¹ Paulu, nkole ya Kisto Yisu, ye mpangi Timoteo, kua Filemoni mpangi eto ya nzolua ye ntuadi mu nisalu, ² Kua Afia busi kieto, kua Alicipo ntuadi mu salu mu nkindu, ye kua dibundu di kutakananga muna nzo aku, ³ Bika nlemvo ye luvuvamu biatuka kua Nzambi se dieto ye kua mfumu Yisu Klisto bia kala mu yeno. ⁴ Ngi tatamananga tonda Nzambi. Ngiku banzilanga mu tusambulu tuame. ⁵ Ngia zayikusua mu zola kuaku ye minu biena yaku mu mfumu Yisu ye kua minkuikizi mia mio. ⁶ Ngieti sambila vo kintuadi kia minu kiaku kia kala kialunga mu nzayilu yayo ya lekua bia mbote biena mu kati kua yeto mu Klisto. ⁷ Kadi ngiena ye kiese kiayingi ngolo munlemvo wa zola kuaku, kadi mintima mia minkuikizi mia kala mia siamusua kua ngeye. ⁸ Idina, mpeleko ngiena ye kibakala kia kiakio mu Klisto mu kuvana luve musala momo mamo mafiti sala, ⁹ Muankitu, mudiambu dia zola, ngieti dio kulomba (mono, Paulu, mbuta muntu, ye wawu nkole mu Klisto Yisu). ¹⁰ Ngieti ku vana nsikudukusu landila muana ame Onesimo, wu ngia wutila mu mbienga. ¹¹ Kadi mu ntangu ya vioka yani kakala mfumu ko, kansi wawu, wena mfumu kua ngeye ye mono. ¹² Ngia ku fidisi yani, yeni wena wa ntalu mu ntima ame. ¹³ Ngieti banzila mu ku nlunda kuaku va ngiena, mpasi vo kalenda ku nsadisa vafulu kiaku mu ntangu yayi ngiena mu mbienga mu diambu dia nsamu wa mbote. ¹⁴ Kansi, kia zolele dia vanga ko kondua kua teka zaya mabanza maku. Kiazolele mpe ko ku komikina ko mu kumpatila mambote maku, kansi mu luzolo luambote. ¹⁵ Nanga yi munzila yoyo ka vambanana ye ngeye mu fintangu, kidi wa mona mu lumbu ya yonsono. ¹⁶ Kena kala diaka nkole ko, kansi lutila nanga, mpangi yatoma zolua. Yani kua mono mpangi za nzolua sungula mu mono, ye wena wolutila ngeye, mu kimuntu ye mu mfumu, ¹⁷ Ye wowo, vo ngeye wena bonso ntuadi yame mu salu, wuntambula bonso mono. ¹⁸ Vo wa sedi nkombo kua ngeye ye vo kuvutudila kionso kionso kima, tula kio mu ntu ame. ¹⁹ Mono, Paulu, ngiena sonika mama mu kuame koko: Siya ku vutudila kio. Kizolele kamba ko vo ngeye ku fiti kumuana moyo aku. ²⁰ Inga, mpangi, wu mpana lusadisu mfumu; vana mvundulu mu ntima ame mu Klisto. ²¹ Yi mu vuvu mu ntumumunu aku ngieti kusonikina. Nzeyi vo siwa sala nkutu malutidi momo mangi kulombele. ²² Va kimosi wu nkubikila suku dia seka dia kuzulu, kadi ngieti banzila vo mu nzila tusambulu tueno mono ngina yambulua mu yeno. ²³ Epafala, ntuadi yame mu boloko mu Klisto Yisu, wuku veni mbote, ²⁴ Mpilamosi mpe Malako, Alisate, Damasi, ye Luka mpangi zame ntuadi mu salu. ²⁵ Bika nlemvo wa mfumu eto Yisu Klisto wa kala mu mpeve eno. Ameni.