¹ Oku chimanyisa kwa Yesu-Kristu, akuhabwaga na Nyamuzinda omu kuyerek'abakozi bage ebintu bikwanene okuba biri hofi, n'oku biyerekana, omu kurhuma Malayika, emwa'omukozi wage Yohana. ² Naye ye wayinjaga kuhamiriz'omwazi gwa Nyamuzinda n'obuhamirizi bwa Yesu Kristu, oku byoshi abwene. ³ Ragi lyowa soma n'owa yunva emyazi y'obu bulebi, akana bishimba oku biyandikirwe mwo! Bulal'amango g'akola gali hofi. ⁴ Yohana oku Mashengero mushanvu gali omu Aziya: Olukogo n'omurhula mubihabwe n'olal'oliho, waliliho, njinabaho, nela myuka mushanvu ebera embere z'entebe yage, ⁵ n'oku lunda lwa Yesu-Kristu, muhamirizi mwimana, mwana murhanzi omu bafire, na mwami mukulu w'abami b'egulu! olala orhusima, owa rhukulaga omu byaha byerhu kugerera eshagama yage, ⁶ n'oku rhuha obwami, n'oku rhujira bambali ba Nyamuzinda Eshe, ahabwe obukuzwe n'obuhashe emyaka n'emyaka! Amina! ⁷ Lolaga, ayinjire haguma n'ebichu. Na ngasi lisho nji lya mubona, chiro n'abamubandag'echumu; n'amashanja g'egulu goshi gamulakira. Nechi. Amina! ⁸ Nyono Alfa na Omega, kwo ku Nahano Nyamuzinda aderhe, oliho, owaliriho, n'olala wayinja, ogala-byoshi. ⁹ Nyono Yohana, mwene wenyu, oshangira nenyu amalibuko n'obwami n'oku komera omu Yesu, nabere omu chizimba chihamagalwa Patimosi, enyanya w'omwazi gwa Nyamuzinda n'obuhamirizi bwa Yesu. ¹⁰ Nali yunjwizwe Muka olusiku lwa Nahano, n'oku yunva emugongo gwani omulenge gunene, guli nka mulenge gw'omushekera, ¹¹ gwa derha: Ebi wabona, obiyandike omu chitabu, ona birhumire aga mashengero mushanvu; Efeso, Simirna, Pergamo, Tiyatira, Sardi, Filadelfiya na Laodikiya. ¹² Na chi hindamukire mpu ndole ogw'omulenge gwa nderhesaga. N'oku buzinda nabere na mahindamuka, nabona binara mushanvu by'ehoro, ¹³ n'omu garhigarhi k'ebyo binara mushanvu, nabona oshushire mwene-omuntu, ayamber'echishuli, azonzeze n'omukaba gw'ehoro omu chifuba. ¹⁴ Erhwe lyage n'enviri zage eri biri byeru nka bwoya bwa chibuzi cheru, nka lubula; amesho gage gali nka ngulumira ya muliro; ¹⁵ amagulu gage galishushire omulinga omu chibeyi, n'omulenge gwage gwa liri nka lwamo lunene lwa menji. ¹⁶ Ali gwerhe omu kuboko kwage kw'amalyo nyenyezi mushanvu. Omu bunu bwage mwarhenga engorho eshongwere, ya moji mabiri; n'amalanga galiri nk'ezub'amango lya kolaga bwenene. ¹⁷ Amango nali bonaga, na kumbagala oku magulu gage nka mufu. Ampeba kw'okuboko kwage kwa malyo aderha: Orhayubahaga! Nyono nye Murhanzi nye na Muzinda, ¹⁸ nye n'akalamo. Nali na fire; lero nyono, nkalanzene emyaka n'emyaka. ngwerh'efungulo z'olufu n'ez'e kuzimu. ¹⁹ Yandika byoshi wabwene, n'ebiriho, n'ebya yinja ebuzinda w'ebyo, ²⁰ ehwe lya nyenyezi mushanvu wa bonaga omu kuboko kwage kw'amalyo, n'ebinara mushanvu by'ehoro. Nyenyezi mushanvu baba malayika mushanvu ba mashengero, na binara mushanvu mashengero mushanvu.