¹ I hapen se afta we Jisas i stap travel i go raon long ol difren siti mo ol vilij, i stap prij mo stap talemaot gud nius abaot kingdom blong God. Ol twelfala disaepol tu oli stap wetem hem, ² Wetem samfala woman we JIsas i bin hilim olgeta long ol rabis spirit mo siknes: i gat Meri we oli kolem hem Magdaline, we i gat seven deimon oli kamaot long hem, ³ Joana, we i woman blong Jausa, maneja blong Herod; Susanna; wetem fulap narafala bakegen we aot long ol wanem we i bin holem olgeta, oli bin kam gud bakegen. ⁴ Taem we fulap man oli stap stanap olbaot mo ol man oli stap kam long ol difren taon blong luk Jisas, hem i talem wan parabol se: ⁵ "I gat wan man i go blong planem wit. Long garen blong hem. Taem hem i planem ol wit ia finis, hem i saksakem ol sit oli foldaon long rod. Nao bihaen ol man oli stanap long olgeta mo ol pijin tu oli kakae olgeta. ⁶ Mo sam sit oli foldaon long ol ston, mo taem oli stat gro, oli kam drae from we i nogat wota. ⁷ Mo sam narafala sit oli foldaon long ples we i gat nil gras long hem. Nao bihaen, ol rop mo plan i gro wantaem, mo rop ia i kavremap ol plan ia gogo oli ded. ⁸ Mo sam narafala sit bakegen oli foldaon long gudfala graon, nao oli gro mo oli gat frut we olgeta evriwan oli kasem hanred frut long olgeta. Taem Jisas i talem parabol ia finis, hem i singaot i talem se, man we i gat sorae, "Hem i mas lesin gud long tok ia." ⁹ Mo ol man blong Jisas oli askem parabol ia long Hem. ¹⁰ Nao hemi talem se, "Yufala, God i openem rod long yufala finis, blong yufala i save ol tok we i haet blong wei we hem bae i kam king blong ol man blong hem. Mo ol narafala man tu oli stap kasem ol toktok we hem i stap talem long parapol. Samting ia i mas olsem blong olgeta i save luk, be bae oli no save luk save mo taem oli harem, bae oli no save harem save." ¹¹ Jisas i go hed i talem se, "Mining blong parapol ia i olsem, sid ia hemi tok blong God. ¹² Ol sid we i foldaon long rod hemi olsem ol man we oli harem tok blong God be setan i karemaot ol tok ia long tingting blong olgeta blong oli no save bilif. Mo God i no save sevem olgeta. ¹³ Mo ol sid we oli foldaon long ston, hemi olsem olgeta we oli harem ol tok ia, oli glad long hem, be i no stap gud insaed long tingting blong olgeta, oli bilif blong smol taem be, taem ol samting oli kam traem olgeta, oli foltaon. ¹⁴ Mo ol sit we oli foldaon long medel blong rop we i gat nil blong hem, hemi olsem olgeta we oli harem ol tok ia, be oli no karem ol gudfala frut long laef blong olgeta, oli stap tingting tumas lomg ol samting long laef blong olgeta, mo ol samting ia oli blokem ol toktok ia long laef blong olgeta. ¹⁵ Mo ol sit we oli foldaon long gudfala graon, hemi olsem olgeta we oli harem tok ia, oli gat gudfala tingting mo oli holem strong long tingting blong olgeta mo oli obei long hem, oli mekem tingting blong olgeta i longfala nao oli gat ol frut blong tok ia long laef blong olgeta. ¹⁶ Mo Jisas i talem se, '"I nogat wan we i laetem laet, nao bihaen i kavremap long baket o i putum antanit long bed.Taem man i laitem laet, hem i putum antap long ples blong oli gat laet. ¹⁷ Long samfala fasin ol samting we i haet, bae God i tekem olgeta i kam long klia ples. Spos man i kavremap bae God i faenemaot mo soemaot long ol man. ¹⁸ Tok ia we yufala i stap harem, yufala i mas tingting gud long hem. Man we i kasem mining blong ol tok blong mi finis, hem bambae i save kasem moa nakegen. Be man we i no kasem nating, hem bambae i lusum smol waes ia nomo we hem i ting se i gat. ¹⁹ Nao long taem ia ol brata blong Jisas wetem mama blong hem oli kam blong luk hem, be oli no save kam