¹ Naho laha fa rey Hezekia Mpanjaka ty talily iereo, le nandriatre ty akanjone re, nanao akanjo fandala, naho nilitre tao antragno Yaveh. ² Nagnirake i Eliakima ze bey ty tanapa re, vaho Sebna ty mpanora-dala, naho reo loha ty mpisoro, sambe nisiky ty akanjo fandala iaby, ho agne amy Isaia anadahy Amoza, ty mpaminane. ³ Le hoe iereo tamine:" Zao ro safa Hezekia:' ty andro toy ro andro ty fijalea, fagnaliloa, naho fagnafaham-baraka, le fa mba ho terake ty kolo, nefa tsy misy here mba hiteraha iereo. ⁴ Asa mete ho rey Yaveh Zagnaharenao ty rehake iaby natao ty bey ty mpifehe, ze nirahe ty mpanjaka Asyria tompone mba hipay an'Agnahare velo, naho hamale reo rehake ze le fa rey Yaveh Zagnaharenao. Ka akaro ho ahy ze sisa mboe eto ty vavakenao amizao."' ⁵ Naho niavy tagne amy Isaia ty mpanompo Hezekia mpanjaka, ⁶ naho Isaia nanao tamiereo hoe:" Ambarao amity tomponareo fa:' Zao ro reha Yaveh:" Ko matahotre ty amity rehake ze le fa reinao, ze le fa nagnaratia ty mpanompo ty mpanjaka Asyria ahy. ⁷ Ingo, hametrake fagnahy ao amine raho, naho haharey siosio re ka himpoly agne amity tanene. Hataoko lavo ty meso ao amity tanene re.""' ⁸ Le nimpoly ty bey ty mpifehe naho nahisake ty mpanjaka Asyria nialy tamy Libna, fa re le fa naharey fa le fa niala tao Lakisy ty mpanjaka. ⁹ Naho Sankeriba naharey fa i Tiraka mpanjaka i Etiopia vaho Egypta le fa nivogno ty hialy amine, laha zao le nagnirake mpinday talily ho agne amy Hezekia ndraike re hoe: ¹⁰ "Ambarao amy Hezekia mpanjaka Joda hoe:' Ko enga hamitake anao ty Zagnahare ze atokisanao ka hanao hoe:" Jerosalema le tsy hamea ho eo antagna ty mpanjaka Asyria." ¹¹ Ingo, le fa reinao ty zaka ze le fa natao ty mpanjaka Asyria tamity tane iaby tamity famoteha vatane reo. Ka ho voavonje vao riha? ¹² Le fa namonje iereo vao ty zagnahare ty firene, reo firene ze pinote ty razako: le i Gozana, Harana, Razefa, naho ty vahoake Edena tao Telasara? ¹³ Aia ty mpanjaka Hamata, ty mpanjaka Arpada, ty mpanjaka ty tana Sefarvaima, Hena, naho Iva?"' ¹⁴ Voarae Hezekia ty taratasy tagne amireo mpinday talily naho vinakine zay. Bakeo le niakatre tagne antragno Yaveh re ka namoha zay teo agnoloane. ¹⁵ Le nivavake teo agnoloa Yaveh ty Hezekia, naho nanao hoe:" Ry Yaveh tompo ty maro, Zagnahare Israely, Riha ze mitoboke eo ambone ty kerobima, Riha ro Zagnahare arere magnera ty fanjaka iaby eto antane. Riha ro nanao ty lagnitre vaho ty tane. ¹⁶ Atongilagno ty sofinao, ry Yaveh, naho midranjigna. Ampagnenteo ty masonao, ry Yaveh, ka magnentea, naho dranjigno ty reha Sankeriba, ze le fa nirahene mba handratiraty ty Zagnahare velo. ¹⁷ Eka mare, ry Yaveh, le fa nandrava reo firene vaho ty tanene vatane ty mpanjaka Asyria. ¹⁸ Le fa nagnoro ty zagnahare iereo tao agnate afo iereo, satria tsy zagnahare reo fa asa-tagna ty ndaty, hetae vaho vato avao. Ka pinote Asyriana iereo. ¹⁹ Ka amizao, ry Yaveh Zagnaharenay, mangatake Aminao raho, vonjeo amity herene