¹ Gwigi meeme Poolo ande Timote ande Silasa duya nusonogeene bini bisi Dibundu lu Gidaabisi Nzaama ande Mfumabisi Yesu gu Tesalonigi. ² Nzaama ganu dele mu disi lwana lupimi, ganu dululu midimi mu kuuma Mfumabisi Yesu. ³ Duya mudoonaaga Nzaama hoso daanga mutula ndumu yi lugwigili lubini mu bihene bibiosogo ande guzolo gubini mu mapaana manene manuya sala, ndelunu nwigi mu gubanaga tsili. ⁴ Bisi duya mono kiesi bunuya ganga mudimi mu mabundu ma Nzaama mu kebe ga pasi yiyosogo ande lugwigili lunuya gama ande gudindamana mu gusala gisala gi Nzaama. ⁵ Guya monogo ni numa faana guwingini mu Gimfumu gi Nzaama mutula pasi yinuya mono, ⁶ ginaga Nzaama bugini bawa pasi baada bana baya nuwa bini pasi; ⁷ bini ande bisi bugini du hululusu mu bufugu bwiniya duugu Mfumu Yesu mu tala ande bawanzio mu ngolo yaana, ⁸ mu kebe ga ludimi lu mbawa baada bana bakono guyaba Nzaama ande bana bakono gulabaaga Paana Yipimi yi Mfumu Yesu. ⁹ Duumbu lubini baga biwi lwigi guba tabana mu zwingi lu mbawa yini yikono nsugu ¹⁰ bufugu bugini yafudugu mu mugieme ande baada bapimi, bana bamu guumunu mu gimbangi gibisi mu kebe gabini. ¹¹ Ndelunu duya nusameene hoso daanga ni Nzaama ganu gidili baada bana bama digi pimi ya misi miana, gagugusu mapaana magaya nuzoleene mu gusala mu ngolo yaana mu kebe ga lugwigili lubini ¹² mutulu kuuma-Mfumabisi Yesu yilumu mu kebe gabini, bini se nulumu mu guzolo ande kiene yaana mu kuuma-Mfumabisi Yesu.