¹ Ôka hitohy ny fitiavagna ara-pirahalahiagna. ² Aza magnadigno ny fampiantranoagna iré vahiny. Fô tamin'ny alalan'izégny, no nanehoan'ny sanany fampiantranoagna iré anjely nefa fantany izégny. ³ Tsarovy iré vôfonja, karaha ny hoe niara-nifatotra taminjaré ré anaré. Tsarovy iré zay nampahoriagna, karaha ny hoe zaré ré foagna koà anaré amin'ny vatagna. ⁴ Ôka ho hajain'ny tsiraikaraiky ny fanambadiagna. Ôka ny fandrian'ny fanambadiagna mbô hadio, fô Andriamanitra de hitsara iré mpangala-badin'ôlogno sy iré mpijangajanga. ⁵ Avelà ny fitondran-tegnanaré ho afaka amin'ny fitiavam-bôla. Mifalia amin'iré raha zay hanagnanaré, satrià Andriamanitra tegnany de nivôlagna hoe: ''Zaho de tsy handao anaré mihitsy, na hahafoy anaré akory.'' ⁶ Aleo atsika ho faly mbô ho sahy hivôlagna hoe: ''Ny Tompo no Mpamonjiko; ké tsy hatahotra zaho. Ino no azon'ny ôlogno atô aminahy?'' ⁷ Hevero iré mpitarika agnaragna, iré zay nivolagna ny Tenin'Andriamanitra taminaré, ké hevero ny vokatrin'ny fihetsinjaré ré. Alay karaha ny finoanjarè ré. ⁸ Jesosy Kristy de tsy miôva omaly, sy niany, ké mandrakizay. ⁹ Aza manaiky taomigna amin'iré karazagna fampianaragna hafahafa. Fô tsara kôfa tôkony hamafisigna amin'ny fahasoavagna ny fô, fô tsy amin'ny hanigna zay tsy magnampy iré zay mandeha miaraka aminjaré ré. ¹⁰ Atsika de managna alitara zay tsy anagnan'iré zay manômpo ny tabernakely fahefagna hihinagna. ¹¹ Fô ny ràn'iré biby novonigna atô fagnatitra ho an'ny ota de nindôsin'ny mpisôrognabe takô amin'ny toeragna masina, nandritr'izégny ny vatanjaré ré de nodoragna tagny ivelan'ny toby. ¹² Noho izégny Jesosy foagna koà de nijaly tagny ivelan'ny vavahadin'ny tanàgna, mbô hagnamasigna iré vahoaka amin'ny alalan'ny ràny manôkagna. ¹³ Andeha atsika noho izégny ho agny Aminanjy agny ivelan'ny toby, hitôndra ny fahafam-barakany. ¹⁴ Fô tsy managna tanàgna maharitra atsika atô. Fô ndraiky, miandry lay araiky zay ho avy atsika. ¹⁵ Amin'ny alalany, ké, de andao atsika hagnolotra iré fagnati-pideragna ho an'Andriamanitra hatragny, fideragna vokatry ny molotra zay manaiky ny agnarany. ¹⁶ Aleo tsy adinointsika ny magnano ny tsara ny magnampy ny tsiraikaraiky avy, Fô amin'ny fagnatitra karaha izégny no tegna mahafaly an'Andriamanitra. ¹⁷ Mankatoava sy magneky iré mpitarika anarè, fô zaré ré no miahy ny fagnahinaré, karaha irè zay hagnano tatitra. Mankatoava mbô hagnano izégny am-pifaliagna iré mpitôndra anaré, fô tsy am-pisentoagna, zay lasa tsisy dikany ho anaré. ¹⁸ Mivavaha ho anay, fô zahay de nino fô managna feon'ny fieritreretagna madio ké magniry hiaigna am-pahamarinagna ny raha jiaby. ¹⁹ Manosika anaré bebe kokoà aza zaho mbô hanagna izégny, ké mbô hiverigna faingagna aminaré zaho. ²⁰ Ary lay Andriamanitry ny fiadanagna, zay nanangagna tamin'ny maty lay mpiandry ondry maventy, ny Tompontsika Jesosy, tamin'ny alalan'ny ràn'ny fagnekegna mandrakizay, ²¹ de hagnatsara anaré amin'ny asa tsara jiaby mbô hanaovagna ny sitrapôny. Izy anie hiasa akô agnatintsika zay tegna ankasitrahagna aké agnatrehany, amin'ny alalan'i Jesosy Kristy, zay hamiagna ny voninahitra mandrakizay. Amena. ²² Ké mankahery anaré zaho, ry rahalahiky, mbô hizaka ny tenin'ny fampahirezagna zay nosoratako fohy ho anaré. ²³ Fantaro fô efa nafahagna Timoty rahalahintsika, zay hiaraka aminahy hizaha anaré kôfa alôha izy. ²⁴ Atôvy veloma iré mpitarika anarè jiaby sy iré mpino jiaby. Iré zay avy agny Italia de magnano veloma anaré. ²⁵ Ho aminaré jiaby anie ny fahasoavagna.