¹ Fô ny mpisôrognabe jiaby, vôfidy avy tamin'ny ôlogno, de notendregna mbô hiasa amin'ny agnaran'ny ôlogno amin'iré raha mahakasika an'Andriamanitra, ké mbô hanolôrany fagnomezagna sy fanatitra ho an'ny ota. ² Izy de afaka mifagnaraka mora amin'ny tsy mahalala ndraiky maniasia satrià izy tegnany foagna koà de vôdidin'ny fahalimiagna. ³ Noho izégny, izy foagna koà de notakiagna hanôlotro sorogna ho an'iré otany manôkagna, karaha ny natôny ho an'iré otan'ny ôlogno. ⁴ Tsy ho an'ny tegnany no handraisan'ny ôlogno izégny voninahitra izégny. Fô ndraiky, izy de nantsoin'Andriamanitra, karaha an'i Arona. ⁵ De karaha izégny, Kristy tsy mbô nagnamia haja ny tegnany mihintsy tamin'ny fanaovany ny tegnany ho mpisôrognabe. Fô ndraiky, lay araiky zay nivôlagna taminy nivôlagna hoe: ''Zanako anaré; niany de tônga Rainà Zaho.'' ⁶ Karaha izégny foagna koà no nivolagnany tagny amin'ny toeran-kafa hoe: "Anà de mpisôrogna mandrakizay araka ny fômban'i Melkizedeka.'' ⁷ Nandritr'iré andron'ny nôfony, Kristy nanôlotra vavaka sy fangatahagna niaraka tamin'ny hiaka mafy sy ranomaso an'Andriamanitra, lay araiky zay afaka mamonjy Ananjy amin'ny fahafatesagna. Ré Izy nohon'ny fangorahany. ⁸ Na de zanaka aza Izy, de nianatra fankatoavagna tamin'iré raha zay niaretagna. ⁹ Natô ho tônga lafatra Izy ké tônga, ho an'ny ôlogno jiaby zay mankatô Ananjy, lay lôharanon'ny famonjegna mandrakizay. ¹⁰ De notendren'Andriamanitra karaha ny mpisôrognabe Izy araka ny fômban'i Melkizedeka. ¹¹ Mana-kambara betsaka momban'i Jesosy zahay, fô sarotro ny magnazava izégny hatramin'ny naha-lalindalôvagna ny fandrenesanaré. ¹² Fô amin'izô fotoagna zô de tôkony ho mpampianatra anarè, anaré de mbôla mila ôlogno hampianatra anaré iré fitsipika fototry ny hafatr'Andriamanitra. Ronono no ilanaré, fô tsy ventin-kanigna! ¹³ Fô ny ôlogno zay misôtro ronono fotsiny de tsy ampy traikefa amin'ny hafatry ny fahamarinagna, satrià izy de mbôla zaza hely. ¹⁴ Fô ny ventin-kanigna de ho an'iré lehibe. Iré de zay voahôfagna tamin'ny fanavahagna ny tsara amin'ny ratsy ny fahatakarany nohon'ny fahamatoranjaré ré.