¹ Ni vo qwata, aru boseiya o Jisu o rau taucoko na bete levu vata o rau na ledru qase na tamata, meru vamateniya. ² Ia niru vo vesukiya, eru vo meiya yaji, aru soliya vo Ponitio Pailato na kovana. ³ Ia o Jutasa, o kiya a soliya yaji, ni vo tolaviya ni vo lewaiya me mate, a qai vivutuni, avo vasukaniya na jiki ni siliva e tolusagavulu vuwadru na bete levu vata vuwadru na qase. ⁴ A qai kwa, Aqu vo cola niqu a soliya o kiya a tasi cala me mate. Aru qai kwa, Vo bale vacava voko madou? vo balejiko ga. ⁵ Avo biujiya o kiya na vijiki ni siliva ina were ni soro, a unu yaji, a lai kunajiya. ⁶ Aru vo kau na vivuki ni siliva o rau na bete levu, aru qai kwa, Evo tasi tara me biu ina Kato ni kamunaga ni were ni soro, ni jiya sau ni mate. ⁷ Aru qai bosejiya, meri voliya ke na jiki ni vanuwa ni tuli kuro, meri bulu ke o rau na vunilagi. ⁸ O kiya ikwe vo vayacani ke na jiki ni vanuwa igi, "Na jiki ni vanuwa ni dra", me yacoviya mai nikua. ⁹ Evo qai vayacori ke na kwa o Jeremaia na parovita, a kwa, Aru vo kau na jiki ni siliva e tolusagavulu kai voli o kiya vo volitaki, o kiya aru vo volai o rau nai luve ni Isireli, ¹⁰ aru vo soliya mei voli ni jiki ni vanuwa ni dautuli kuro, me kodaki ni vo kwakwa vuwako na Turaga. ¹¹ Avo tu o Jisu e mata na kovana, avo tarogiya na kovana me kwa, O vo ledru tui na kwa Jutia se jikai? A qai kwa vuwa o Jisu, "o vo kwa jina mai." ¹² Ia ni ru vo beitakiniya o rau na bete levu vata o rau na qase,a vo tasi kwakwa o kiya. ¹³ A qai vuwa o Pailato, o jikai ni varogo na levu ni kwa ru beitakiniko ke? ¹⁴ Avo tasi qai saumiya tale o kiya e kiya na leya kwakwa, a qai ke o kovana. ¹⁶ Avo nokoto vuwadru e kiya e vesu tu, e rogo sara, e yaca o Parapa. ¹⁷ O kiya niru vo soqoni vata mai, a qai kwa ke vuwadru o Pailato, O cei mutu okajiya me qu serekiya vuwako mutou? o Parapa se o Jisu, o kiya e yaca na Karisito? ¹⁸ Nivo kilajiya o kiya eru vo soliya yaji niru vo vuvutakiniya. ¹⁹ Ia ni vo nokoto bale no i na vanuwa ni vilewai,a vo vatala mata vuwa na leya yalewa, a kwa " Me kuwa ni kiya na kwa o vaveya vuwa na tamata dodonu igi. ni qu vo rarawa valevu nikua niqu a tadraia no. ²⁰ Avo vadrejiya vuwadru na lewe levu o rau na bete levu vata o rau na qase,me ru kereviya o Parapa, me mate o Jisu. ²¹ A qai kwakwa na kovana, qai kwa vuwadru, " O cei vuwadru na lewe ruwa ikwe mutu vo okajiya mequ serekiya vuwako mutou? Eru qai kwa, o Parapa. ²² A qai kwa vuwadru o Pailato, E cava mequ vaveya vo Jisu, O kiya e vo jiya Karisito? Aru vo kwa taucoko ga vuwa, me lai vako ga i na kauvelatai. ²³ A qai kwa na kovana, A cava mequ na kwa bura e vaveya o kiya? Aru qai kula valevu ga, meru kwa, me lai vako ga ina kauvelatai. ²⁴ Nivo