zahay, mba hahaia ty fanjaka iaby eto antane fa Riha, Yaveh, ro Zagnahare arere." ²⁰ Naho Isaia anadahy Amoza nandefa talily tagne amy Hezekia, nanao hoe:" Yaveh, Zagnahare Israely nirehake hoe:' Satria le fa nivavake tamiko ty amy Sankeriba mpanjaka ASyria riha, le nindranjy anao raho. ²¹ Zao ro rehake rehafe Yaveh mikasike aze:" Ty anakampela varijine Ziona manao tsinontsino anao vaho mihehe ho amity fahafaham-baraka. Ty anakampela Jerosalema magnili-kili-doha aminao. ²² Ia ro le fa pinainao vaho rinatiratinao? Handietre ania ro nagnakaranao ty feonao vaho nagnandrandranao ty masonao ampirehareha? Handietre ty Masy Israely! ²³ Tamity alala reo iranao ro nipaianao ty Tompo, naho nanao ty hoe:' Tamity kaleseko maro ro niakarako tagne ambone ty Vohitse, ty fiakara agnabo vatane tagne Libanona. Hotampaheko ty sedera lava vaho ty Kypreso voamare nao. Hilitre amity faritre lavitre vatane raho, ao amize alane mamokatre vatane. ²⁴ Le fa nihaly lava-drano raho naho le fa nino ty rano ty firenen-kafa. Le fa nagnamaike ty rano Egypta iaby ho eo antomboko raho.' ²⁵ Tsy reinao vao ty fomba nagnomanako zay zisikamity ela vaho ty niasako zay tamity andro taloha? Amizao le fa hanao zay raho. Eo riha mba handrava reo tana manda ho lasa korontam-bato. ²⁶ Reo vahoake ao amine, ze kele here, le torotoro vaho megnatre. Zaka-mitiry egne ambaibo iereo, akata-maintso, akata egne ambone tafo na egne ambaibo, noroa aloha ty nitiriane. ²⁷ Fa zaho mahay ty fitobohanao, ty fiakaranao, ty filiranao, naho ty helonao amiko. ²⁸ Noho ty helonao amiko, naho satria rey ty sofiko ty avognavonao, le hametrake ty farangoko amity oronao Raho, naho ao amity vavanao ty lamboridiko; hataoko mihere amity lala niboahanao riha." ²⁹ Zao ro famantara ho anao: Hihina zaka mitiry tsy sitrampo nareo amity tao toy, naho ty tao magnarake le ty limbe zay. Fa amity tao fahatelo kea le hambole vaho hihaza nareo, hambole tanem-boaloboke ka hihina ty voane. ³⁰ Ty sisa amity foko Joda ze mboe velo le hisy tahone ndraike ka hihabey naho hamoa. ³¹ Fa hisy sisa hiakatre bakagne Jerosalema, bakagne ambohitse Ziona ro hiavia reo sisa tsy mate. Ty zotom-po Yaveh tompo ty maro ro hanao zay. ³³ Ty lala ze niaviane avao ro lala hiakarane; tsy ho tafilitre amity tana toy re__zay ro fagnambara Yaveh." ³⁴ Fa zaho hiaro vaho hagnavotre ty tana toy, noho ty amiko vaho ty amy Davida mpanompoko."' ³⁵ Naho tamio hale eo le avy ty anjele Yaveh naho nanafike ty tobe reo Asyriana, ka namono miaramila 185.000 laha fa nifoha aloha ty ndaty tamy maray, le nivalampatre tegne iaby ty fate ty ndaty. ³⁶ Ka niala Israely ty Sankeriba mpanjaka Asyria naho lasa noly vaho niotoboke tagne Ninive. ³⁷ Tafara atoy, laha nanao fanompoam-pivavaha tao antragnone Nisroka zagnaharene re, le vinono i Andrameleka vaho Sarezera anadahine tamity meso. Bakeo le nilay tagne amity tane Ararata iereo. Naho Esara-hadona anadahine ro lasa mpanjaka teo amity toerane.