¹ Ia niru vo toro voleka i Jeruisalemi me yaco i Pecifaki, i na uluniyataga ni violive, e vatalajidru e ruwa na leya jisaiveli o Jisu. ² a kwa vuwadru, Muru layaji i na rara lailai e vidonui qaneko muru, muru na daniya e kiya na yasa e noka tu, eru no vata no e luveya muru serekiya, meia mai voko au. ³ Ia kodaki e kiya e tata ke voko muru, muru kwa '' E ru vo yaga vuwa na Turaga; e na soliya sara o kiya. ⁴ E vo vai ke ikwe, me yacori ke na kwa e kwa na parovita. E kwa, ''Kwa vuwa e nokoto no mai Saioni, ⁵ 'Tolaviya e na lamai vuwako na lemu Tui, E yalomaluwa, e na vodokiya no mai e kiya na asa qainiya na luve ni asa.'' ⁶ A ru layaji na jisaiveli, ru vaveya me kodaki na kwa e varojidru vuwadru o Jisu. ⁷ A ru meia mai na asa qainiya e luveya; e ru tevukiya na ledru i sulu, ru vavodoniya ke. ⁸ E ru vo lewe levu sara ru tevukiya na ledru i sulu i calevu; eso muni ru musukiya na tula ni kai, ru biujiya i calevu. ⁹ Ia o rau na vo teimata, qanidru na bere, eru coco no qai kwa, ''Osana vuwa la i luve o Tevita! E vo kalougata o kiya e lamai e na yaca ni Turaga! Osana i yata sara!'' ¹⁰ Ia ni vo yaco i Jeruisalemi o kiya eru vo yavavala taucoko ga na lewe ni rara , eru kwa, ''O cei ikwe?'' ¹¹ Aru qai kwa na lewe vuqa, ''Ikwe o Jisu na parovita mai Nasareci e Kalili.'' ¹² A unu o Jisu i na were ni soro ni Kalou, e varovidru dai taucoko eru dau vivoli i na were ni soro; a vukiciya muni na ledru teveli eru vo vivoli i na were ni soro ni Kalou, eru vo visau i lavo, qainiya na ledru i nono o rau na dauvolitaki ruve. ¹³ A kwa vuwadru, e volai, Na lequ were e vatokai me were ni masu, ia mutu vo vaveya me ledru qwara na dau driva. ¹⁴ Aru vo lamai vuwa ina were ni soro eru yavalu na mataboko qeinidru na lokiloki; a vacola nidru o kiya. ¹⁵ Ia niru vo tolaviya o rau na bete yalevu vata o rau na vunivola na vikwa e vivakurabuitaki e vaveya o kiya, qanidru na luve yalai eru coco i na were ni soro, eru kwa, ''Osana vuwa na lai Luve o Tevita! eru oca saraga, ¹⁶ Qai kwa vuwa o vo rogo na kwa eru kwa no o rau ikwe, se jikai? A qai kwa vuwadru o Jisu, '' Io! mutu vo jikai ni wilikiya, Mai eru gusu na i luve yalai vata o rau na sucu no, o vo vaveya me oka sara na varokoroko?'' ¹⁷ A vo biujidru tu o kiya, a vo ladei na rara i Pecani, a lai moce ke. ¹⁸ Ia i vaiqwata ni vo lesu tale no i rara, a vo mata kana. ¹⁹ A qai daniya e kiya na vunilolo i calevu, a vo lake, a tasi tolaviya ke e kiya na kwa, e rau boto ga qai kwa ke, mo kuwa tale ni vuwa me tawa mudu,a vo wave vasauri na vuni lolo. ²⁰ Ia niru vo tolaviya na jisaiveli, eru vo karacidru, eru kwa, ''E kodaki i vei ni vo wave vasauri na vuni lolo? ²¹ A qai kwa vuwadru o Jisu, aqu vo kwa kwadjina vuwako mutou, kodaki e notu vuwako mutou na vabaujiya, me jikai na vajijiqa, mutu na tasi vaveya wale ga na kwa a yaco vuwa na vuni lolo, ia kodaki mutu na kwa talega i na uluniyataga ikwe, mo cavu dai, mo biu i wasa liwa ena yaco ga. ²² Vata na kwa taucoko mutu kereviya ina masu, ni mutu vo vadjinajiya mutu na rewajiya. ²³ A vo unu o kiya i na were ni soro, ia ni vo vatavuvulino, aru vo la mai vuwa o rau na bete levu vata rau ledru qase na tamata, aru vi kwa, ''O vo lesi mai mo vaveya na vikwa ikwe? ia o cei a soliya vuwako na i lesilesi ikwe?'' ²⁴ A qai kwa vuwadru o Jisu, A qu na tarogiko mutou talega e kiya na kwa, kodaki mutu na kwa vuwako au, a qu na qai