tolaviya o Pailato vo tasi yaco na kwa e kwa, aru vo lwe mai na tamata, a qai kau e kiya na wai,a vo vuluvulu eru mata na lewe levu, a qai kwa, "Oi au, qu na tasi tarogi ke na leya mate na tamata dodonu ikwe evo balejiko mutou ga." ²⁵ Aru vo qai kwakwa taucoko ga na tamata, meru kwa, "Balejiko madou vata o rau talega na lemadu i luve, na leya mate." ²⁶ A qai serekiya o Parapa vuwadru, ia ni vo vakan kuitakiniya re o Jisu, a qai soliya yaji me vakoji ina kauvelatai. ²⁷ Ia o rau na sojiya ni kovana eru vo meia o Jisu na were ni turaga, aru vasoqonidru vata ke na mata sojiya taucoko. ²⁸ Aru vo luvajiya na leya i sulu, aru vaisuluniya e kiya nai sulu dradra. ²⁹ Aru takiya e kiya na i sala vavotoa, aru qai vasalajiya ke, aru turiya e lima matau e kiya na sina, aru qai jikituru e mata, aru qai varivarivaciya, aru kwa, "Sa loloma, na ledru Tui na kwai Jutia!" ³⁰ Aru vo katasivijiya, aru kau na siga aru warociya e ulu. ³¹ Ia niru vo varivarivaciya oji, aru vo luvajiya na i sulu, aru vaisulujiya ina leya i sulu jina, aru qai meiya yaji meru vakojiya ina kauvelatai. ³² Ia niru vo la yaji, aru vo daniya e kiya na kwai Kirini, e yaca o Saimoni: O kiya aru vasauraratakiniya me dagi na leya kauvelatai. ³³ Ia niru vo yaco i na yasana e vatokai o Kolikoca, (na keya i balebale, Na yasana ni qavokavoka). ³⁴ Aru vo soliya vuwa na wai winiwini vo viwaki vata na kwa gaga me somiya. Ia ni vo tovoliya o kiya a duwa na somiya. ³⁵ Aru qai vakojiya ina kauvelatai, aru vo votaia na leya i sulu, ina vawiri madjigi: ³⁶ Aru vo vatawaniya no. ³⁷ Aru vo vakojiya i yata me donuiya e ulu nai vola ni kwa a beitaki vuwa. "IKWE O JISU NA LEDRU TUI NA KWAI JUTIA" ³⁸ Avo qai lai vako vata ina kauvelatai e lewe ruwa na daudriva, e kiya e lima matau, e kiya e lima mawi. ³⁹ Ia o rau eru yato no, eru vo kwakwa burajiya ni ru vo kurejiya eru ulu. ⁴⁰ A qai kwa, O iko vo basukiya na were ni soro, o vaveya ena bogi tolu, vacola niko re kodaki o jiya luve ni Kalou, mo siro bale mai na kauvelatai. ⁴¹ Avo kodaki tale ga ke o rau na bete levu, vata o rau na vunivola vata o rau na qase, eru vo varivariva, eru kwa, ⁴² O kiya e dau vacolanidru na tani, e tasi vacolaniya re. Evo ledru Tui na Isireli o kiya, me siro bale mai re ina kauvelatai, madu na qai vabaujiya. ⁴³ A dauvararavi o kiya vuwa na Kalou, me vacolaniya re ni kuwa o kiya, kodaki e okajiya o kiya nivo kwa, O i au na Luve ni Kalou. ⁴⁴ O rau muni na dau driva, eru vakoji vata ina kauvelatai,eru go varivarivaciya me kodaki ke. ⁴⁵ ocqai gilogilo na vanuwa taucoko, avo vatekivu mai nai ka ono ni kauwa me yacoviya nai ka ciwa auwa. ⁴⁶ Ia ina i kaciwa ni auwa avo coco o Jisu ina domo levu, a kwa, Ilai, Ilai, lana