¹ Ku Lodi kinunu ku. bunkaka, wunzangula bonsu nde wuna tata. zangula matoku bonsu nde bawu bena bampangi. ² Zangula bakentu bakola bonsu bangudi, bawu bena bandumba bonsu mbangi babakentu mu vedila kuaku. ³ Zitisa mafola ma bakentu, mafola makedika. ⁴ Kansi go fola dina ye bana ata batekelo, balonguka nteti nteti mu gana nzitusu ma familia ma bawu kibeni. bavutudila buawu ku bibuti biawu,kadi buna buyangidikanga Nzambi. ⁵ Fola dikedika wukalanga yani mosi. wutalanga minu kiyani mu Nzambi. wukalanga bilumbu biakulu mpimpa ye muini mu ndombolu ye bisambu. ⁶ Bunkaka nkentu yuzinganga mu kiesi wukifuila kani nde wuna diaka mu luzingu. ⁷ Ye wubasila mambu mana mpasi bakala kondua lusembu. ⁸ Go yumosi kena ye zitu ku diyani kibeni ye mu nkala kibeni kibana ba familia diyani kibeni,wutunini lukuikulu ye wuna wumbi lutila nkuikisi mosi. ⁹ Kadi nkentu mosi mpasi kasonama bonsu fola kakadi kunsi mvu makuma sambanu ku ye kakala nkentu wu yakala dimosi. ¹⁰ Kafueti zayakana mu mavanga mayani ma mboti, kani nde kala mavanga, ata wutambula zitu ku bana, wutambula banzenza, sukula malu ba minkuikisi, sadisa bamanionga ata funtukisa vangu diodio di mboti. ¹¹ Kansi mafola ma bandumba, menga mu kubasonika ga lukaya lu ndandani zi nkumbu kadi ntangu si bakigana mu biesi bikinsuni mu luyinunu lu Klisito, bazoledikuelulula kuawu. ¹² Kunsuka, bakulanga mvangi mi mambi kadi bameni bunga nguisani zibawu zinteti. ¹³ Bakigananga mufu diaka ki mayalala. bayanda nzo ka nzo ye nkatu kaka bakumanga mayalala, kansi diaka bakumanga ngolomoni ye ma nsiesi. bagoganga mambu mo kabalendi ta ku. ¹⁴ Nzoledi nde bakentu bandumba ba kuela diaka, bavua bana, batuadisa nzo mpasi kabagani ku kinsuza kimosi ku mbakani mu kutufunda butumeni ganga mambi. ¹⁵ Kadi bankaka mubawu ntama kala babalukidi mu landa satana. ¹⁶ Go nkentu mosi wakulu munkuikisi wuna ye mafola, kabasadisa mpasi nde dibundukadi kadi di zungidila ku nzi zitu ye dilenda sadisa bawu bena mafola makedika. ¹⁷ Bambuta bo batuadisanga mboti bamonika banzitusu mu nzitusu miodi, sungula bo basalanga ye ngogu ye mu ndongolu. ¹⁸ Kadi masonu matedi:« ku lendi yambula ku madia ma bana ma bantu ngombi kafula mawu ga ntotu» ye,« kisadi kifueni ye mfutu yani.» ¹⁹ Kutambudilani ku mfundu mu tinguna mbuta mosi kondua ku zimbangi zodi ata zitatu. ²⁰ Bela mvangi mi masumu ga ntadisi bakulu, mpasi nde bankaka bamona wonga. ²¹ Ngita kugana lutumu mu ngogu ga ntuala Nzambi ye ga ntuala Klisito Yesu ga ntuala zimbasi basolua mu kenga ntumunu kondua ku kolama ye mu konda ganga ma bundengo. ²² Kutulani moku ku ku muntu. kukalani ye mvangi mi masumu ku. ufueti kikenga wuvedila. ²³ Kulendi nua diaka masa ku. bunkaka, feti nua fi malafu finduelu mukuma ki lukutu lungeyi ye maladi maku ma kie kie. ²⁴ Masumu ma bankaka bantu mamonikanga ye ma bagitilanga ku mfundusu. ²⁵ Kansi mankaka masumu malandanga ku ntuala. bumosi, mankaka mavanga ma mboti mamonikanga kansi kani mankaka ka malendi suekama ku.