kwa talega vuwako mutou, se qu mai vei mequ vaveya na vikwa ikwe. ²⁵ A vu mai vei la vavitaiso o Joni? Mai lomalagi, se mai na tamata? Aru vo vikwayakiniya vainidru, ''Kodaki du kwa, 'E vu mai lomalagi,' ena qai kwa o keya vuwako datou, 'Ia ni mutu vo tasi vadjinajiya ina vuku ni cava?' ²⁶ Ia kodaki du na kwa, E vu mai i na tamata, du na matakucidru na lewe levu ni ru vo vakasama taucoko ga ni vo parovita o Joni. ²⁷ Aru vo kwa vo Jisu, madou madu tasi kilajiya. A qai kwa vuwadru o kiya, A qu na tasi kwa talega vuwako mutou se qu a lesi mai mequ vaveya na kwa ikwe. ²⁸ Ia na cava mutu lewaiya? E kiya na tamata e lewe ruwa na lai luve teigwane, avo la vuwa na qase, a kwa vuwa, Luvequ, lai cakacaka nikuwa ina lequ were ni vaini. ²⁹ A qai kwa vuwadru o kiya, A qu vo tasi okajiya, ia vo qai vivutuni i bere, a la. ³⁰ A qai la vuwa o kiya e luve, a kwa vuwa, Aqu vo la, ia a tasi qai la. ³¹ O cei vuwadru e tekuciya e yalo la momo? E ru qai kwa vuwa, o kiya e qase. A qai kwa vuwadru o Jisu, Aqu vo kwa vaijina vuwako mutou, o rau na soqoni a nai vacavacava vata o rau na dauteigwane, eru na unu i mata vuwako mutou i na matanitu ni Kalou. ³² Ni vo lamai vuwako mutou o Joni i na varau ni yalo dodonu, ia a mutu qai tasi vajinajina, Ia mo rau na soqoniya nai vacavacava vata o rau na dauteigwane, eru vadjinajina: ia o mutou, ni mutu vo daniya, mutu qai vivutuni bere, me mutu vadjinajina. ³³ Mutu varogo e kiya tale na kwakwa vatautauvata: E kiya na tamata e taukenijiya e kiya na were, avo teiya e kiya na were ni vaini, a vaveya na ledru were na i vatawa, a lisitakiniya vuwadru e yavalu na vatawa ni were, avo qai lai e kiya na vanuwa kanikiya. ³⁴ Ia ni vo voleka mai na vula i makuga, avo vatalajidru na leya tamata o kiya vuwadru e na vatawa ni were, meru kau mai e vuwa me leya i votavota. ³⁵ Avo qulumidru na leya tamata o rau na i vatau ni were, aru vo yaviya e kiya, aru vamateniya e kiya. ³⁶ Avo vatalajidru eru yavalu tale na tamata, aru vaveya me kodaki ke vuwadru. ³⁷ Ni vo devu, a qai vatalajia leya i luve vuwadru, a qai kwa, "Eru na varokorokojiya leya i luve.' ³⁸ a niru vo tolaviya leya i luve o rau na I vatau ni were, aru vo kwa vainidru, 'O kiya ikwe na i taukei mai bere, medu lai vamateniya, medu sugujiya na leya vanuwa me ledatou.' ³⁹ Aru vo qulumiya aru biliya i taudaku ni were ni vaini, aru vamateniya. ⁴⁰ a nivo lamai na turaga ni were ni vaini, na cava ena vaveya vuwadru na vatau ni were ikwe? ⁴¹ Eru vo kwa vuwa, 'Ena vamatenidru vararawa na tamata bura iqoi, a lisitakiniya na were ni vaini vuwadru eru kanikiya na i vatau ni were, eru na soliya vuwa e na vuwa i na keya yabaki. ⁴² Avo kwa vuwadru o Jisu, Mutu a tasi wilikiya na i volatabu, Na vatu aru a burajiya o rau na i matai ni were. Avo yaco mei vadei ina tutu ni were. Ikwe na cakacaka i Jiova, Evo jiya kwa vivakurabuitaki ve du mata? ⁴³ O kiya ikwe aqu vo kwa ke vuwako mutou, E na kau dei vuwako mutou na matanitu ni Kalou, me soli vuwadru na lewe ni vanuwa eru vuwatakiniya mai e vuwa. ⁴⁴ Ia o kiya e lutu ina vatu ikwe, ena dasila ke, ia o kiya ena lutuciya, ena vurumemeya me kodaki na volivoli. ⁴⁵ Ia niru varogobo rau na bete levu vata o rau na vunivola leya kwakwa vatautauvata, eru vo kilajiya na kwakwa tekucidru o kiya. ⁴⁶ Ia niru vo mata qulumiya, aru vo matakucidru na lewe levu, nori co vakasama ni vo jiya parovita o kiya.