¹ Tafara ty nahafate i Ahaba le navande handietse Israely ty Moaba. ² Le nikarapoke teo amity makarakara tao amity efetragno ambone tao Samaria ty Ahazia, naho nifere. ka nalefane reo mpinday ty taliline naho hoe re tamiereo ty hoe:" Mindehana, magnontanea i Bela-zeboba, zagnahare i Ekrona, laha ho sintra amity fereko toy raho." ³ Fa ty anjele Yaveh nirehake tamy Elia Tisbita hoe:" Mindena, miakara hifanoje amireo mpinday ty talily ty mpanjaka i Samaria, naho agnontaneo amiereo ty hoe:' Satria vao tsy misy Zagnahare ao Israely ro hindeha hangalake hevetre agne amy Bala-zeboba, zagnahare i Ekrona riha? ⁴ Laha zao le hoe ty Yaveh:" Tsy hizotro bakeo amity fandreanao ze le fa niakaranao riha; fa kea, ho mate vatane riha.""Bakeo le lasa ty Elia. ⁵ Laha fa nihere tagne amy Ahazia reo mpinday talily, le hoe re tamiereo hoe:" Fa nagnino ro nihere nareo?" ⁶ Hoe iereo tamine:" Nisy lahilahy raike nifanije taminay nanao ty hoe:' Miheregna agne amity mpanjaka ze nandefa anareo, naho ambarao aze ty hoe:" Ezao ty safa Yaveh:' Satria vao tsy misy Zagnahare ao Israely ro nandefa ty ndatinao hangalake hevetre agne amy Bala-zeboba, zagnahare Ekrona riha? Ka laha zao le tsy hizotro bakeo amity fandreanao ze le fa niakaranao riha; fa kea, ho mate vatane riha.""' ⁷ Ahazia nirehake tamireo mpandefa ty taliline hoe:" Lahilahy manahake ty akore, ze ndaty nifanoje taminareo naho nirehake reo rehake reo zay?" ⁸ Iereo namale aze hoe:" Nignisy akanjo vita amity volo re naho santira holitse teo amity vaniane." Naho ty mpanajka namale ty hoe:" Elia Tisbita zay." ⁹ Naho nandefa kapitene miarake amity miaramila dimampolo ho agne amy Elia ty mpanjaka. Niakatre tagne amy Elia ze nitoboke tagne ambone tazoa ty kapitene. Hoe ty kapitene tamine hoe:" Riha, ry lahilahin'Agnahare, nilaza ty mpanjaka ty hoe:' Mizotroa."' ¹⁰ Elia namale naho nanao tamity kapitene ty hoe:" Laha lahilahin'Agnahare raho, ao hipoke bakegne amity lagnitse ty afo naho handrava anao vaho reo dimampolo lahinao." Le nipoke bakegne amity lagnitse ty afo naho nandrava aze vaho reo dimampolo lahine. ¹¹ Nandefa kapitene hafa ndraike niarake tamireo miaramila dimampolo ho agne amy Elia ty Ahazia mpanjaka. Hoe kea ze kapitene zay tamy Elia hoe:" Riha, ry lahilahin'Agnahare, nirehake ty mpanjaka ty hoe:' Mizotroa malaky."' ¹² Elia namale naho nanao tamiereo hoe:" Laha lahilahin'Agnahare raho, ao hipoke bakegne amity lagnitse ty afo naho handrava anao vaho reo dimampolo lahinao." Le nipoke bakegne amity lagnitse nadraike ty afon'Agnahare naho nandrava aze vaho reo dimampolo lahine. ¹³ Mboe nandefa vondro mpialy dimampolo fagnintelone nadraike ty mpanjaka. Niakatre io kapitene eo, nandohaleke teo agnoloa Elia re, naho nangatake aze vaho nanao tamine hoe:" Riha, ry lahilahin'Agnahare, mangatake aminao raho, ao ho sarotre eo amasonao ty fiaiko vaho ty fiay toa mpanomponao dimampolo toa. ¹⁴ Eka mare, nipoke bakegne amity lagnitse ty afo naho nandrava reo kapitene roe voalohane naho ty lahilahine, fa amizao ao ho sarotre eo amasonao ty fiaiko." ¹⁵ Naho ty anjely Yaveh nanao tamy Elia hoe:" Mizotroa miarake amine. Ko matahotre aze." Ka nitsanga Elia naho nizotro niarake tamine ho agne amity mpanjaka. ¹⁶ Tafara kele zay le hoe Elia tamy Ahazia ty Hoe:" Zaho ro nirehafe Yaveh:' Le fa nandefa mpinday talily hangalake hevetre tagne amy Bala-zeboba, zagnahare Ekrona riha. Satria vao tsy misy Zagnahare ao Israely ze afake agnatahanao famantara? Ka amizao, tsy hizotro bakeo amity fandrea ze niakaranao riha; fa ho mate vatane riha."' ¹⁷ Le mate arake ty reha Yaveh ze nirehafe Elia ty Ahazia mpanjaka. Jorama ro nanomboke nanjaka teo amity toerane, tamity tao faharoe nanjaka i Jehorama anagn'i Josafata mpanjaka i Joda, satria tsy nana-gnanake ty Ahazia. ¹⁸ Naho ty amireo zaka hafa mikasike i Ahazia, feie tsy le fa voasoratre ao amity boke ty tantara ty mpanjaka Israely vao zay?