¹ O yau o Paula, na leya talatala o Jisu Karisito, a lai covi me apositolo; a qu lesu me qu kwa na tukutuku oka ni Kalou. ² O keya a yala taki ni i mata o keya aru tata taki niya na leya parofita ina i vola tabu. ³ E vuku o luveya o Jisu Karisito na ledu Turaga o keya a sucu mai na leya kawa o Tevita me kodaki e lala. ⁴ O keya e vatakeya na kaikai ni tucake tale mai na mate, ni luve ni Kalou, me kodaki e yalo savasava. ⁵ O keya madu vou rewajiya muni ke na loloma qainiya na cakacaka va avositolo, meru vabaujiya meru talai rewarewa o rau na lewe ni vanuwa taucoko ga, balejiya e yaca. ⁶ A mutu vo lai covi devu kodaki muni ke o mutou me lemutou o Jisu Karisito. ⁷ O mutou taucoko na nokoto mai Roma, o mutou na lomaniya na Kalou, o mutou na lai covi me mutu yalo savasava; me lemutou na loloma qainiya na vacegu mai vuwa na Kalou o momo qainiya o Jisu Karisito na Turaga. ⁸ Mequ tekivu, o Jisu Karisito qu vou vaokaoka vuwa na lequ Kalou balejiko mutou taucoko ga, nivo lai kwai vuravura taucoko na lemutu vabaujiya. ⁹ Ni vo lequ vadjinadjina na Kalou, o keya aqu qwaraviya evu mai qu yalo ina i tukutuku oka mai vuwa o luveya, jika ni mudu na leya cavu jiko mutou ina visiga ina lequ masu. ¹⁰ Ni qu vo dau masu, me kiya na gauna mequ kalougata ke ina leya lewa ni Kalou mequ yacoviya yaji vuwako mutou. ¹¹ Aqu okajiya valevu mequ daniko mutou, mequ soliya vuwako mutou nai solisoli vayago, me mutu vadeitaki niko mutou ke. ¹² Medu kala vacegui i na vuku ni lemutu vabaujiya qainiya na lequ muni. ¹³ O mutou na viwekani, qu jikai ni okajiya me mutu numidei niya, niqu vo nakijiya valevu mequ la yaji vuwako mutou, (qu taro viya ga me yacoviya na siga ikwe,) me kiya na kequ yaga ina kemutu vimama, me kodaki muni na kedru vimama na vimatanitu kani kiya. ¹⁴ E dodonu vuwako au mequ jiya i talatala vuwadru na kwai Kirisi, vuwadru tale ga na lewe ni vanua wale; vuwadru na vuku qainidru muni na tasi vuku. ¹⁵ A kodaki ke, me kodaki qu vo rewajiya qai niya qu yalo sara ke mequ vunautaki nai tukutuku oka vuwako mutou muni mai Roma. ¹⁶ Niqu tasi maduwa taki niya nai tukutuku oka o Karisito: ni o keya ikwe na kaikai ni Kalou me va colai ke o rau yakiya eru vabaujiya: a simata vuwadru na Jiu, vuwadru muni na matanitu kanikiya. ¹⁷ Nivo vatakeya ke, nivo vadonu nidru na Kalou ina vabaujiya meru vo vabaujiya: me kodaki na kwa e volai, "I na cola ina vabaujiya o keya e Yalo dodonu." ¹⁸ Nivo lai kilai mai lomalagi na oca ni Kalou ina ledru i varau bura taucoko ga qeiniya na ledru tasi-dodonu na tamata, eru taroviya nai vavuvuli djina i nai varau e tasi dodonu. ¹⁹ Nivo tolaviya ina kedru vimama na kwa ni Kalou e kilai rewa, evo vata keya vuwadru na Kalou. ²⁰ Nivo lai dani na kwa ni Kalou e cilo tu, io, na leya kaikai tawa mudu qeiniya na leya no vaKalou, avo lai kilai devu na vikwa e buli, ina gauna a buli ke o vuravura; o keya ikwe e jikai ke na ledru i ulubale. ²¹ Io, niru vo kilajiya no na Kalou, se me vaokaoka; evo liyaliya mai na ledru numiya, avo gilogilo mai eru yalo avo rarawa. ²² Eru kwa no eru vo vuku, eru vo riva mai. ²³ Aru sosomi takiniya na kakarama na Kalou e jikai ni mate rewa, na matakau me kodaki na tamata eru vo mate, qeiniya na manumanu vuka, seiko niya na manumanu eva e la, qeiniya na vikwa e qani. ²⁴ O keya avo deinidru ke na Kalou me qeleqelewa na keya dodonu ke eru yalo, meru vaburabura niya ke eru yaga vainidru. ²⁵ Eru vo vasosomitaki nai vavuvuli djina ni Kalou, ina kwa e giritaki boto, aru soro ke na kwa e buli qai jikai o keya e buliya, o keya e leya na varokoroko e jikai ni mudu. Emeni. ²⁶ O keya a danidru ke na Kalou meru tekuciya na dodomo vasisila, niru vo vai sosomi takiniya o rau na ledru yalewa nai varau a lesi na kanikiya e jikai ni lesi. ²⁷ E kodaki muni ke o rau na teigwane, eru daniya nai varau e lesi vata qainidru na lewa, e mudre na ledru vidomoni vainidru, aru vaveya o rau na teigwane na kwa bura sara qainidru na teigwane, avo cava ke vuwadru nai sau ni ledru varau cala. ²⁸ Niru vo tasi okajiya meru kilajiya na Kalou, a danidru na Kalou meru yalo kanikiya, meru vaveya na vikwa e jikai ni kilikili qeinidru. ²⁹ Meru vuqa ina kwa taucoko ga e bura , ina yalo bura, ina vi vaburaburataki, meru vuqa ina toko mata, ina vileji, ina vivakwaisini, ina yalo e ocaoca, meru visasauvene. ³⁰ Meru dau kakase, meru burajiya na Kalou, meru vosalevu meru viyaviya levu, meru dokadoka idru, meru vavuniya na bura, meru vawacike vuwadru na tuqwaqwa. ³¹ Eru tasi yalo makuga, meru yalayala aru giri tale, aru bura jidru o rau wekaya, eru jikai ni yalo loloma. ³² Niru kilajiya no na leya lewa na Kalou, e dodonu me mate orau eru vaveya na vikwa boto ga o rau, eru okajidru muni eru dau vaveya.