¹ A lackha mai vei na veiba kha na garogaro khora tam lakha mai na lam veitikhi ni yago i vatikem. ² Ba sa kocokoco kha lala ni rewatia kha dau gagadre. Ba dau veivala kha veiba ni ba kherekhere. ³ O ba kerekere kha tom cigomia baletia o tarogia cala mo ba vavelenia i na vatilem gagadre ca. ⁴ O vatikem na dauvulau, o ba tam kilatia ni tam lakha vata na kwa vakalou qa ha veivinati vuravura. ⁵ Se o Xa vakasama vali boto sa kwa waXe na i vola tabu, na yalo sa no vali va vati kota. ⁶ Ia na Kalou vagania na loloma, ni a kwaya na lea tata, na Kalou e borisi ni khora na viavialevu kha na loloma khora na yalo malumlumu. ⁷ Vamalumalutakini vatikem vua voratia na nitu kha na lakha dei mai va ikho. ⁸ Lakha va voleke mai va Jisu kha na qai toro mai vavoleke va iko. Vasavasavakinia mu lima o vatikem na lomaloma rua. ⁹ Yalo kaikai taqaya, tagi! Denia na lem mali me vukhi me, rarawa kha na lem Reki me mata-kai kai. ¹⁰ Vayalosewa ni iko e mata ni Kalou kha na biuti iko i yata. ¹¹ Kua ni tata va lialia me baletia na wekamu. O koya e tata becitaki lea gwanea Kha gwanea tata becitaki nia na lawa oiko na dau ni lelewa. ¹² Elia ga na dauni lelewa. Akwe okoya na dau ni veivuke kha dau ni kawabokotaki muni. O cei oiko mo dau ni vakalelewa. ¹³ Mo varogocia na kwa lei kwai, nikua se qwata ba na lakha ina koro. Vayabaki mai so keni me rewa na kwa. ¹⁴ O cei na kilatia na kwa ina yaco i qwata; kha na yava na lem cola o a cedre boto mai vasewasewa boto o a weXe leqwa vasauri. ¹⁵ Mo ba kwaya, me vataraia boto na Kalou me ba cola meta tara kwe kha sokwe. ¹⁶ Ia okwe o dokadokaia vali na lem i tuvatuva. Na dokadoka e i valavala ca. ¹⁷ Me lia va vatikem e kilatia na tara na kwa vina kha tam tara va koya e i valavala ca.