¹ Mini nuram Sampati kakic animi, Mari Mekdaliniwa, Meri Jemsin anowa akac Salome acnami manacim pofumuc ayac umanareni Jisasin ofatac acankarani yerere bam masic pacX beyo. ² Fesi wiki namba wani nurami acaman uronini yeni yerere bam masicpaci beyo. ³ Yeni yeweke yenyirani macnin tebewayo, iyeci bam masikakena onocbami yomanan dautenafino. ⁴ Mini nuram yukam macde onami, mana wainta mini onoc gami gani yomanan deno, afo mini anocgane iyena ukami gano. ⁵ Afo yeni mini bam masic anduntin undeni yeweke yeni onami mana yampara wantan iyac amai korosin uremi yiyan akumpaci kuman tani, yeni onareni eran yinduci reyo. ⁶ Yewekem beni yemi tiyimemi temi, ikeni iyewakaci pekako. Jisasi Nasaretikena wanta wani ikeni apakac yano, yeni bemi kekac yasaci iyeyone. Aci yeweken beni ukukemi make iyewaci makac beno, onaka bemi duka keyom betikine. ⁷ Micnimukemifo ikeyaci orekac Pita namac benic yokam waintau kaci tiyimekaci tec ici benaremi Galilici bemifo. Mifac orekaci bemi onakowani mikac beni acnani tiyimenin kake. ⁸ Anasiuci bam masikinken acdeni iyayeno . Yeni anon indintim ben iyena pekantimi bano, mini andandan oneyonare. Afo yeni pekantimi beni mana waintawac iyen tameno. ⁹ Afo Jisasi masipinke ukukemi fesi wiki fesi kukakantaci Meri Magdalan okankafic memi . Beni seveni manda spiritiuc dukanim, Jisasi yomanan ankanin inini. ¹⁰ Beni yereremi Jisasin namac noyou yikunantim be ificde bayon kimi bemoni. Beni nec onenafi mini maro tiyimemi. ¹¹ Afo beni tiyimemi , Jisasi yembekem ayumi baci onekon temifo, iyewaci yeni puka indiric eno . ¹² Mini kukakar acnayempaci kantan disaipoli Jerusalemike ena makufac bewayomi Jisasi ena baric muemi yukankafic emi. ¹³ Afo mini kaci yekanda yen ben onakarac ureni, yeweke yekanda Jerusalemici beno. Yeni nec ampamenafi, mini maro benamac nokeyouni tiyimeni yeni puka indiric iyemeno. ¹⁴ Icnayemi Jisasi leweni aposoliuc yunanewayonkaci ye afotafic emi. Ben ayumi bani onare mare tiyimewayoni, yen yicnomi oyic mukanini iyewaci puka indiric oyomi, beni mini kafani yisemi. ¹⁵ Beni macnin tirem yemi tiyimemi , “Beka mana maka acnonka umacden awafac awokuc baya tiyimeko! ¹⁶ Iyeci bilivic urem nomi marantenafi, Gotim bemi yewekemi maranteno, afo iyeci iyewac biliwic intenafi beni kokimi ukukanteno. ¹⁷ Iyem waintaukaci bilivic inteyafo mini makiuci yempaci binteno. Yeni manda spiritiuci tentiwitimi yomanan deni yeweke yeni oyam bayasapatemi bayani tinteyo. ¹⁸ Micnimukami yeni yiyamponi meani pakareni yeweke benic posini namandane iyewaci yemi mandem mandac uyinkanteno. Yen yiyami manan uinawikim banayo usaci dani yen yikuci maro kakic manteno. ¹⁹ Icnayem paci, Iyeno yem waya tinimiremi afo beni yereremi marumpac undemi yewekem Gotin ayan akumpaci kumandeno. ²⁰ Afo benic yokam waintauke yerereni umacdepaci oreni bayani tiyime wayomi yeweke iyenowaci yemi yofa-ewani yeni mirikoliuc baci uwarewayo.