¹ Le nagnirake mpinday talily ze namory teo amine reo olobey Joda vaho Jerosalema iaby ty mpanjaka. ² Le niakatre tao antragno Yaveh ty mpanjaka, vaho reo vahoake Jerosalema iaby niarake tamine, vaho reo mpisoro, reo mpaminane, naho reo vahoake iaby, zisikamity kele ka hatramity foloay. Vinakine teo an-tsofy iereo ty reha ty boke ty fagnenkea iaby ze hisake tao antragno Yaveh. ³ Nitsanga teo agnila ty ambe ty mpanjaka naho nanao fagnenkea teo agnoloa Yaveh, mba hagnorike Yaveh vaho hiambe reo liline, reo fotsipene, naho reo lalane, amity arofone iaby vaho ty fagnahine iaby, mba hagnamafe reo reha ze fagnenkea zay ze voasoratre ao amity boke toy. Ka le nagnenke ty fagnenkea ty vahoake iaby. ⁴ Naho ty mpanjaka nandily Hilkia mpisorombey, reo mpisoro ambane fahefane, naho reo mpiambe vavahady mba hagnakatre bakao amity tempoly Yaveh reo fanake iaby ze natao ho ahy Bala vaho Astarta, vaho ahy reo Kinta ty lagnitre iaby. Nagnoro zay tagne ambaly Jerosalema tagne ambaibo tao amity baibo Kidrona re naho ninday ty laveno reo tagne Betela. ⁵ Nagnafoa reo mpisoro mpanompo sampe ze finily reo mpanjaka Joda hagnoro liten-ketae magnitre tao amireo toera agnabo tao amireo tana Joda vaho tao amireo toera nagnodidy i Jerosalema re__le reo ze nagnoro liten-ketae magnitre ho ahy Bala, hi ahy ty masoandro vaho ty vola, ho ahy reo planeta, naho ahy reo kinta ty lagnitre iaby. ⁶ Nagnakatre ty baon'Aseraha bakao amity tempoly Yaveh re, tagne ambaly Jerosalema tagne ambaibo Kidrona naho nagnoro zay teo. Tinorotorone ho deboke zay ka nariane teo amireo kiborim-bahoake ze deboke zay. ⁷ Finafane reo efetregno reo lahilahy mpivavake mivaro-bata ze tao antempoly Yaveh, ze nanenoa reo ampela siky ho ahy Aseraha. ⁸ Ninday reo mpisoro iaby tagne ambaly ty tana Joda ty Josia naho nagnoro reo toera agnabo ze nagnoroa reo mpisoro liten-ketae magnitre, nanomboke tao Geba zisikagne Beri-sheba. Rinavane reo toera agnabo teo amireo vavahady ze teo amity filira mbaeo amity vavahady Josoa (tana ty governora), teo amity ilane ankavia ty vavahady ty tana. ⁹ Na le tsy nenga nisoro teo amity alitara Yaveh tao Jerosalema aza reo mpisoro reo toera agnabo reo, le nihina mofo tsy misy masirasira teo amireo rahalahine iereo. ¹⁰ Linoto Josia ty Tofeta, ze tao amity Baibo Beni-hinoma, mba tsy hisy ndaty hagnoro ao agnate afo ty anadahine na ty anakampelane ho soro ho ahy Moloka. ¹¹ Nalaene reo soavale ze namea reo mpanjaka Joda ty masoandro. Teo amity faritre teo amity filira ho ao antempoly Yaveh, agnila ty efetragno Natana-meleka, tandapa reo. Noroa i Josia reo kalese ty masoandro. ¹² Rinava Josia mpanjaka reo alitara ze teo amity tafo ty efetragno Ahaza farane ambone, ze namboare ty mpanjaka Joda, vaho reo alitara ze natao Manase tao amireo kianja ty tempoly Yaveh roe. Tinorotoro Josia reo naho nariane tao amity Baibon-driake Kidrona. ¹³ Rinava ty mpanjaka reo toera agnabo antignana Jerosalema, antimo ty vohitse ty haratia zay namboare i Solomona mpanjaka Israely ho ahy Astarta, ty sampe raty reo Sidoniana; ho ahy Kemosy, ty sampe raty Moaba; naho ho ahy Moloka, ty sampe raty reo vahoake i Amona. ¹⁴ Tinorotorone reo tsagam-bato naho tinampane reo baon'Aseraha naho finenone taola ty ndaty reo toera reo. ¹⁵ Rinava Josia vatane avao kea ty alitara ze tao Betela vaho ty toera agnabo ze namboare Jeroboama anadahy Nebata (ty raike ze nampanonta ty Israely). Noroane avao kea ze alitara zay vaho ty toera agnabo ka tinorotorone ho deboke. Noroane avao kea ty baon'Aseraha. ¹⁶ Laha nagnente ty faritre Josia, le hisane reo kibory ze teo amity tazoa. Nagnirake lahilahy mba hangalake ty taola bakao amireo kibory re; ka le noroane teo amity alitara reo, ze nandoto zay. Zay le arake ty safa Yaveh ze nirehafe ty lahilahin'Agnahare, le ty lahilahy ze nirehake reo zaka reo aloha. ¹⁷ Le hoe