¹ तिदिहीज ईशुई कोमेने निगीन फुगारा तोडीप जायन वोठो. ² ताहा लोकाहा टोला तियाही पाही टोलवाया; ताहा तो उडीम जायन वोठो आन वाटा लोका फुगारा तोडीप उवारिया. ³ ताहा तियाय दाखला दिइन खुवुज गोठया तिवाहान आख्या, तियाआख्याव्या पोअनारो पारा खातार निग्यो;

आन तो पातलो ताहा थेडोलो वीयारो वाटीप पोडया, आने चिडे आलेतेखाय गिये.

⁴ थोडोक खेडकापे पांडया, तिही वाद काटु नाय आशा, ⁵ आने काटु बाद नाय आशा तिवाखातार तोअ माहारू उग्यो.

⁶ पेन हिदी निग्या, ताहा तो कोमाय गियोआने वउट मुले नाय आथे तियाहाल तो हुकाय गियो. ⁷ थोडो काटाहा चाडवाहाम पोडयो; आने काटाले चाडे वादीन तीया वाद खुटावी. ⁸ थेडोक हारा जागाम पांडयो; आने तिया कीही होवपट, कीही साठपाट, आने कीही तीसपट रहेकी पाक्यो; ⁹ जियाल उनाया कान हाय तो उनाय ले. ¹⁰ हाती चेला पाही आवीन तिवाल आखे, तु तियाहा आरी दाखलाबाई काहा आखतोहो. ¹¹ तियाय तियाल आख्यो, होरगा राज्या खास गोठया जानुलो ओकोल तुमाहान देवली हाय, पेन तियाहान नाहा देवली, ¹² काहाका तियावे केडावे हाय तियाल देवाम आवी, आने तियाल भरपुररिहीकी बेरी; जियापे कावीज नाहा तियावेने जावेरी तांवी तियापने काडी लेवाम आवी. ¹³ इयाखातोर आय तियाहाआरी दाखलो दिइन गोगुहु; काहाका ते वेतेहे पेन तियाहान देखावतो नाहा आने उनातेहे पेन उनाता नाहा आने तियाहाम होमजातोवी नाहा. ¹⁴ यशया आखली गोठया पुन्या विरीयाहा, ते एहेकी का, तुमा उनायाहाता खेरो पेन तुमहाल होमजानारो नाहा. आने वेराहा खेरो पेन तुमहाल देखानारोज नाहा. ¹⁵ काहाका इयाहा लोकाहा मोन कठीन बीगियेहे, ते कानाहाकी उनाताहा आने तीवाहाय डोआ मिची लेटला हाय; इया खातार का तियाही डोआकी वे नाय, कानाहाकी उनाय नाय. मोनाकी होमजे नाव आने फाचे फाचला फिरे नाय आय तियाहाल हारो किंव नाय. ¹⁶ पेन तुमा डोआ धन्य हाय, का ते वेअताहा. आने तुमा कान काहाका ते उनाताहा. ¹⁷ आय तुमाहान खेरोज आखुहु का तुमा जे वेतेहे ते वेरा खातार खुवुज निरोप्या आने धर्मलोक आधा तेवी तियाहान वेरा तिल्या नाहा; आने तुमा जो उनाताहा तो उनाया खातीर ते वी तियाहान उनायाहा मिल्यो नाहा. ¹⁸ आमी तुमा पोनारां दाखलो उनायल्या ¹⁹ पोनारो तो इहाय का, केडो राज्या वचन उनातेहे पेन तीयाहान होमजतो नाहा तो दुश्मन आवीन मोनामेने जो पोअलो तो काडी लेहे. ²⁰ दोगडापेन्यो पोलो ताई हाय का, तो बचन उनाहीनेतो तुरूतुज खुशी की मानी लेहे. ²¹ पेन तिया मुलउडे नाहा तियाखातारे तो थोडोहोज टाईम टिकेहे आने वचनाहा खातार संकट आलो नेते तारा देदो ताहा तो तुरूतुज सोडी देहे. ²² काटाला चाडाहाव पोअलोतो इज हाय का, तो वचन उनाही पेन संसारा कालजी आन धन दौलती लोक इ वचनाम बाटुलो कमी की देहे आने तो निकामी वेहे. ²³ हारा जागाम पोलेला तो इज हाय का, तो वचन उनाय तो होमजेहे; तो फल देहे ; केडो होव पट केडो, साठपट, केडो तीसपट, एहेकी दे. ²⁴ तियाय तिया आगला विहरी एक दाखला आख्यो. ²⁵ केडा एक माहाय तिया खेताम हारो वीवारो पोयो तियाहोच स्वर्गा राज्या हाय. लोक हुवी ताहा तियाहा दुश्मन आवीन गोवाहाम खोड कोचरो पोईन निगी गियो. ²⁶ पेन जाहा पालो फुटयो आने वाला आला ताहा खोड कोचरावी देखाया लाग्यो. ²⁷ ताहा तिया को धोन्याल आवताम आवीन तीवाल आख्या, महाराज आपुही आपु खेतामता हारो वियारो पोयाहो ने? आन तीयामखेड कोचरो कीहीने आलो? ²⁸ तियाय तियाहान आख्यो इ कामता केडा दुश्माना हाय. आवत्याही तियाहान आख्या हाती आमा जायन तो काडी टाकजी एहकी तो मोरजी हाय का? ²⁹ तियाय आख्यो, नाहा तुमा खोड टोलो क्याहाताहा तियाआरी तुमा गोव बी उपटी लीहा. ³⁰ वाडणी तावलुगु आरीज वादा द्या; वाडणी टायमावे आय वाडणाऱ्याधन आखे का, पेला खोडको चरोटोलो केरा आने वाला खातार तिया पुला वादा; पेन गोव मा गोदामामथोवा. ³¹ तियाय तियाहा आगला आजी एक दाखला आख्यो का स्वर्गा राज्य राईदाना होस हाय. तो केडा एक माहाय लिआववीन तिया खेताम लागव्यो; ³² तोता वाट दाणहा हाना हाय; तेवी तो वादेहे ताहा आजीपालाहायना मांडा विन तीया एहेडा चाडो वहे की, जुगामने चिडे तिया डागीप कोराहा केतहे आने रेतेहे. ³³ तियाय तियाहान आजी एक दाखलो आख्या का स्वर्गां राज्य खमिराहोच हाय, तो ऐक वायीय लिइन तीन मापले लोटामे दोवाबीन थोबो, नाहा तो वाटो नोट फुगी गियो. ³⁴ ए बादया गोठया ईशुई दाखलाहाकी लोकाहान आख्या आने दाखला वाचीन तो तियाहा आरी काय गोग्यो नाहा.

