¹ Petelo, ntumua Yesu Klisto, ku banzenza batiasukunu, basolama, mu bimvu, Ngalatiya, Kappodoka, Aziya ye Bitini. ² Bonsu ngangu zi Nzambi Tata, mu mbuekolu mu tumama ye mbuangusu menga ma Yesu Klisto. bika nlemvu wukala ye benu ye bika ngemba benu yizala. ³ Bika Nzambi ye Se di Mfumu betu Yesu Klisto kasakumuka. mukiadi kiyani, wutugana ngutuka yimpa mu kivuvu kidifua. difua diodini dinina mu nzila lufulukulu lu Yesu Klisto mu bafua. ⁴ Yoyani difua kakilendi fua ku, kansi dibaka mvinduku ye yuma. diodini diluekukedi mu mazulu. ⁵ Ngolu zi Nzambi zita lukenga mu lukuikulu lubenu, mu luvulusu luna lukufi mu kusengumuka mu ntangu nsuka. ⁶ Nuta yangalala mu momuini, kani buna bungangi mfunu mu kumona kiadi mu nsisani zimpila mu mpila. ⁷ Bobuini buna musande lukuikulu lubenu lumekama, lukuikulu loloni luna lu ntalu luta luawu kalufua ku kani bamekeni luawu mu tiya. momuini mu kulumukina bumesedi mpasi nde lukuikulu mu baka ndandu kusanisina, nkembu ye nzitusu wungisa Yesu Klisto. ⁸ Kanlumona ku, kansi nlunzola. kaluta kumona ku bungangi, kansi lutakunkuikidila ye lutatuadusua ku kiesi kilendi suka ku ye nkembu. ⁹ Bungangi lutambuedi bonsu ndandu lukuikulu luyani, mpulusu moyu benu. ¹⁰ Mpulusu yoyoni ye nlemvu wowoni wulusuekukila, luganga kikuma ki kusosa ye mutoma sosa diaka ku mimbikudi. ¹¹ Busosedingi muzaya mu kikuma kinani ye ntangu Mpefi Yesu mu bawu yibagogedingi. buna mana malutidingi tekila ma mpasi ma Klisto ye minkembu mio miyani mikuisa kunima. ¹² Babasengumukisa nde basadidi ku bawu mosi, kansi benu, ntangu bagogedingi mambu momuini balutela bungangi ku bawu balulonga nsamu mboti mu Mpefi yi Nlongu yifidisua ku zulu( mambu momayani mbasi kazola tubila ntadulu yoyiyani.) ¹³ Buna, lukubama. lukiyangidika mu makulu. lukala ye vuvu kilunga mu nlemvu si wulunatukina mu ngisulu Yesu Klisto. ¹⁴ Bonsu bana batumama, kalukifuanikisi ku mu nzola zi lulanda ntangu lukala mu bumputu. ¹⁵ Kansi bonsu yoyuani wu lubokila wuna wunlongu, benu diaka, lukala banlongu mu ndiata zibenu zakulu. ¹⁶ Kadi busonama:« lukala banlongu, kadi munu mosi wunlongu ngina.» ¹⁷ Ye go lubokedi« Tata» yoyuani wuta fundisa konda kutula muntu kingenga ye bonsu mavanga konsu muntu, lulutisa ntangu nkangulu benu mu kumbanga. ¹⁸ Luzeyi nde ka mbongu ku ata wola lubolanga lusumbulu mu ndiata benu yi mpamba lulongukila ku mase mabenu. ¹⁹ Go kabuaku, lusumbuka mu menga ma ntalu ma Yesu wukala bonsu muana memi wukonda kieta ata lusembu. ²⁰ Yesu wukisolukila tekila ntululu lufulu lu nza, kansi bobuani, mu yuna ntangu nsuka, yilusengumukina. ²¹ Lukuikilanga Nzambi mu yani, wumfulukisa mu bafua ye ku yuna kasila nkembu musande lukuikulu lubenu ye luzolu lukala mu yani. ²² Luvedisa mioyu mibenu mu ntumumunu ku kedika. loluyani yiluzolu lu kimpangi ye kedika, luzala kibeni mu ngolu benu ye benu mu ntima benu wakulu. ²³ Lubutulu diaka, ka mu mbongu yifua ku, ma mu mbongu yikondanga kufua mu landila ngogu luzingu ye landilanga kaka wu Nzambi. bukafinama, kafingidi ku mu mvutulu. buka mueningi mpasi, ka nuanisi ku mu mvutulu, kansi wukiyekudingi ku yuna wufundisanga mu mfundusu yilunga. ²⁴ Kadi« nsuni wakulu wufuaneni ye titi, ye nkembu yani wufuaneni ku kintutu ki kititi. kititi kiyumini ye kintutu kibuidi. ²⁵ Kansi ngogu Mfumu wuzinganga lumbu biakulu.» yo wuna nsamu wumboti si luzayikisa.