¹ Rhuyinj'okw'akaba lino hema rhulamirem'okw'igulu lishashanyukire, rhugwerh'enju omu mpingu eyeri kasi ka Nyamuzinda, enju y'esiku n'amango erhakolwaga n'efune z'omuntu. ² Kandi rhunalibuka mulino hema, rhulirhwalonza kuyambis'enju yerhu y'empingu, ³ Rhukola rhwabonekana rhuyambere na rhurhali butambara. ⁴ Bulala rhuchiri mw'eri hema, yirhwakuma, rhulibukire, arhali okuba rhulonzeze, aliko rhurhachikulaga k'oluhu, s'aliko kuyambala, y'ogo g'okufa kumirwa n'ogw'akalamo. ⁵ N'owarhukulaga kw'ebyola, ali Nyamuzinda warhuher'echikinja cha Muka. ⁶ Rhuyunjwire munihiro ngasi mango na rhunayinji kw'okuber'omu mubiri rhuyorhere hale na Nahano. ⁷ Bulala rhulambagir'omu njira y'obwemere s'arhali omukubona. ⁸ Rhuyunjwilire omunihiro na rhunalonza kurhenga m'ogu mubiri rhujibera haguma na Nahano. ⁹ By'ebirhuma rhumusimisa changwa rhurhenge mw'ogu mubiri changwa rhubere mw'ogu mubiri. ¹⁰ Bulala birhuhemere okubonekan'embere z'olubanja lwa Kristru, yibuli mugum'ahembwa kukulikira n'ebinja changw'ebibi akoler'achiri omu mubiri gwage. ¹¹ Rhuchimeny'obuba bwa Nahano, rhunalonz'okuyunvis'abantu; Nyamuzinda arhuyinji, na nihir'oku omu nkengero zenyu murhuyinji. ¹² Rhurhachihamirize kandi rhwenyin'embere zenyu, s'aliko rhubahere akachanji k'okuchisimisa enyanya zerhu, yimugala kushubiza ku balala bachikuza enyanya z'ebibonekan'embuga birahli omu murhima. ¹³ Ery'akaba nahezez'obwenge; biri bya Nyamuzinda; n'akaba ntahezez'obwenge, liri ragi lyenyu. ¹⁴ Bulala obwira bwa Kristu yibwa rhulibisya, bulala rhubwene oku, akaba mugum'afirire boshi, k'okuderh'oku boshi b'afire; ¹⁵ n'okw'afirire boshi, y'abali balama barhachilamaga oku bonine, s'alik'oku w'afire enyanya zabo. ¹⁶ Nantyo, kurhenga buno, rhurhayinji omuntu kukulikiz'omubiri, n'akaba rhwamenyere Kristu kukulikiz'omubiri, bunola rhurhachimuyinji ntyo. ¹⁷ Ery'omuntu akaba omu kagarhi ka Kristu, ali chiremwa chihyahya. Ebintu bya mira by'agerere; lola, byoshi byamaba bihyahya. ¹⁸ N'ebyo birhenger'emwa Nyamuzinda w'arhunywanisize haguma naye kugerera Kristu, anarhuh'akasi k'okuyunvisikanya. ¹⁹ Bulala Nyamuzinda aliri omu kagarhi ka Kristu, ayunvisikanyisa egulu na yenyine, buzira kuganjir'abantu amabi gabo, anarhuhira mw'omwazi g'obunvikane. ²⁰ Rhukola ntumwa za Kristu, nk'oku Nyamuzinda anahanula kugerera rhwabano, rhubahemer'okuzino lya Kristu: Muyunvikane na Nyamuzinda! ²¹ Orhashubaga kujir'echaha, omuheseze emizigo y'ebyaha byerhu yirhub'omu kagarhi kage okunali kwa Nyamuzinda.