¹ ಸಹೋದುರುಲಾ ದೇವುಡ ಕನಿಕರನೀ ನೇನಪಿಕಿ ಎತಕೊನಿವಚ್ಚಿ ಮಿಮಲ್ನ ಅಡಿಕೊನದೆಮಟ್ಟ - ಮೀಳು ಮೀ ದಹಲ್ನಿ ದೇವುಡುಕಿ ಮೀಸಲೈಯ್ಯಿ ಮೆಚ್ಚಿಕೆಅಯ್ಯಿ ವುಂಡ ಸಜೀವ ಯಜ್ಞಮೈಯ್ಯಿ ಅರ್ಪಿಯಂಡ್ಡಿ ; ಇದೇ ಮೀ ವೀವೇಕ ಪೂರ್ವಕಮೈನಾ ಆರಾಧನೆ . ² ಇಹಲೋಕದ ನಡವಳಿಕೆನೀ ಅನುಸರಿಸ್ದಾನೇ ಕೊಂತ ಮನಸ್ಸುನಿ ಹೊ೦ದ್ಕೊನೀ ಪರಲೋಕ ಭಾವಮೈಯ್ಯಿ ವು೦ಡಡ್ಡಿ . ಇಟೈತೆ ದೇವುಡ ಚಿತ್ತನ್ಕಿ ಅನುಸಾರಮಯ್ಯಿದ್ದಿ ಅಂಟ್ಟೆ ಉತ್ತಮಮೈನ್ದಿ ಮೆಚ್ಚಿಕೆ ಅಯಿನ್ದಿ ದೋಷಮ್ ಲೆನದಿ ಯಾವದೀ ಅನಿ ವಿವೇಚನೆಸೆಸ್ಸಿ ತಿಲಿಚ್ಕೊಂಟಾರು . ³ ದೇವುಡು ನಾಕಿ ಕೃಪೆಸೇಸ್ನಾಟ್ಟ ಸೇವೆನೀ ನಡಿಬಿಚ್ಚಿ ಮೀಲಾ ಒಕ್ಕೊಕುಲ್ಕೂ ಸೋಪೆದ್ದಿ ಹೆಮಂಟ್ಟೆ ಯೋಳು ತಾನ್ ಯೋಗ್ಯತೆನೀ ಮೀರಿ ತನ್ನಿ ಭಾವಿಚ್ಕೊಂದನೆ ದೇವುಡು ಒಕ್ಕೊಕುಡ್ಕಿ ಎಂಥೆಂಥ ವಿಶ್ವಾಸ ಬಲನೀ ಇಚ್ಚುನೋ ದಾನ್ಕಿ ಸರಿ ಅಯ್ಯಿ ನ್ಯಾಯಮೈನಟ್ಟ ಅಭಿಪ್ರಾಯಮ್ನಿಚ್ಚ ತನ್ನಿ ಭಾವಿಚ್ಕೊವಲಾ . ⁴ ಯದ್ಗು ಅಂಟ್ಟೆ ಮಾ ವಕ್ಕ ದೇಹಮ್ಲಾ ಅನೇಕ ಅಂಗಲೂವುಂಡ ಪ್ರಾಕಾರಮೈಯ್ಯಿ ಆ ಎಲ್ಲಾ ಅಂಗಲ್ಕಿ ⁵ ಹೆಟ್ಟ ವಕ್ಕೆ ಕೆಲಸಮೂ ವುಂಡಲೇದೋ ಅಟ್ಟೆ ಮಾಮದ್ರೂ ಒಟ್ಟಾಯ್ಯಿ ಕ್ರಿಸ್ತನ್ಲಾ ವಕ್ಕೆ ದೇಹಮಯ್ಯಿ ಒಕ್ಕೊಕಲ್ ಅಯ್ಯಿ ಪರಸ್ಪರ ಅಂಗಲೈನಾಮ . ⁶ ದೇವುಡು ಮಾಕಿ ಕೃಪೆಸೇಸ್ನಾಟ್ಟ ಪ್ರಾಕಾರಮೈಯ್ಯಿ ಮಾಮು ಬೇರೇ ಬೇರೇ ವರಲ್ನಿ ಹೊಂದ್ನಾಮು . ಹೊಂದ್ನಾಟ್ಟ ವರಮು ಪ್ರವಾದನೆ ರೂಪಮೈಯು೦ಟ್ಟೆ ಮಾ ವಿಶ್ವಾಸ ವರಕ್ಕಿ ಸರಿ ಅಯ್ಯಿ ಪ್ರವಾದನೆ ಸೋಪ್ದಾಮು . ⁷ ಅದಿ ಸಭಾಸೇವೆ ರೂಪಾಮೈಯು೦ಟ್ಟೆ ಸಭಾಸೇವೇನೀ ಸೇಸ್ತಾ ವುನ್ದಮೂ . ⁸ ಬೋಧಿಚೋಡು ಬೋಧಿಚ್ಚೆದ೦ಟ್ಲಾ ಬುದ್ದಿಸೋಪ್ಪೋಡು ಬುದ್ದಿ ಸೋಪ್ಪೆದಾ೦ಟ್ಲಾ ನಿರತಮಯ್ಯಿ ವು೦ಡ್ನಿ . ದಾನಮ್ಚ್ಚ ಸೇಸೋಡು ಯಥಾರ್ಥಮನಸ್ಸಿನಿಚ್ಚ ಇಯ್ನಿ . ಪೇದ್ದತನನೀ ನಡಪೋಡು ಆಸಕ್ತಿಯಿಚ್ಚ ನಡಪ್ನಿ . ಕಷ್ಟಮ್ಲಾವುಡೋಳ್ಕಿ ಉಪಕಾರಮ್ ಸೇಸ್ಸೋಡು ಸಂತೋಷಮ್ನಿಚ್ಚ ಸೇಯ್ನಿ . ⁹ ಪ್ರೀತಿ ನಿಷ್ಕಪಟಮೈಯ್ಯಿ ವುಂಡ್ನಿ . ಸೆಡ್ಡತನಕಿ ಒಳಗಾನಟ್ಗ ಮೊಂಚ್ಚಿದಾನ್ನಿ ಬಿಗಯಾಯ್ಯಿ ಪುಟ್ಕನ್ಡ. ¹⁰ ಕ್ರೈಸ್ತ ಸಹೋದರುಲೂ ಅಣ್ಣತೊಮ್ಮುಡ್ ಅನಿ ಒಕ್ಕನೋಕಲ್ನಿ ಪ್ರೀತಿಚಂಡಿ . ಮಾನಮರ್ಯಾದೆನೀ ಸೂಬಿಚ್ಚೆದಾಟ್ಲಾ ಒಕ್ಕಲಿಕಿ೦ತ ಒಕ್ಲೂ ಮುಂದೈಯ್ಯಿ ವುಂಡಡ್ಡಿ . ¹¹ ಜಾಗ್ರತೆ ಕವಲಂಟ್ಟೆ ಆಲಸ್ಯಮೈಯ್ಯಿವುನ್ದನೆ ಆಸಕ್ತಚಿತ್ತಮ್ ವುಳೋಳ್ ಅಯ್ಯಿ ಕರ್ತುಡ ಸೇವೇನೀ ಸೇಸೋಳ್ ಅಯ್ಯುಡ೦ಡ್ರಿ . ¹² ಕ್ರೈಸ್ತುಲು ನೀರಿಕ್ಷಿಚ೦ಟ ಮಹಾಪದವಿನೀ ನೆನಸಿ ಉಲ್ಲಾಸಮೈಯ್ಯಿ ವುಂಡಡ್ರಿ . ಉಪದ್ರವಮ್ಲಾ ಸೈರಣೆವುಳ್ಳೋಳ್ ಅಯ್ಯುಡ೦ಡ್ರಿ . ¹³ ದೇವುಡ ಜನಲ್ಕಿ ಕೊರತೆವಚ್ನಾಪ್ಡು ಸಹಾಯಮ್ ಸೇಯಂಡ್ರಿ . ಅತಿಥಿಸತ್ಕಾರನೀ ಅಭ್ಯಾಸಿಸಂಡ್ರ . ¹⁴ ಮಿಮಲ್ನಿ ಹಿಂಸೆಪಡಿಚೋಲ್ಕಿ ಆಶೀರ್ವಾದಮ್ನಿ ಸೇಯಂಡ್ರಿ ; ಶಪಿಸ್ದನೆ ಆಶೀರ್ವಾದಮ್ನಿ ಸೇಯಂಡ್ರ . ¹⁵ ಸಂತೋಷಮ ಪಡೋಳ್ ಜೊತ್ಲಾ ಸಂತೋಷಮ್ ಪಡ೦ಡ್ರಿ . ಹೇಡಿಸೋಳ್ ಜೊತ್ಲಾ ಹೇಡಿಯ೦ಡ್ರ . ¹⁶ ಮೀ ಮೀಲೋಗ ಏಕಮನಸ್ಸುಳೋಳ್ ಅಯ್ಯುಡ೦ಡ್ರಿ , ದೊಡ್ದಸ್ತಿಕೆಮಿಂದ ಮನಸ್ಸು ಪೇಡ್ದನೇ ದೀನಲು ಜೊತ್ಲಾ ಬಳಕೆ ಅಯ್ಯಿವುಂಡಡ್ರಿ . ಮಿಮಲ್ನಿ ಮೀಳೆ ಬುದ್ದಿವಂತುಲ್ ಅನಿ ಎಣಿಚ್ಕೊವದ೦ಡ್ರಿ . ¹⁷ ಯೋಳ್ಕು ಅಪಕಾರಂಕ್ಕಿ ಅಪಕಾರನೀ ಸೇಯ್ಯದಂಡ್ರಿ . ಅದ್ರೂ ದೃಷ್ಟಿಲಾ ಯಾವ್ದಿ ಗೌರಮೈಯಿನ್ದ ದಾನ್ನೇ ಯೋಚಿಂಚ್ಚಿ ಸಾಧಿಚಂಡಿ . ¹⁸ ಸಾಧ್ಯಮೈತೆ ಮೀಯಿಂಚ ಅಯ್ಯೇತನಕಾ ಅದ್ರೂ ಜೊತ್ಲಾ ಸಮಾಧಾನಮ್ನಿಚ್ಚ ವುಂಡಡ್ರಿ . ¹⁹ ಪ್ರಿಯುಲಾ ಮೀಳೆ ಮುಯ್ಯಿಕಿ ಮುಯ್ಯಿನಿ ತೀರಿಬಿಸ್ದನೆ ಶಿಕ್ಷಿಚ್ಚೆದಾನ್ನಿ ದೇವುಡುಕಿ ಇಸ್ಪೆಟ೦ಡ್ರ . ಯಾದ್ಗು ಅಂಟ್ಟೆಮುಯ್ಯಿಕಿ ಮುಯ್ಯಿನಿ ತೀರಿಬಿಚ್ಚೆದಿ ನಾ ಕೆಲಸಮು ನಾನೇ ಪ್ರತಿಫಲನೀ ಇಸ್ತಾನೂ ಅನಿ ಕರ್ತುಡು ಸೊಪ್ನಾಡು ಅನಿ ರಾಸಿನ್ದಿ ²⁰ ಅಟೈತೆ ನ ವೈರಿ ಅಕ್ಲಿಚ್ಚವುನ್ಟೆ ವಾಡ್ಕಿ ಊಟಮ್ನಿ ಬಡಿಚ್ಚು ; ದಾವ್ ಆಯ್ಯುಂಟೆ ತಾಗೆಕ್ಕಿ ನೂಳುನೀ ಇಯ್ಯಿ . ಇಟ್ಟ ಸೇಸ್ಸೇದೈತೆ ವಾಡ್ ತಲಕೈಮಿಂದ ಕೆಂಡಲ್ನಿ ಕೂಡಿಬಿಚ್ನಾಟ್ಗಾ ಐತಾದೀ . ²¹ ಸೇಡ್ಡ ತನಕಿ ಸೋತ ಪೋನ್ದನೆ ಮೊಚ್ಚಿದಾನಿಚ್ ಸೇಡ್ಡ ತನನೀ ಸೋಲಿಚ್ಚು .