¹ Ary tam'zany andro zany, de nandefa didy ze mibaiko ny hagnisana ny ôla daôly miaigna aketo am'zao tontolo zao Aogosto Kaisara. ² Zany no fagnisam-bahôka natao vôlôny tamin'i Kyrenio no mpanapaka taigny Syria. ³ Noho zany ny ôla daôly de nankaigny amin'ny tanàna niaveny avy mbô hisoratra agnarana ho an'ny fagnisam-bahôka. ⁴ De nande niakatra avy taigny Galilia kô Josefa, avy taigny an-tanànan'ny Nazareta, ho aigny Jodia, tanànan'i Davida ze antsôvina hoe Betlehema, satria izy avy amin'ny tragno sy fianakaven'i Davida. ⁵ Nande taigny izy mbô hisoratra agnarana niaraka tamin'i Maria, ze fofom-badiny ary bevoka. ⁶ Raha mbôla taigny zareo, de tonga ny fotôna hitirany ny zanagny. ⁷ Niteraka zaza lahy izy, zanagny vôlôny, ary izy nampitafy lamban-jaza an'Azy sy nampandry an'Azy takeo amin'ny fihinanam-bilogna, satria tsisy tôrana ho an-jareo takao amin'ny hotely. ⁸ Nisy mpiambin'ondry tam'zany faritra zany ze nijanona taigny an-tsaha, niambina ny andian'ondriny tamin'ny alina. ⁹ Nisy anjelin'ny Tompo nibôgna tamin-jareo, ary ny voninahitry ny Tompo namirapiratra magnodidigna an'azy, ary raiki-tatra zareo. ¹⁰ De nitare tamin-jareo ny anjely nagnano hoe: "Aza matatra, fa hitondra vaovao tsara ze hitondra hafalena gedabe ho an'ny ôla daôly za. ¹¹ Gniany de nisy mpagnavotra ze teraka ho an'nareo aigny an-tanànan'i Davida! Izy no Kristy Tompo! ¹² Zao no famantarana ze amena an'nareo: Hatazagna zazakely mitafy lamban-jaza ary mandry akeo amin'ny fihinanam-bilogna anareo." ¹³ Tampoka takeo niaraka tam'le anjely, de nisy tafiky ny lagnitra lehibe nidera an'Andriamanitra nagnano hoe: ¹⁴ "Voninatra ho an'Andriamanitra aigny amin'ny avo ndrindra, ary hisy fiadanana anie aketo an-tany akeo amin'ny ôla ze ankasitrany." ¹⁵ Ary rafa niala takeo amin-jareo nankaigny an-dagnitra reo anjely, ny mpimbina ondry nikoragna hoe: "Andao tsika zao ho akaigny Betlehema, ary hikaraka zany ra nitranga zany, ze nampahafantarin'ny Tompo antsika zany." ¹⁶ Nande malaky taigny zareo ary natazagna an'i Maria sy Josefa, ary natazagna zazakely nandry takeo amin'ny fihinanam-bilogna. ¹⁷ Tafaran'ny natazagnan-jareo an'Azy, de nampafantarin-jareo ny ra daôly nolazaina an-jareo momba an'io zaza io. ¹⁸ Ze daôly naregny an'zany de tofoka ny amin'ny nilazan'ny mpiambin'ondry tamin-jareo. ¹⁹ Fa Maria kosa nanohy nieritreritra momba ny ra daôly ze regniny, ary nitahiry regny takao am-pony. ²⁰ Niverigna reo mpiambin'ondry, nagnome voninatra sy nankalaza an'Andriamanitra noho ny ra daôly ze regnin-jareo sy tazagn-jareo, araka ze nolazaina tamin-jareo. ²¹ Nony tapitra ny andro fahavalo, rafa noforàna Izy, de namena agnarana hoe Jesosy, le agnarana namen'ny anjely an'Azy talôhan'ny nametrahana an'Azy tao an-kibo. ²² Ary rafa dila ny isan'ny andro notakiana hidiovany, araka ny lalàn'i Mosesy, de nitondra an'azy niakatra ho akaigny an-tempoly tao Jerosalema i Maria sy Josefa mbô hagnolotra an'Azy akeo amin'ny Tompo. ²³ Araka ze vôsoratra akao amin'ny lalàn'ny Tompo hoe: "Ny lahy daôly ze vôlôn-teraka de hatokana ho an'ny Tompo." ²⁴ Noho zany de nagnolotra sorogna araka ze vôlaza akao amin'ny lalàn'ny Tompo zareo, "domohina roey na zanaka voromelala roey." ²⁵ Ary indro, nisy leila taigny Jerosalema Simona no agnarany, ary zany leila zany de marina sy mafana fo. Nikaraka ny fampionognana an'Israely izy, ary takao amin'azy ny Fanahy