¹ Lero echimanyiso chirhali chigeke chalangikan' omu chanya, omukazi oyambere ezuba n'omwezi oku magulu gage n'echilundo ch'ekununu ekumi n'ebiri okw'irhwe lyage. ² Aliri bukule bukulu eri anali ayunv'emikero y'okuburha. ³ N'echindi chimanyiso cha bonekan' omu chanya; empirijoka eshushire nka muliro, ya marhwe mushanvu na mahembi ekumi na bibandano mushanvu okw'irhwe lyayo. ⁴ N'ehunga lyayo eri liri labulula echichira cha gasharhu ch'enkununu z'omuchanya, lyanazikweba omu gulu. Eyo mpirijoka ya yumang'emalangambere g'ola mukazi waliri omu kasanzi k'okuburha, yalingiriz'okw'aburha emuly'omwana. ⁵ Oyo mukazi ayinji burh'omwana w'obuzana, oyola ye wayinji yabul'engabo n'ehikoni hy'echuma; n'oyo mwana njahekw'emweshe oku ntebe yage y'obwami. ⁶ Nyamukazi ahekw'omu mpinga, ashimana Nyamuzinda amurheganyize ahantu abera n'okuliswa siku chihumbi na magana mabiri na makumi galindarhu. ⁷ Hazuk'entambala enyanya: Mikaheri na bamalayika bage balwis'empirijoka. Empirijoka nayo yalwisanyaga na bamalayika bayo. ⁸ Bahimwa banahez' ahabakeberer'omu mpingu. ⁹ Ela mpirijoka, njoka ya mira, eyibahamagala Ndyalya, mpu ye Lyangombe, olala oshumik'egulu lyoshi, bamukwemba omugulu, bamukulikiza n'abamalayika bage. ¹⁰ Nayunv'omulenge gunen'enyanya, gwaderha mpu: ler'obuchire, n'obuhashe, n'obwami bwa Nyamuzinda werhu, n'oburhegesi bwa Kristu wage bwa mayinja! Bulala olezi wa beneberhu, akabwirwe ahashi wakazaga abesherabo ngasi mango emwa Nyamuzinda ezuba n'obudufu. ¹¹ Bahim'empirijoka eyi shagama y'omwana-buzi n'emyazi y'obuhamiriza bwabo, barhanasimire amagala gabo kuhik'okufa. ¹² Chechirhumire mw'empingu mushagaluke, n'enyu mwe mulamire omu mpingu. Buli buhanya oku chihugo n'oku nyanja nene ! Bulala Lyangombe ayandagalir'emunda muli, anayujulirene burhe bunene, si bulala agwerhe kasanzi kageke ¹³ Empirijoka ery'ebona bayikabwir'omu chihugo, ya shimbulira olala mukazi wa burhag'efula ya Lulema. ¹⁴ Nyamukazi ahabw'ebyubi bibiri by'enyuda nzibuzibu yagala burudukir'omu mpinga, ahantu aliswa kasanzi, ebichanji n'echichira ch'akasanzi, hale n'oyo wanjoka. ¹⁵ N'omu bunu bw'eyo njoka mwashulul'amenji nka nyanja nzibuzibu enyuma ly'oyo mukazi mpu emusule. ¹⁶ Aliko edaho ly'alamira nyamukazi, lyamirungusa lula lwinchi lunene lwa shululaga omu bunu bwela njoka. ¹⁷ Eyo mpirijoka yagaya nyamukazi, yabangula yajilwis'abaliyorhere oku barhengag'omu nda yage, balala bakeng'amarhegeko ga Nyamuzinda, banagwerhe n'obuhamiriza bwa Yesu. ¹⁸ Nantyo ya yumang'eshi y'enyanja.