¹ Ishi she shitushizya isha Yesu Kilisitu she uMulungu ahamupa uwene ukuvalanjizya avavomvi vakwe zye kwe zivombwe shisita kuhana. Uwene ahashikumusya ishi pakuvatuma avahavizya vakwe ku muvomvi wakwe u Yohani. ² U Yohani ahalisimishizya izwi ilya Mulungu nu lusimishizyo ulwa Yesu Kilisitu, ivintu vyonti vye avivwenyi. ³ Alositwe uno we akuvazya umwakuzuvya amazwi gavukuvwi uvu navala ve vakutejelezya amazwi aga vukuvwi uvu nave vakuzyivwila zye zisimvilwe mumo, mwe pe ahavalilo hapalamiye. ⁴ U Yohani, kuvivanza 7 ivya mu Asiya: uvwila vuve kulimwe numutende uwa kufuma kwa wula we alipo hali, uno we akwinza, nukufuma ku mpepo 7 zye zili pilongolela ilya shitengo isha vu Mwene, ⁵ nukufuma kwa Yesu Kilisitu, we wuhome uwanalyoli, uhatote ukufuma kuvafwe, nu mupiti uwa vamwene ava munsi ino. Ku uno we atukunzite iswe havili we atwefizye iswe ukufuma kumbivi zyitu namavanda gakwe. ⁶ Pe atupezile iswe ukuva shinamwene, vaputi ava Mulungu nu Tata wakwe - ku kwakwe kuve uvushindamu na maha shima na shima. Ameni. ⁷ Yenya, akwinza namavingo; nilyinso lyonti lilimwenya wuyo. Ukusagania navala ve vamulasile uwene. Inkolo zyonti izya munsi iyapansi zililila pamulandu wa wuyo. ena Ameni. ⁸ ''Ine ne Alufa ne Omega,'' ukuyanga uMwene uMulungu, ''Uno we alipo, uno alipo hali, uno we akwinza, uwamaha gonti.'' ⁹ Ine ne Yohani, ne wamwinyu ne wewula we akugavana nimwe mu mayimba na mushinamwene nukuteshela muvujimbilizu vwe vuli mwa Yesu - nali pansungo yikwitwa patimosi pa mulandu wizwi ilya Mulungu nizya lusimishizyo ulwa Yesu. ¹⁰ Ine nali mumupepo pisiku ilya Mwene. Pe nkivwa kunsizi kuline izwi ipiti ngati lisaji. ¹¹ Lihati, ''Usimbe zye ukuzyenya mwakalata, pe utume zyenezyo kuvivanza 7- ku Efeso, ku Similina, ku Peligamamu, ku Tiyatila, ku Saladisi, ku Filadefiya naku Lavodikiya.'' ¹² Pe nkagalunkana nukwenya amazwi gawenu ge gakuyanga kuline. Pe ine lwe nagalunkana nkenya ivwa kutendamishila papo inyale 7 ivya golide. ¹³ Pakasi pavyakutendamishila pali wuwo we ali ngati mwana uwa muntu, azwaye inkanzu intali ye yihafihaga pansi pavinama vyakwe nishalamba isha golide ukuzyungulila ishifuva shakwe. ¹⁴ Itwe lyakwe ninsisi zyali nzelu ngati masepe- ngati mpepo iyamajela- havili aminso gakwe gali ngati moto we akwaha. ¹⁵ Vyope ivinama vyakwe vihamekuhaga ngati shijela , ngati shijela she vashizelufizye mwi lungu, nizwi lyakwe lyali ngati kupoma ukwa minzi aminji ge gakushimbila. ¹⁶ Uwene ali ninzota 7 kunyove yakwe iya ndilo, havili ali nu panga we ahozile kuvili konti ahafumaga mwilomo lyakwe. Nisheni shakwe shihanying'inyilaga ngati lizuva pe lilamile nkani. ¹⁷ Lwe ine namwenya, ine nkagwa pa vinama vyakwe ngati muntu umufwe. Uwene ahaviha inyove yakwe iyandilo paline nukuti, ''Utahanyilaje. Ine ne vwandilo havili ne vumalilo. ¹⁸ Uno we mulanzi. Ine nafuye, ishi yenya, ne mulanzi shima na shima! havili ine ndinimfungulo izya vufwe nizya kuvuzimu. ¹⁹ Ishi lelo usimbe pansi zye wazyenya, izya shinishi, nazye kwe zyinzaje lwe izi zyajenda. ²⁰ Inza she shivwamile she shikusula ivya nzota 7 zye wazivwenyi ku nyove yaho iya ndilo, nivyakutendamishila inyale 7 ivya golide: Inzota zila 7 ve vahavizya ava muvivanza 7, nivyakutendamishila inyale 7 vivanza7.''