¹ आहुवड्या पेहेल्याज दिहाल ते बाया एकदम पाहाटेज कबरा होवे आल्या आण तियुही स्वत: तियार केली हारी हारी वस्तु ली आल्या, ² तियाहान दोगंडो कबरापनु होरकुलो देखायो, ³ ते माज गिया पेन तियाहान प्रभु शरीर सापड्यो नाहा, ⁴ ईया खातोर ते चमकाय गिया तोतामुज अचानक चमकुनारे पतोडे पोवले बेन माही तियाहा सायटिम उभी रेहेले, ⁵ ताहा ऐकदम बी गिया तियाहाय तियाहा चेहेरा तरती हवे केऱ्या आण ते तियाहान आखा लाग्या, जो जिवंतो हाय तिया होद तुमा मोले हाय तियाम काहा केतेहे, ⁶ तो तिही काय ना हाय तो उठी वाल्य तो गालील शेहेराम रिन तियाय तुम्हाल काय आखोलो तो ईतवा, ⁷ तो एहेकी माहा पोयराल तीन पापी लोंका हाताम देवनु तियाल वधस्तंभाप खिला ठोका आण तिसरा दिहाल तो उठनारो, ⁸ फांसे बाईन येशु गोगुलो ईत आलो, ⁹ तियां कबरुहीने आवत्या रिया आण तियुही ए आख्या गोठ्या जो वेयो तो अकरा सेवकान आण तिही बिहीरा आथा आखान आख्यो, ¹⁰ ते बाया मग्दालीया मरीयम योहान्ना आण याकोबा याहाकी मरीया ए आथ्या, ते आण बिहऱ्या बाया सुध्दा जे तीयुहू आरी आथ्या सेवकाहान ते गोग्या आखी देखावतुल्या, ¹¹ पेन सेवकाहान तियुहू आखनु मुर्खपणा हो लाग्यो आण तियाहाय तियुहूपे विश्वास नाहा केयो, ¹² पेन पेत्र उठ्यो आण कबरू होवे धवळयो तियाय एठा कुनकिन वेयो वेप तियाले तागा वेटालला पोतडा शिवाय कायज देखा यो नाहा, जो वेलो हाय ति गोठीम तो स्वत:ज तियाल नोवाय किन तो दुर गियो, ¹³ तियाज दिहाल तियाहाम ने बेनी शिष्या यरूशलेम शेहेरायनु सुमारे उकरा किलोमीटर दुर अम्माऊस नसवस गावाम जातुले, ¹⁴ ते एकबिहीरा आरी ए घडल्या आख्या गोठीबाराम गोगतुले, ¹⁵ ते गोगतुले ताहा आण ईयु गोठी चर्चा केतुला ताहा येशु स्वत: आलो आण तिया आरी चाला लाग्यो, ¹⁶ पेन तिया डोंवा तियाल ओखाखातोर बंद केराम आल्ला आथा, ¹⁷ येशु तियाहान आखा लाग्यो चालता ताहा तुमा एकबिहीरा आरी गोगतुला ते गोठ्या केल्लया हाय. चालता चालता ते उभी रिया ते खुब देखाया ¹⁸ तियाहामनु एक माहु तिया नाव कलयपा आथो तो तियाहान आखा लाग्यो, ईया दिह्याम घडल्या गोठ्या माहीत नेय वेरी एहेडो यरूशेलेम शेहराम रेनारो तु एखोलज हाय का, ¹⁹ येशु तियाहान आखा लाग्यो तुमां आखुलो केल्लया गोठ्या ते तियाल आखा लाग्याे, नासरेत येशू विषययाम आख्या गोठ्या ओज तो माहु जो तियाहा कामाकी आण शब्दाकी देवाहुंबूर आण माहाहुंबूर एक महान संदेष्टो वेयो, ²⁰ आण आमा चर्चा केतुला ताहा केहेकी आमा मुख्य सेवकाय आण अधिकाऱ्या ही तियाल मोनु दंड़ भोगाखातोर स्वाधीन केयो, आण तियाही तियाल वधस्तभाप खिला ठोक्यो, ²¹ आमाहाय एहेडी आशा केली आथी का तोज एक हाय, जो इस्त्राएला मुक्ती केरी आण ईयाहा आखां शिवाय आख्या वेल्या गोठीन आजनु तीन दिही वी गिया, ²² आण आमाहा कुटूंबामनं थोड्याक बाईही आमाहान आश्रर्य चकीत की देदा आज माहारीज पहाटे ते कबरा होवे गिया, ²³ पेन तियाहान तिया शरीर सापड्यो नाहा तियाहाय आवीन आमाहान आख्यो का तियाहान देवदुताहा दर्शन वेयो, आण देवदुताहाय आख्यो का तो जिवतो हाय, ²⁴ ताहा आमामनु थोळाक कबरू होवे गिया आण बाईही जेहेकी आखलो आथो तेहेकीज तियाहान देखाथे पेन तियाहाय तियाल वेयो नाहा, ²⁵ फांसे येशू तियाहान आखा लाग्यो संदेष्टाहाय आखल्या आख्यी गोठीप विश्वास