanjaka hisolo aze ty Matania, rahalahin-drae i Joiakina, naho novaene ho Zedekia ty agnarane. ¹⁸ Raike amby roapolo tao ty Zedekia ro nanomboke nanjaka; nanjaka zisike ty raike amby folo tao tamy Jerosalema re. Hamotala ro agnara ty renene; anakampela Jeremia bakagne Libna. ¹⁹ Nanao ze raty teo amaso Yaveh re; nataone iaby ze natao Joiakima. ²⁰ Tamity helo Yaveh, ro niboaha reo zaka iaby reo tagne Jerosalema vaho Joda, mandram-piroane iereo tsy ho eo amity fiatrehane. Naho le niarake nandietre ty mpanjaka Babylona ty Zedekia.