¹ Valo tao ty Josia ro nanomboke nanjaka; raike amby telopolo tao ro nanjakane tao Jerosalema. Jedida ro agnaran-drenene (anakampela Adaia bakagne Bozkara). ² Nanao ze mare teo amaso Yaveh re. Nindeha tamireo lala iaby Davida razambeine re, naho tsy niotake lala ankavia na ankavana. ³ Naho teo amity fahavalo amy folo tao Josia Mpanjaka, le nandefa i Safana ana i Azalia ana i Mesolama, ty mpanora-dala, tagne antragno Yaveh re, nanao hoe: ⁴ "Mindeha agne amy Hilkia mpisoro bey naho ambarao re mba hagnisake ty vola ze niente tagne antragno Yaveh, ze navory ty mpiambe tempoly tamity vahoake. ⁵ Ao zay hagnomea eo antagna ty mpiasa ze mita ty tragno Yaveh, naho ao iereo hagnomea zay ty mpiasa ze ao antragno Yaveh, mba hagnamboara ze simba ao amity tempoly. ⁶ Ao iereo hagnomea vola ho ahy reo mpandrafitre, reo mpagnoren-tragno, naho mba hivily hetae vaho vato voapeke avao kea mba hagnamboara ty tempoly." ⁷ Fa tsy ho take amiereo ty isa ty vola, satria mpampiasa zay ampatokia iereo. ⁸ Hoe Hilkia mpisorombey tamy Safana mpanora-dala hoe:" Hisako tao amity tragno Yaveh ty boke ty lala." ⁹ Ka namea Hilkia i Safana ty boke, naho namaky zay re. Lasa ty Safana naho nangalake ty boke tegne amity mpanjaka, naho hitalily amine avao kea, manao hoe:" Reo mpanomponao le nandany ty vola ze hisake tao antempoly naho natolo iereo teo antagna reo mpiasa ze magnara-maso ty fikarakara ty tragno Yaveh zay." ¹⁰ Le hoe Safana mpanora-dala tamity mpanjaka:" Hilkia mpisoro ro nagnomea ahy ty boke." Naho vinaky Safana tamity mpanjaka zay. ¹¹ Naho laha fa naharey reo reha ty lala ty mpanjaka, le nandriatre ty akanjone re. ¹² Nandily Hilkia mpisoro, vaho Ahikama ana i Safana, i Akbora ana i Mikaia, Safana mpanora-dala, naho i Asaia, ty mpanompone, ty mpanjaka, ka nanao ty hoe: ¹³ "Mindehana naho mirehafa amy Yaveh ho ahy, naho ho ahy reo vahoake vaho reo Joda iaby, noho reo reha ty boke ze hisake toy. Fa mafe ty helo Yaveh ze mirehetre amintika noho ty tsy fidranjigna reo razambeintika reo safa ty boke toy le ty hoe hagnenke iaby ze voasoratre miomba antika." ¹⁴ Laha zao Hilkia mpisoro, Ahimaka, Akbora, Safana, naho i Asaia ro nindeha nimbaeo amy Holda ty mpaminane vave, valy Saloma ana i Tikva ana i Harasa, ty mpikarakara ty siky (nitoboke tao Jerosalema tao amity faritre faharoe re), naho nirehake tamine iereo. ¹⁵ Hoe rampela tamiereo:" Zao ro safa Yaveh, ty Zagnahare Israely:' Ambarao ty ndaty ze nandefa anareo amiko atoy hoe: ¹⁶ " Zao ro safa Yaveh:" Ingo, hinday loza amity toera toy vaho reo vahoakene Raho, arake ty zaka iaby voasoratre ao amity boke ze vinaky ty mpanjaka Joda. ¹⁷ Satria nahafoe Ahy naho nagnoro liten-ketae magnitre ho ahy reo zagnahare hafa iereo, mba hipay ahy ho maleko amireo asa iaby ze natao iereo__laha zao ty heloko le nirehetre tamity toera toy, naho tsy ho mate zay."' ¹⁸ Fa ho ahy ty mpanjaka Joda, ze nandefa anao mba hagnontane ty sitrampo Yaveh, le zao ro ho rehafenao amine:" Yaveh, ty Zagnahare Israely nanao zao:" Miomba reo rehake ze reinao, soa-fo riha, naho satria nagnetre-bata teo agnoloa Yaveh riha, laha fa reinao ze nirehafeko tamity toera toy vaho reo ndatine, fa ho lasa horava vaho ozo iereo, naho satria riha le nandriatre ty akanjonao naho nitagny teto agnoloako, e nidranjy anao avao kea raho__zay ro talily Yaveh. ²⁰ Ingo, hagnaro anao amireo razanao Raho, naho hiroro ampilamina ao ankiborinao riha. Tsy hahisake reo loza iaby ze ho enteko amity toera toy ty masonao.""'Ka le niente ty lahilahy tagne amity mpanjaka ze talily zay.