¹ Fa anao kosa, milazà ze mifagnaraka amin'ny fampenarana marina. ² Reo leila efa nahazo taona de tsy maintsy mahay mitondra tegna, maontina, mahonon-tegna, matanjaka amin'ny finoana, amin'ny fitiavana, ary amin'ny faharetana. ³ Ôtran'zany kô reo vevavy efa nahazo taona de tokony hampiseho hatraigny ny tegnan-jareo ho tsara fitondran-tegna, fa tsy mpifosa. Tsy tokony ho andevon'ny divay be zareo. Tokony hampianatra ze tsara zareo ⁴ mbô hampiofanana reo vevavy tanora ho tegnate ny vady aman-janagny manokana. ⁵ Tokony hampianatra an-jareo hahonon-tegna, hadio, hikarakara tokantragno tsara, ary hankato ny vadiny zareo. Tokony hagnano an'zany ra daôly zany zareo mbô tsy ho vôheso ny Tenin'Andriamanitra. ⁶ Salan'zany, ampaherezo reo leila mbôla tanora mbô hahonon-tegna. ⁷ Amin'ny fomba daôly de abôgnao ho modelin'reo asa tsara; ary rafa mampianatra anao, de manehoa fahitsiana sy fahamendrehana. ⁸ Milazà hafatra salama sy tsisy tsigny, mbô ho megnatra ze magnohitra n'iza n'iza, satria tsy managna na ino naino ratsy ho lazaina momba antsika izy. ⁹ Reo mpanompo de tokony hankatoa ny tompony amin'ny ra daôly. Hagnano ze sitrapony fa tsy hifamaly amin'azy. ¹⁰ Tsy tokony hifangalangalatra zareo. Fa kosa, tokony hampibôgna ny finoana tsara daôly zareo, mbô hampamendrika ny fampianarantsika momba an'Andriamanitra mpamonjy antsika amin'ny lafiny daôly. ¹¹ F'efa nibôgna tamin'ôla daôly ny fasoavan'Andriamanitra. ¹² Mamianatra antsika handà ny tôtra tsy araka an'Andriamanitra sy ny filàn'zao tontolo zao zany. Mampianatra antsika hiaigna am-pihononana, am-pahamarinana, ary araka ny lalan'Andriamanitra am'zao vanim-potôna zao zany ¹³ akeo am-pendrasantsika fatratra ze handraisantsika ny fanantenaa mafinaritra, ny fibônan'ny voninahitry ny Andriamanitsika lehibe sy Mpamonjy Jesosy Kristy. ¹⁴ Jesosy de nanolotra ny tegnany ho antsika mbô hagnavotra antsika hiala amin'ny tsy fagnaran-dalàna daôly sy hanadiovana, ho an'ny tegnany, ôla raika manokana ze tegna mazoto hagnano asa tsara. ¹⁵ Ambarao ary ento ampaherezina reo ra reo. Magnomeza fanitsina amin'ny faefana daôly. Aza avela hisy ôla hagnano tisy dikany an'nao.