¹ A vu covidru na leya jisaiveli e ru jini karua qai soliya vuwadru na kaikai me ru rewajidru ke na yalo velavela me ru varojidru ke, me ru va cola nidru ke na mate taucoko, qai nidru na malumalumu taucoko. ² Ikwe e ru yaca na jisaiveli e ru jini karua na i matai o Saimoni, e yaca talega o Pita qainiya o Adri la tacini, o Jemesa o luveya o Sepete, qaniya o Joni la tacini; ³ O Pilipi, qaniya o Pacolomio, o Tomasi, o Maciu na dau soqoni jiya na i vacavacava, o Jemesa o luveya Alifio qainiya o Cateo; ⁴ o Saimoni e kiya vuwadru na gumatua, qainiya o Jiutasa Isikarioji o kiya a soliya aji. ⁵ A vo vatala jidru na lewe jini karua o Jisu a vo kwa vuwadru, e varojidru e kwaya mutu kuwa ni la na ledru calevu na vimatanitu kanikiya, kuwa talega ni unu ina ledru rara na kwai Samaria. ⁶ Mutu la ga vuwadru na sipi ni mataqali ni Isireli e ru lavele tu; ⁷ ni mutu vo la no, mutu vunau, mutu kwa, 'Vo voleka mai na matanitu va lomalagi.' ⁸ Mutu va cola nidru na tauvimate, va savasavataki nidru na vukavuka, va tucake taki nidru na mate tu, varovidru na nitu ni mutu a rewajia wale ga, me mutu soliya wale talega. ⁹ Kuwa ni kau na koula, se na siliva, se na varasa i na lemutu taga. ¹⁰ Se na taga ni vaqa i calevu, se ruwa na curucuru se lai vava, se na i toko, e dodonu me soliya vuwa na tamata dau cakacaka na keya cawa. ¹¹ Io na rara qaniya na rara yalai yakiya ga mutu na unuviya, tarogiya o cei e yaga vuwa, mo lai no qaneya me yacoviya na lemutu la tale mai. ¹² Ni mutu vo unu i na were, mutu kidavaki niya. ¹³ Kodaki e vo yaga na were igi, me yaco ke na lemutu vi vacegui io kodaki e tasi yaga, me suka tale vuwako mutou na lemutu vacegu. ¹⁴ O kiya e tasi vacegu niko mutou, se varogo na lemutu tata, ni mutu vo ladei i na were se i na rara igi, kurejiya dai na kavukavu ni qwele vo mutu la. ¹⁵ A qu vo kwa vai jina vuwako mutou, e bura va lailai o Sotoma qainiya o Komora i na siga ni lewa, e qai bura valevu sara na rara igi. ¹⁶ '' Tolaviya, qu vo vatalajiko mutou yaji me kodaki na sipi kedru maliwa na wolifa, o kiya me mutu qai vuku me kodaki na gwata me mutu yalo oka me kodaki na ruve. ¹⁷ Mutu qarauniko mutou vuwadru na tamata, ni ru na soli ko mutou yaji i na mata vilewai , e ru na kana kuitataki niko mutou i na ledru vi were ni lotu. ¹⁸ Mutu na mei e ru mata na kovana qai nidru na tui balejiko au, me vajinajina vuwadru talega na vimatanitu tani. ¹⁹ Ni ru vo soli ko mutou yaji kuwa ni lomaocaoca se cava me mutu kwaya, me mutu kwa vacava ni na soli vuwako mutou i na tiki ni siga igi na kwa me mutu kwaya. ²⁰ Mutu na tasi kwa e kiya na kwa o mutou, io e na tata e yalo o Tamamutou, vuwa mutu yalo. ²¹ Io a ru vo kala solidru yaji na vitacini me ru va mate, qainiya o tamaya o luveya e ru na tale na i luve vuwadru na qase, a va vuniya na ledru mate. ²² Mutu na lai buraji vuwadru na tamata taucoko me balejiya qu yaca. o kiya vosojiya