¹ Yesu arheng'omu shengero, achigendera, abegirizwa bage bamuyereka obumbake bw'eshegero. ² Ababwira: ka mubwen'ebibyoshi? Mbabwirir'oku binali, harhakayorh'ebale oku lindi lirhahenyezwe.

³ Ayikala oku musozi gw'e Mizeyituni. Abegirizwa bage bamugendera bonyine bamubwira: Orhubwire mangochi ebila byaba nachichi chimanyiso ch'okuyinja kwawe n'echobuzinda bw'egulu?

⁴ Yesu abashubiz'ababwira: Mulole nji mwakarhebekwa n'omuntu. ⁵ Bulala banene nji bayinja oku zino lyani n'okuderha: Nyono nye Kristu; nji barhebek'abantu banene. ⁶ Nji mwayunva baderha engani y'entambala n'okuderhwa kw'entambala; mulole murhayubahaga bulala nji byahika; alik'obuzinda burhaza hika. ⁷ Echihugo nji chalwa n'echindi n'obwami nji bwalwa n'obwami nji haba hantu hanene enzara n'emisisi y'egulu. ⁸ Ebibyoshi nji gwaba murhondero gw'amalumwa. ⁹ Nantyo nji babahan'oku malibuko, nanji babayirha; na nji mwashombwa n'abantu boshi enyanya ly'ezino lyani. ¹⁰ Nantyo banene nji basirhala n'okulegana n'okushombana. ¹¹ N'abalebi banene b'obubeshi nji bayimanga n'okurhebeka bantu banene. ¹² Nabulal'obubi nji bwaluga, obuzigire bw'abantu banene nji bwakeha. ¹³ Alik'owunji walembera kuger'okubuzinda nj'achunguka. ¹⁴ N'ogu Mwazi Gwinja g'obwami nji gwayigirizw'omw'igulu lyoshi gube buhamiriz'oku bantu boshi; n'enyuma zah'obuzinda bwana hika.

¹⁵ N'amango mwabon'obubi bugayisize bwalebagwa n'omulebi Danyeri bukayinj'ahantu hachesebwa (olal'oliwasoma ahir'omwirhe), ¹⁶ N'abola bali e Yudeya balibirhir'oku misozi; ¹⁷ N'oli oku nju arhayandalaga kurhol'ehintu omu nju; ¹⁸ N'oli omwishwa arhagalukaga kurhol'emyambalo yage. ¹⁹ Alako buli buhanya oku bakazi bali bukule, n'ali bayons'ezo siku! ²⁰ Muheme oku libirha kwenyu nji kurhabaga ebihe by'emboho, chang'olusiku lw'e Sabato; ²¹ bulala nji hab'amalibuko manene, okuntu birhasagiba kurheng'egulu lilemwa, chiro birhakanachiba. ²² Nank'esiku arhazikehyaga nta muntu wankachungukire; alik'ezo siku za kehezw'enyanya z'abalondwerwe. ²³ N'amang'omuntu njo babwira: Talag'oku Kristu ali hano changw'erira; murhayemeraga. ²⁴ Bulala bakristu banene bw'obubeshi nji bayimaga, n'abalebi bw'obubeshi nabo nji bayerekan'ebimanyiso bikulu n'ebisomezo nankabyakashoboka barhebek'abalondwerwe. ²⁵ Talag'oku namalire kubahanul'embere. ²⁶ Nantyo, eri bakababwira mpu ali omwirungu, murhajagayo, mpu ali omu busika murhayemeraga. ²⁷ Bulala nkakul'omubaraganyo gurhenga ebushoshokero bw'ezuba gubonekan'emaluhukiro; nantyo oku yinja kwa Mwen'Omuntu nji kwaba. ²⁸ Bulal'ah'omufu gulyamire, hebinyunda bilundikana.

²⁹ Alik'okuliguma obuzinda bwamalibuko, ezuba nji lyaba mwizimya, n'omwezi nji gurhakoleza, n'enyenyezi nji zamanuka kurheng'empingu n'emisi y'empingu nji yadirhimana; ³⁰ Nantyo, echimanyiso cha Mwen'Omuntu nji chabonekan'omu mpingu; n'ebihugo byoshi by'omw'igulu njibyalaka, Nabo nji babona Mwen'Omuntu amanuka arheng'omu bichu by'empingu haguma n'emisi n'obukuze bwage bunene. ³¹ Naye nj'arhuma bamalayika bage n'omulenge gunene g'omushekera nabo nji bahira haguma abalondwerwe kurhenga mpand'ene z'egulu.

³² Muchiyigirize ogu mugani g'omurhi: amango omurhabi gwage eyigushisha n'oku lerh'ebibabi, mwanameny'okw'amango g'ezuba likali gali hofi; ³³ nenyu ntyo hano mubon'ebyo byoshi mumanye okw'ali hofi chiro n'oku lunvi. ³⁴ Okuli mbabwirir'okunali eri burha lirhakagera neyi myazi erhahikire. ³⁵ Empingu n'egulu nji byagera alik'emyazi yani erhakagera. ³⁶ aliko nta muntu oyinji emyazi y'olo lusiku changw'ako akachanji chiro na bamalayika bali mpingu chiro n'Omwana chi Darha yenyine. ³⁷ Bulala nk'oku byabaga oku siku za Nuhu, nantyo kunji byaba omu kugaluka kwa Mwen'Omuntu. ³⁸ Bulala nka mwezo siku embere z'echihonzi balemaga balya n'oku nywa, bashaba n'okushabwa, kuger'olusiku Nuhu ajag'omunkuge, ³⁹ Nabo barhamenyag'olusiku echihonzi chayinjaga n'oku bamalisa boshi; Nantyo kunji byaba olusiku lwa Mwen'Omuntu. ⁴⁰ N'obola bantu babiri nji bab'omwishwa, mugum'arholwe n'owindi anayorha; ⁴¹ bakazi babiri nji baba balibasha; muguma njarholwa n'owindi anayorha. ⁴² Aliko mulole bulala murhenji olusiku Nawenyu njahika. ⁴³ Aliko mumanye ogu mwazi, nkanin'enju amenyeg'amangw'echishambo chankayinja akalangire arhakalere nju yage yarhulwa. ⁴⁴ Okuntyo muchirhegule bulal'omu kachanji murhamenyire Mwen'omuntu anayinja.

⁴⁵ Kand'inde oli muja mushinganyanya n'owobwenge, nahamwabo amulekere enyanya z'enju yage, okuh'abantu ebiryo oku kachanji kabo. ⁴⁶ Liri ragi lyoyo muja nawabo nja shimana aly'akola akasi kage bwinja. ⁴⁷ Okuli mbabwirire mwabo, nja mujira murhambo w'ebintu byage byoshi. ⁴⁸ Alik'ola muja mubi anaderh'omu murhima gwage: mpu nahamwerhu alegamire; ⁴⁹ Anarhonder'okushurh'ababo baja n'okulya n'okunywa haguma nabarhamizi; ⁵⁰ Nahano woyo muja nja yinj'olusiku n'akachanji arhenji, ⁵¹ nja namucha bichirabichira, n'omuhirir'oluhembo haguma nabahwinja, eyomunda nji kwaba kulira n'okuhekeny'amenyo.