Masina. ²⁶ Nambaran'ny Fanahy Masina tamin'azy fa tsy hahita fafatesana melôn'ny ahitany ny Kristy Tompo izy. ²⁷ Notaritin'ny Fanahy, nankaigny an-tempoly Simona. Rafa nitondra an'i Jesosy zazakely niditra ny ray aman-dreniny, mbô hagnano an'Azy araka ny fomba akao amin'ny lalàna, ²⁸ de noraisiny ho aigny an-tsandrigny Izy sady nidera an'Andriamanitra ary nagnano hoe: ²⁹ "Am'zao fotôna zao avilao ande am-piadanana ny mpanomponao, ry Tompo, araka ny teninao. ³⁰ Fa ny masoko nahita ny famonjenao, ³¹ ze nomagninao takeo amin'ny agnatrehan'ny ôla daôly: ³² De fazavana ho fagnambarana ho an'ny Jentlisa ary voninatra ho an'Israely ôlonao. ³³ Ny ray sy renin'le zaza de gaga tamin'ny ra nolazaina makasika an'Azy. ³⁴ Nitso-drano an-jareo Simona ary nitare tamin'i Maria reniny hoe: "Indro, ty zaza ty de vôtendry ho amin'ny fandavôna sy fanandratana ny ôlon'Israely maro ary ho famantarana ze nolavina - ³⁵ ary hisy sabatra hanombaka ny fagnahinao - mbô ho vômbara ny hevitry ny fo maro." ³⁶ Nisy mpaminagny vavy raika antsôvina hoe Ana teo. Zanakavavin'i Fanoela avy amin'ny foko Asera izy. Tegna antitra izy. Nipetraka niaraka tamin'ny vadiny fito taona tafaran'ny nahavirijiny an'azy izy, ³⁷ ary nampitondra tegna nandritry ny efatra ambefolo taona. Tsisy niala ny tempoly mitsy izy fa nanompo tamin'ny fifadian-kanina sy vavaka, magnalin'andro. ³⁸ Tam'zany ora zany ndrindra de nagnatona ankeky an-jareo izy ary nagnomboka nagnome fisaorana an'Andriamanitra sy nilaza ny momba an'le zaza tamin'ôla daôly ze nandigny ny fagnavotana an'i Jerosalema. ³⁹ Rafa navita ny ra daôly nasaina nataony araka ny lalàn'ny Tompo zareo, de niverina taigny Galilia, aigny amin'ny tanànan-jareo aigny Nazareta. ⁴⁰ Negeda ny zaza ary nenatanjaka, nitombo fahendrena, ary ny fahasoavan'Andriamanitra de tao amin'Azy. ⁴¹ Ny ray aman-dreniny de nankaigny Jerosalema isan-taona hamonjy ny Firavoravôn'ny Paska. ⁴² Rafa rombefolo taona Izy, de nande nankaigny araka ny fomba fatao amin'ny fety ndre zareo. ⁴³ Ary rafa avy nijanona taigny nandritry ny andron'ny fety manontolo zareo, de nanomboka niverina nody zareo. Fa Jesosy zazalahy nijagnona taigny Jerosalema nefa tsy fantatry ny ray aman-dreniny zany. ⁴⁴ Nataon-jareo fa niaraka tamin'ôla niara-de tamin-jareo Izy, de nande nandritry ny andro ray manontolo zareo. ary avekeo de nagnomboka nikaraka an'Azy taigny am'reo havany sy reo namany zareo. ⁴⁵ Rafa tsy hitan-jareo Izy, de niverina taigny Jerosalema zareo ka nagnomboka nikaraka an'Azy taigny. ⁴⁶ Nony afaka telo andro, de tazan-jareo takao an-tempoly Izy, nitôtra takeo ampovôn'reo mpampianatra, nihaino an-jareo sy nametraka fagnontanena tamin-jareo. ⁴⁷ Ze daôly naregny an'Azy de gaga tamin'ny fahalalany sy reo valinteniny. ⁴⁸ Rafa natazagna an'Azy zareo, de gaga. Ny reniny nikoragna tamin'Azy hoe: "Zanako, magnino ma anao no nagnano ôtran'zao an'nay? Tandrigneso, za sy ny rainao nikaraka an'nao tamina tebiteby." ⁴⁹ Izy nitare tamin-jareo hoe: "Magnino ma anareo no mikaraka Anà? Tsy fantatrareo ma fa tsy maintsy ho akao an-dragnon'ny Raiko Za?" ⁵⁰ Fa tsy azon-jareo ze tieny hotaravina tam'zany teny zany. ⁵¹ De nody niaraka tamin-jareo taigny Nazareta Izy sady nankatoa an-jareo. Ny reniny de nitahiry an'zany ra daôly zany tao am-pony. ⁵² Fa Jesosy ne-nitombo fahendrena sy nitombo tegna, ary nitombo fitia tamin'Andriamanitra sy ny ôla.