me yacoviya na i devudevu, e na vacolai. ²³ Io ni ru vaburaburataki niko mutou i na kiya na rara, mutu tuba i na kiya tale, ni qu vo kwa vuwako mutou, mutu na tasi vadevuciya na vi rara i Isireli, e na lamai re na luve ni tamata. ²⁴ E jikai ni na kiya na jisaiveli me oka cake mai leya vuwa na i vavuvuli se na tamata vuwa na leya turaga. ²⁵ E vo raujiya na jisaiveli kodaki e ru tautauvata qea na leya i vavuvuli, qaniya talega na tamata kodaki e ru tautauvata qainiya na leya turaga, ke kodaki e ru vacayania nai taukei ni were o Pielisipupi e ru na vavea valevu sara vuwadru na matavuwere. ²⁶ kiya ikwe me mutu kuwa ni qai matakucidru ni vo jikai na kwa e cilo me jikai ni varaitak mai, se me tabogo me kuwa ni kilai. ²⁷ Na kwa qu kwa vuwako mutou e na gilogilo, mutu kwa e na kakarama qainiya na kwa mutu varogo vo mutu bebe vunautakiniya i yataga ni were. ²⁸ Kuwa ni mataku cidru o rau e ru va mate niya na yago a ru tasi rewajia me vamate niya na yalo, io mutu matakuciya ga o kiya e rewajiya me varusaniya na yalo vata qeniya na yago talega mai eli. ²⁹ E jikai ni volitaki na Separo e rua e na kiya ga na ficigi? e jikai e kiya vuwadru e lutu ga i na qwele me tasogo vuwa o Tamamudou. ³⁰ A vo wili yakiya ga mutu rau ni ulu. ³¹ O kiya e cakitaki niko au e ru mata na tamata o au qu na cakitaki niya talega e mata o Tamaqu e nokoto mai lomalagi. ³² O kiya e na varaitaki niko au na mata ni tamata o au qu na varaitaki niya talega vuwa e mata o Tamaqu e nokoto mai lomalagi. ³³ O kiya e cakitaki niko au e ru mata na tamata, o au qu na cakitaki niya talega e mata o Tamaqu e nokoto mai lomalagi. ³⁴ Mutu kuwa ni vakasamataki niya ni qu lamai mequ kau mai vuravura na vi okaji, a qu tasi la mai mequ kau mai na vi okaji na i selewau ga. ³⁵ A qu lamai me ru tawase o rau na viluveni teigwane qeinidru na viluveni lewa qeinidru na vivugani lewa talega. ³⁶ Io ka meca na tamata o rau na leya vuwere. ³⁷ o kiya e vo loloma valevu vuwa o tamaya se la nene ka lailai voko au, e tasi yaga voko au o kiya e lomania valevu o luvea na teigwane se o luveya na lewa, e va lailai voko au e tasi yaga voko au. ³⁸ O kiya e tasi dagiya na leya kauvelatai qai tekuciko au, e tasi yaga voko au. ³⁹ O kiya e maroroijiya na leya cola, e na valaveleniya o kiya e na valeveniya na leya cola e vuku, o Jisu e maroroijiya. ⁴⁰ O kiya e vacegu ni ko mutou, e na vacegu ni ko au, o kiya e vacegu ni ko au e vacegu niya o kiya e vatala jiko mai. ⁴¹ O kiya e vacegu nia e kiya na parovita ni vo vadeitaki niya ni jiya parovita, e na rewajiya na keya i sau, o kiya vo vacegu niya na tamata yalo dodonu, ni vo tokoniya me tamata yalo dodonu,me rewa jia na keya i sau. ⁴² O kiya e soliya vuwa e kiya vuwadru ikwe e ru lailai ga, e kiya ga na bilo wai driwadriwa me somiya, ni vo vatokai me tisaiveli, a qu vo kwa vai jina vuwako mutou, ena tasi lavele sara vuwa na keya i sau.