¹ Omu chitabu ch'embere, wani Teofili, na derhere byoshi ebi Yesu ajirire anayigiriza kurheng'embere. ² Kugera olusiku arheremerag'empingu, amali yigiriz'entumwa achi shogaga oku misi ya Muka Ochere. ³ Ebuzinda bokulagana nabo, kandi achiyerekan'okwazene omu kubayerek'ebimanyiso binen'ajirire siku makumi mane ababonekera n'oku bashambalira eby'obwami bwa Nyamuzinda. ⁴ Aber'ali haguma nabo ababwira mpu barharhengag'omu Yerusalemu, S'aliko balindireyo ech'eshe abalaganyaga, Kula nababwira: ⁵ Bulala Yohana akazagi batiza na menji, s'aliko mwabo, omu siku zigeke mwa batizwa na Muka Ochere. ⁶ Eri baba bali haguma bamudosa ntya: Nahano, kabuno y'okala washubi yimanz'obwami bwe Israeli? ⁷ Abashubiza: karhali kasi kenyu oku many'esiku n'amango Darha yenyine achishogere oku buhashe bwage. ⁸ Aliko Muka Ochere abayandagalira, abah'emisi y'enyanya; nantyo mube bahamiriza bani omu Yerusalemu n'omu Yudeya yoshi n'omu Samariya, nakuhika ah'egulu lihikire. ⁹ Eri amali derha ebyo binwa bamu bona amanamana omu chanya, echichu chamushukira, barha chimubonaga. ¹⁰ Eri baba balibamulola bwenene okw' ali agenda omuchanya, babona balume babiri bayamber'emishangi y'omweru ababonekera, ¹¹ baderha: Mwabo bantu b'e Galilaya, chirhumire mwayimanga n'okulol' empingu? Oyu Yesu obarhengeremo, oku mubwene arheremer'empingu ntyo kunja nagaluka. ¹² Oku handi barhenga ebw'elala ntondo y'e Mizeyituni, bashubir'e Yerusalemu, eyo ntondo erhali hale n'e Yerusalemu: bwakaba bule bw'enjira y'e Sabato. ¹³ Eri bahika omu lugo bachijira omu busika bw'enyanya; omu bakazagi bera; Baliri Petero, Yohana, Yakobo, Andreya, Filipo, Tomasi, Bartolomayo, Matayo, Yakobo mwene Alufayo, Simoni w'e Zeloti, na Yuda mugala wa Yakobo. ¹⁴ Boshi baliheber'emirhima haguma bakazi huna buzira kuhusa. Bowe n'abakazi balirimo, haguma na Mariya nyina wa Mwami Yesu, na bene babo. ¹⁵ Mwezo siku, Petero ayumanga ekagarhi kabo, echo chigusho chaliri ch'abantu egana na makumyabiri ababwira: ¹⁶ Bene berhu ,kwali kwanene bihikirir' ebyaderhwagwa Na Muk'Ochere, omu mandiko kugerer'obunu bwa Daudi oku Yuda wachijiraga chirongozi cha balala bagwarhaga Yesu. ¹⁷ Aliri muguma werhu, anali gwerhe nay' echigabi omu bukozi bwerhu. ¹⁸ Oyu muntu, aber'agul'eshwa n'oluhembo lw'obunizi agwir'enda ahashi, yabereka amala gashandala. ¹⁹ Oko kwa manyikana n'abantu boshi b'e Yerusalemu, kwa rhuma bayirik'eri shwa Hakelidama, k'okuderh'eshwa ly'eshagama. ²⁰ Nabyo biyandikirwe omu chitabu ch'enanga: mpw' ahamwage habe biguka habule n'omuntu wankahalama! N'echikono chage owindi achirhole! ²¹ Gusiga ku kwanene mwab'abantu boshi barhuherekeze amango goshi Nahano Yesu alilamire haguma nerhu, ²² kurheng'oku bubatizo bwa Yohana kuhik'olusiku arhurhengagamo, harhenga muguma aba muhamirizi w'okufuka kwage. ²³ Balerha babiri, Yosefu wakazagi derhwa Barsaba wayirikagwa Yostu na Matiya. ²⁴ Oku handi bashenga Nyamuzinda : Nahano, weyinji emirhima ya boshi yerekana nd' ochishogere mwaba bombi; ²⁵ Okubundi ahabw'echigabi m'ogu mukolo, na m'obu bukozi Yuda alekaga omukuj' ahage. ²⁶ Bayesh'esimbi zarhogera Matiyasi bamuyongera kuzira ntumwa ekumi na nguma.