sapakicanai? e keya balebale, Lequ Kalou, lequ Kalou o vo buiji au ina vuku ni cava? ⁴⁷ Ia yavalu vuwadru na no voleka, niru vo varogo, eru vo kwa na tamata ikwe e coviya o Ilaija. ⁴⁸ Avo wavu sara kiya vuwadru, avo qulumiya e kiya na vutovuto, a toniya vuwa na wai winiwini,a vivica vuwa e kiya na siga, a vasomuniya ke. ⁴⁹ Aru kwa o rau na vo, vadeiniya re, medu daniya se na lamai o Ilaija me vacolaniya se jikai. ⁵⁰ Ia o Jisu, ni vo coco tale ina domo levu, a qai vadeiniya e yalo. ⁵¹ Qai daniya a vo sei ruwa na i laji ni were ni soro e jiki i yata me kau bale mai ira, avo tovoli na vanuwa, avo wase ruwa na vatu yalevu. ⁵² Avo tadola mai na vibulubulu, avo levu talega eru yago na yalo dodonu eru moce tu, aru vo tucake tale mai. ⁵³ Ia nivo tucake tale mai na mate o kiya, aru vo lamai na vibulubulu, aru vo la ina rara tabu, aru vo lai tolaviya vuwadru na lewe levu. ⁵⁴ Ia na Turaga ni valu, vata o rau na no vata no meru vatawaniya o Jisu, niru vo tolaviya na tovoli ni vanuwa vata na vikwa vo yaco, aru vo mataku valevu, aru kwa, "E jina ga ni vo Luve ni Kalou o kiya ikwe." ⁵⁵ Eru vo lewe levu tale ga na lewa eru vo tolaviya vayawa o rau na tekuciya mai o Jisu i Kalili, niru dau qwaraviya. ⁵⁶ E kiya vuwadru o Meri na lewa ni makitala, vata o Meri la nene o Jemesa vata o Josese,vata ledru nene lai luve o Sepete. ⁵⁷ Ia nivo yavi, avo lamai e kiya na tamata vutuniyau, na kwai Aramaceya, e yaca o Joseva, o kiya tale ga la i jisaiveli o Jisu. ⁵⁸ Avo la vo Pailato o kiya, me kereviya e yago o Jisu. A qai kwa o Pailato me soli e yago . ⁵⁹ Avo kau e yago o Joseva a oloniya e kiya na sole linen e savasava, ⁶⁰ Avo vadaroniya ina leya i bulubulu vou, a cebejiya na vatu: a vaqiqiniya e kiya na vatu levu ina sogo ni bulubulu, a qai la yaji. ⁶¹ Avo nokoto no mai ke o Meri na lewa ni Makitala, vata o Meri kiya tale, eru nokoto na vanuwa e doniya na I bulubulu. ⁶² Ia i veiqwata, ina siga taraviya na siga varau aru vo soqoni vata vo pailato o rau na bete levu vata o rau na farisi. ⁶³ Aru vo kwa, kemuni na Turaga, madou madu numiya ni dau kwa ni daunivicalai igi, ni colo no, Me oji re e tolu na bogi ena qai tucake tale mai. ⁶⁴ O kiya me mutu qai lewaia me sogo vakaikai nai bulubulu me oji re nai katolu ni bogi, ke ru qai lamai leya jisaiveli, Meri drivajiya, meru qai kwa vuwadru na tamata, Evo tucake tale mai na mate o kiya, ena qai levu cake ke na vicalai i bere, me bura valailai o kiya i mata. ⁶⁵ A qai kwa vuwadru o Pailato, Evo notu ga vuwako mutou e yavalu na i vatawa: mutu la, mutu vadeitakiniya me kodaki mutu vo rewajiya. ⁶⁶ Aru qai la, aru sogojiya vakaikai na i bulubulu, aru drivajiya na vatu, aru lesiya e yavalu na somiya meru vatawa.