³⁵ इयाखातोर का संदेष्टयाहाय जो आखलो आथो तो पुरो बेरा जोजे. तो एहेकी का दाखला आखाखातोरे आय मा मुय उघडेहे, दुनिया उवजाबी तेहे दोवल्या गोठया आय आखी देखावेहे. ³⁶ हाती तो लोकाहान मोकली दिइन कोमे गियो; ताहा तिया चेला तियाही आवीन आख्या खेतामने खेडकांचरा दाखला आमाहाल होमजावीन आख. ³⁷ तियाय उत्तर देदों का, हारां वीवारां पांणारां ओ माहाआ पोयरो हाय. ³⁸ खेत इ दुनिया हाय; हारो वीवारो इ राज्या पोयरो हाय, खोडकोचरो इतिया दुश्मना पोयरो हाय, ³⁹ तो पोनारां दुश्मन ओकाल्यापुत हाय; आने वाडणारे इ देवदुत हाय. ⁴⁰ ताहा जेलकी खोडकांचरो टोलो किईन आगीम वालतेरे तेरकी इ दुनीया पारवानु टेम बेरी. ⁴¹ माअहा पोयरोतिया देवदुताहान मोकली आने ते तीया राज्यामेने वाद्या ठोकरावनान्या वस्तु आन खोटेकाम केअनाराहान टोलो केरी. ⁴² आने तियाहान आगी कुंडामउ टाकी दी, तिही तेअ रोडी आने दात पिही. ⁴³ ताहा धार्मीकलोक आपो वाहका राज्याम दिहाहांस पिपली. तियाल कान हाय तो उनाय. ⁴⁴ स्वर्गा राज्य खेताम दोवावी थांवली मिलकतीहोच हाय, तो केडा एका माअहाल सापडया आने तियाय ती दोवावीन थोवी आने खुशीमाराम तिवाय जाइन, तिया बादी मालमत्ता बेची देदी आने तो खेत बेचतो लेहे. ⁴⁵ आजी, स्वर्गा राज्य हारामांती होद केनाच्या एका वेपाया होच हाय. ⁴⁶ तियाल एक खुवुज किमती मोती देखायो, ताहा तियान जाईन तीया जांवी आशां तो वादां बेची देदों आने तो बेचतां लेदो. ⁴⁷ आजी स्वर्गाराज्य दोन्याम टाकल्या एका जालाहांस वांदीजाती जीती जीव एककेज सापडुतेहे तियाहांच हाय. ⁴⁸ तोअ पोरामा आहाही तोडीपे ताई काडयो आने वाहीन जेहारे ते वारानाहाम टोलव्याने जे खारावते फेकी देदे. ⁴⁹ तेहेकी दुनिया दाखुनु टेमावे उहेकीज वेरी, देवदूत आवीन धार्मीक लोकाहामने खोटाहान जुदो केरी. ⁵⁰ आने तियाहान आगी भोट्टीम टाकी, तिही रोडुलो ने दात खावुलो चाली. ⁵¹ तुमाहाल ए वाद्या गोठ्या होमजाया का ? तियाही तियाल आख्यो हा. ⁵² ताहा तियाय तियाल आख्या हरेक नियमशास्त्र हिवुनारा स्वर्गा राज्या चेला बेला हायजो आप भांडारामेने नोव्या जुन्या वस्तु काडेहे त्या माहाहोस हाय. ⁵³ आने ऐहकी बियो का, ऐ दाखला आखुलो पारवीन ईशु तियाहाहीने निग्यो. ⁵⁴ आने तो तिया गावाम आवीन तियाहा भोक्ती केरूला ठिकाणी तियाहा एहेकी हिकव्यों का तियाहान नोवाय किईन आख्यो इ ओकॉल आनें सोक्ती कामे केलो इसोक्ती इया माहाल किहीने मिलेहे? ⁵⁵ ओ हुताच्या पायरो ने ? तिया याहाकील मरीया आखतेहे ने? याकोव, योसे, शिमोन आने यहुदा ए तिया पाऊ ने? ⁵⁶ इया वोअयाहा त्या वाद्या आपु आवीज रेहत्याहाकने, ता तोवाद्या झ्याल केहेकी मिल्या ? ⁵⁷ आने तिही तियाहो अविश्वास इहिमं तियाय खेल नोवाय लागे एहेडेकाम नाहा केये. ⁵⁸ एहकी ते तिया वद्दल ओटक्या. ईशुई तियांन आख्या, संदेष्टयाहान आपु कोअम मान पान मिलतो नाहा.