¹ Paulo, Ntumwa ya Yesu Kristu oku bulonza bwa Nyamuzinda na mwenewabo Timoteyo, oku shengero lya Nyamuzinda liri e'Korinto, n'okubachesebwa boshi bali e'Akayi: ² Muhabwe obonjo n'omurhula gurheng'emwa Nyamuzinda Darha werhu n'emwa Nahano werhu Yesu Kristu. ³ Agishwe Nyakasani, Eshe wa Nahano Yesu Kristu, Darha w'obubabale n'okurhuliriza koshi, ⁴ orhurhuliriza omu malumwa gerhu goshi, bulala, kugerera aga malumwa rhuli chintu omu bigabi bya Nyamuzinda, rhugale kurhuliriza abali omu malumwa! ⁵ Bulala nk'okw'amalumwa ga Kristu galugire omu kagarhi kerhu, nantyo oburhulirizi bwerhu bwaluga kugerera Kristu. ⁶ N'akaba rhwababezwe yimubona oburhulirizi n'obuchungeke; n'akaba rhwarhulirizwe, yi nenyu mubon'oburhulirizi, bujirika oku malembero gokuheka ago malumwa g'amango rhulembera. ⁷ N'echinihirizo cherhu emunda muli chiyimangire, bulala rhuyinji oku, akaba mugwerh'echigabi omu malumwa, mugwerh'echigabi omuburhulirizi nenyu. ⁸ Rhurhalonzeze, okubaleka murhana menyere, beneberhu, okw'amalibuko marhuhikire omu Azia, marhulibwize ngasi mango oku gandi, kurhaluk'emisi yerhu, kuger'oku mango g'okuchik'entege z'okubik'akalamo. ⁹ Rhwanalema rhwabona okunali okuyimanga kw'akalamo yirhurhanahira echinihirizo omukagarhi kerhu s'aliko rhuchihirire omu kagarhi ka Nyamuzinda, oful'abafu. ¹⁰ Yewe arhushwekwire kandi yinji warhushwekula omulufu, rhunagwerhe echinihirizo oku nj'arhushwekula kandi. ¹¹ Nenyu muli mwarhurhabala omu mahuno genyu, chiro n'enshokano rhwahabirwe oku bunene bw'amahuno g'abantu, bantu banene baderhe koko enyanya lyenyu. ¹² Bulala okuchikuza kwerhu kuli ntya: obuhamirizi b'omurhima gwerhu, nk'okurhwalambagir'omugulu, na bwenene okulunda lwenyu, n'okubuchesibwa n'obushinganyanya embere za Nyamuzinda, birhali kugerer'obwenge bw'omubiri s'aliko kugerer'obonjo bwa Nyakasani. ¹³ Rhurhabayandikire echindi chintu nk'ebi muli mwasoma n'ebimumenyere. Nandi nachinihiriza oku nji mwabimenyerera okugera oku buzinda. ¹⁴ Nk'oku munamenyere omu chichira oku rhuli bukuze bwenyu, nk'oku nenyu nji mwaba bukuze bwerhu okulusiku lwa Nahano Yesu. ¹⁵ Omubulangalire, nalonza kuyinj'emunda muli, yi mugwarha obonjo kabiri; ¹⁶ Nalonzaga kugerer'emwenyu yi ngenda e'Makedonia, kandi kurheng'e Makedoniya kuja emwenyu nanji munamperekeze e'Yudeya. ¹⁷ K'omukulonz'ebyola, nakoleseze n'obolokazi? Changwa ebishubizo byani byakaba bishubizo bikulikiz'omubiri, kuger'ahabyakab'omukagarhi kani nechi kandi nanga? ¹⁸ Nk'oku Nyamuzinda ali mushinganyanya, omwazi rhwababwiraga gurhali nechi kandi nanga. ¹⁹ Bulala mwene Nyamuzinda Yesu Kristu, rhwabayigirize omukagarhi kenyu, kungererako, na Silvano na Timoteyo arhabaga nechi na nanga, s'aliko nechi yiwaliri omukagarhi kage. ²⁰ Bulala, okubiyerekeze echiragane cha Nyamuzinda, omu kagarhi kage m'omuli nechi; che chirhumire kandi Bibentyo aderherwe omu kagarhi kage oku bukuze bwa Nyamuzinda. ²¹ Kandi yenarhuyimanza haguma n'enyu omu kangarhi ka Kristu n'okurhushiga, ali Nyamuzinda. ²² Yiwanarhuhiraga kw'akashe arhuha echimanyiso cha Muka omu mirhima yerhu. ²³ Aliko nyono mpamagere Lulema abe muhamirizi w'omurhima gwani, omu kuba babalira, ntazi hik'e Korinto. ²⁴ Kurhali kuderh'okurhurhambwire obwemere bwenyu; s'aliko rhwabo barhabazi b'obusime bwenyu: Bulala muyimangire omu bwemere.