re:" Tsangambato ino ty hisako?" Reo lahilahy ty tana nirehake tamine hoe:" Io le kibory ty lahilahin'Agnahare ze bakagne Joda naho nirehake miomba reo zaka ze vaho nataonao tamity alitara Betela." ¹⁸ Le hoe Josia:" Engao zay. Tsy misy ndaty tokone hamindra reo taolane." Kanefa nenga iereo, niarake tamireo taola ty mpaminane ze bakagne Samaria ty taolane. ¹⁹ Le nafaha Josia reo tragno iaby tagne amireo toera agnabo ze tagne amireo tana ty Samaria, ze natao reo mpanjaka Israely, naho ze nahavy Yaveh nimeloke. Nataone mitovy tsy misy hafa tamize natao tagne Betela reo. ²⁰ Vinonone teo amireo alitara reo mpisoro ty toera agnabo iaby naho nagnoro taola ty ndaty teo amireo re. Bakeo le nihere tagne Jerosalema. ²¹ Le nandily ty vahoake iaby ty mpanjaka hoe:" Ambeno ty Pasake Yaveh Zagnaharenareo, arake ze voasoratre ao amity Boke ty Fagnenkea toy." ²² Tsy nisy fandaza ty Pasake niambena hoe zay zisikamity andro reo mpitsara ze nandily teo amy Israely, na tamity andro reo mpanjaka ze nandily ty Israely, na tamireo andro reo mpanjaka Israely na Joda iaby. ²³ Fa tamity tao fahavalo amby folo nanjaka Josia mpanjaka ro nandaza tagne Jeerosalema ze Pasake Yaveh zay. ²⁴ Rinoa Josia avao kea reo ze nirehake tamity ate na tamity fagnahy. Rinoane avao kea reo terafima, reo sampe, naho reo zaka raty iaby ze hisake tao amity tane ty Joda vaho tane Jerosalema, mba hagnamafea reo reha ty lala ze voasoratre tao amity boke ze hisa Hilkia mpisoro tao antragno Yaveh. ²⁵ Taloha Josia, le tsy mboe nisy mpanjaka manahake aze, ty nihere tamy Yaveh tamity arofone iaby, ty fagnahy iaby, naho ty herene iaby, te nagnorike ty lala Mosesy iaby. Vaho tsy nisy mpanjaka hoe i Josia nitsanga tafarane. ²⁶ Na zay aza, le tsy nijano ty fireheta ty helo Yaveh, ze nirehetre tamy Joda noho reo fanompoan-tsampe iaby ze nipaia Manase aze. ²⁷ Ka hoe Yaveh:" Afahako tsy ho eo amasoko avao kea ty Joda, manahake ty nagnafahako Israely, naho hariako ty tana ze finiliko toy, le Jerosalema, vaho ty tragno ze nirehafeko ty hoe:' Ho ao ty agnarako."' ²⁸ Laha ty amireo raraha hafa mikasike Josia, ty zaka iaby ze nataone, feie tsy le fa voasoratre ao amity boke ty tantara reo mpanjaka Joda vao zay?" ²⁹ Tamity andro, Farao-neko, mpanjaka Egypta, le nindeha mba hialy tamity mpanjaka Asyria tao amity Rano Eofrata. Nindeha nanalaka i Neko tao agnaly ty Josia mpanjaka, ka vinono Neko tao Megido re. ³⁰ Reo mpanompo Josia ninday aze te fa mate tao agnate kalese bakagne Megido, ninday aze tagne Jerosalema, naho nandeve aze tao amity kiborine arere. Le nalae ty vahoake ty tane ty Joahaza anadahy Josia, hinosone, naho nataone ho mpanjaka nisolo ty toeran-draene. ³¹ Telo amby roapolo tao ty Joahaza ro nanomboke nanjaka, naho nanjaka zisike ty telo voa tao Jerosalema re. Ty agnaran-drenene le i Hamotala; re le anakampela Jeremia bakagne Libna. ³² Nanao ze raty teo amaso Yaveh ty Joahaza, hoe ty zaka iaby ze natao reo razambeine. ³³ Finehe Farao-neko sene tao Ribla tao amity tane Hamata re, mba tsy hanjakane ao Jerosalema. Le nampandoae Neko talenta volafoty zato vaho talenta volamena raike ty Joda. ³⁴ Natao Farao-neko ho mpanjaka teo amity toera Josia raene ty Eliakima ana i Josia, naho novaene hoe Joiakima ty agnarane. Nefa ninday i Joahaza nimbaeo Egypta re, ka mate tagne ty Joahaza. ³⁵ Nandoa ty volafoty vaho volamena tamy Farao ty Joiakima. Mba ho vale ty hata Farao mpanjaka, le nampandoa hetra ty tane ty Joiakima naho sinerene mba handoa volafoty vaho volamena amine arake ty isa iereo ty ndaty kirai-kiraie tamireo vahoake ty tane. ³⁶ Dime amby roapolo tao ty Joiakima ro nanomboke nanjaka, naho nanjaka raike amby folo tao tamy Jerosalema re. Ty agnaran-drenene le i Zebida; re le anakampela Pedaia bakagne Romaha. ³⁷ Nanao ty raty teo amaso Yaveh ty Joiakima, manahake ze natao reo razambeine.