थोवणारा तुमा मोडा मुख आण कमीबुघ्दी हाय. ²⁶ ख्रिस्ताखातोर ए आख्या गोठ्या सेहेन केरा आण तियाहा गौरव केरा जावुलो आवश्यक नेय आथो का, ²⁷ आण तियाहाल तियाय मोशे होवेनु सुरवात किन आण आखां संदेष्टाय लुग आखीन शास्त्रलेखाम तियाविषयाम काय लिखलो हाय तो आख्यो तियाय तियाहान हारकी होमजावीन आखी देखाल्यो ²⁸ ज्या गावाम ते जातला, तिया जागे ते आला ते आला आणे येशुय एहकी विचार केयो की, जेहकी काय तो आगाडी जाणारो हाय. ²⁹ पेन खुप रावाया किण तियाही आख्यो, “ आमाआरी रे कारण वाहतो पोड्यो आणे दिही भी बुडी गियो.” ताहा तो तियाआरी रा-खातुर माज गियो. ³⁰ जाहा तो तिया आरी मांडोखा बोठलो तियाय माडो लेदो आण आशिर्वाद मागीन फांसे तियाय तो मुळ्यो आण तो तियाहान दा लाग्यो, ³¹ ताहा तियाहा डोवा उगड्या आण तियाय तियाल आख्यो पेन तो तियामनु गायब विगियो, ³² ताहा ते एक बिहीराल आखा लाग्या तो वाटीप आपुआरी गोगतुलो ताहा आण शास्त्रलेखामनु गोठ्या केतोलो, ताहा आनु अंत:करणाम माजमा माज उखलातो जे नेय का, ³³ फांसे ते तुरून उठ्या आण यरूशलेम शहराम परत गियो, ताहा तियाहान अकरा सेवक आण तिया आरी आथा बिहीरा एकुज जागे टोलवाला देखाया, ³⁴ सेवक आण बिहरालो आखा लाग्या खरेंज प्रभु उठ्योहो आण शिमोनाल देखालो, ³⁵ फांसे तिया बेन शिष्याहाल वाटीम काय वेलो तो तियाहान आख्यो आण तो माडो मुळतुलो ताहा तियाय तियाल केहेकी वोहक्यो तो आख्यो, ³⁶ ते ए गोठ्या तिहान आखतुलो ताहा येशु तियाम उभी रियो आण तियाहान आखा लाग्यो तुमाहान शांती मिले, ³⁷ ते काबराय गिया आण बि गिया तियाहान केहेकी होमजायो का ताेअ पुथडो वि रियाहा, ³⁸ तो तियाहान आखा लाग्यो तुमा एहेकी बि काहा गिया तुमा मनाम शंका काहा तियार वेयी, ³⁹ मा हात आण पाग वेरा तुमाहान माय देखावु तोज माय हाय माज आथली वेरा आण वेरी का माल हाय तेहेकी आटके आण माहा पुथडाले नाहा रेते, ⁴⁰ एहेकी आखीन तियाय तियाहान तिया हात पाग देखाव्या तेबी तियाहा खुचीकी तियाहान तो खेरो वाटतुलो नेय, ⁴¹ तेबी खुचीकी विश्वास नेय केता आश्रर्यचकित वि गिया ताहा येशु तियाहान आखा लाग्यो तिही तुमाहापे खाखातोर काय हाय, ⁴² फांसे तियाल रेहलो माशा तुकडो देदोलो, ⁴³ तियाय तो लेदो आण तिया हुबूर खादलो, ⁴⁴ तो तियाहान आखा लाग्यो तेज ते गोठया जे माय तुमा आरी आथो ताहा आखल्या का मोशे नियमशास्त्र संदेष्टे आण स्त्रोत्रे ईयाम भविषयाम जो आखो हाय,तो आखाे पुरज वेरा जोजे, ⁴⁵ फांसे शास्त्रलेखं होमजा खातोर तियाय तियाहा मने उगडये ⁴⁶ फांसे तो तियाहान आखा लाग्यो एहेकी लिखलो हाय का ख्रिस्ताये दु:ख भोगाजोजे आण मोलामेनु तिसऱ्या दिहाल उठीजाे ⁴⁷ आण यरूशलेम शेहेंरामनु सुरूवात आखा राष्टाम तिया नावाकी पश्चात्ताप आण पापांहा क्षमा प्रचार केराम आवी ⁴⁸ ईयु गोठी तुमा साक्षी हाय, ⁴⁹ वेरा मा शपथ लेहली हास तीया माय तुमाहाय मोकलु, तुमा स्वर्गा सामर्थ्याकी नेय पराया तावलुग ईयाज शेहेराम रेजा, ⁵⁰ फांसे तो तियाहान बारे थोडेक दुर बेथानीलुग लीगीयो आण तियाहान हातउंचेकीन आशीर्वाद देदो, ⁵¹ तो आशिर्वाद देतुलो तोता मुज आकाशाम लेवाय गियो, ⁵² फांसे तियाही तिया उपासना केई आण ते मोडी खुशीम यरूशेमाम फांसे गिया, ⁵³ आण ते परमेश्वरा भवनाम देवा धन्यवाद केताह रिया