klosap from we i gat fulap man tumas. ²⁰ Nao ol man ia oli talem long hem se, "Mama blong yu wetem ol brata blong yu oli stap aot saed oli wantem luk yu." ²¹ Mo Jisas i talem long olgeta se, "Mama blong mi mo ol brata blong mi oli olgeta we oli harem tok blong God mo oli stap obei long hem." ²² Wan taem Jisas wetem ol man blong hem oli klaem long wan bot nao hem i talem long olgeta se, "Yumi go long narasaed bigfala lagun ia." Ale oli pulum mas blong bot. ²³ Nao bot i aot Jisas i go slip. Nao wan bigfala win i kamdaon, i kasem lagun ia nao ol wev oli stap kam insaed long bot mo kolosap oli draon. ²⁴ Oli go wekemap Jisas, oli talem se, "Masta, Masta! Bae yumi traon nao. "Nao Jisas i girap i tok long win ia mo solwota, blong stopem tufala. Nao win mo solwota i stop mo evri samting i kam kwaet. ²⁵ Mo Jisas i talem long olgeta se, "Wem bilif blong yufala?" Be olgeta oli fraet mo oli sapraes tumas, oli stap toktok long olgeta oli talem se, "Olgeta! Hu ia man ia? Hem i toktok long win mo solwota, tufala i lesin long hem." ²⁶ Nao oli go tru long ples blong ol man Gerasawe i stap narasaet long bigfala lagun ia mo oli go so. ²⁷ Taem Jisas i go so wam man long taon ia i kam luk hem. Man ia i gat ol devel i stap long hem hem i no werem klos mo hem i nomo stap long haos blong hem, be hem i stap long beregraon nomo. ²⁸ Taem hem i luk Jisas, hemi krae aot mo i foltaon long fes blong hem mo hemi singaot long wan laod vois, "Wanem nao bae yu mekem long mi, Jisas, pikinini blong God we hem i hae olgeta? Mi askem plis, no mekem mi harem nogud tumas." ²⁹ From Jisas i komandem ol toti spirit ia blong oli kamaot long man ia. From i bin kat fulap taem oli bin stopem hem, mo oli bin fasem strong hem wetem ol jaen mo hankap mo oli bin kad gud long hem, be hemi bin brokbrokem ol jaen mo ol dimon ia oli pulum hem i go long drae ples. ³⁰ Be Jisas i askem long hem se, "Wanem nem blong yu?" Hem i talem se, "Bigfala kampani." Hem i talem olsem from we i gat plante devel i stap long hem. ³¹ Nao ol devel oli askem long Jisas se plis yufala no saenemaot mifala i go lus long hel, long hol ia we i go daon tumas. ³² Long ples ia tu, i gat plante pig oli stap kakae long saed blong hil mo ol devel ia oli krae long hem se, "plis yu letem mifala igo insaed long ol pig ia. ³³ Nao ol devel ia oli aot long man ia,oli go insaed long ol pig, ol pig ia oli ron i go daon long wan klif mo oli folfol daon i go long lagun ia, nao oli draon. ³⁴ Taem ol man blong lukaot long ol pig ia oli luk samting ia, oli ronwe, oli go talemaot nius ia long taon blong olgeta, mo ol narafala ples kolosap long taon ia. ³⁵ Nao ol man oli kam long taon blong luk wanem we i hapen, oli kam luk Jisas mo oli luk man ia we ol devel oli aot long hem finis, hem i stap sidaon kolosap long leg blong Jisas. Hem i putum klos finis, mo tingting blong hem ikam gud bakegen. Nao ol man ia oli fraet. ³⁶ Olgeta we oli luk samting ia long ae blong olgeta, oli stap tokbaot olsem wanem Jisas i mekem man ia we fastaem ol devel oli stap long hem i kam gud bakegen. ³⁷ Ol man long ples kolosap long Gerasa oli askem long Jisas blong hem i aot long ples blong olgeta from we oli fraet tumas. Nao hem i jam long bot blong go bak long narasaed bakegen. ³⁸ Be man ia we devel oli aot long hem i wantem tumas blong go wetem hem, nao hem i talem long Jisas se, "Plis yu letem mi mi kam wetem yu." Be Jisas i talem long hem se, ³⁹ 'Yu go bak long ples blong yu, yu talemaot ol samting ia we God i mekem long yu." Nao man ia i aot, i go long ol ples olbaot long taon blong hem, i stap talemaot ol samting we Jisas i mekem long hem. ⁴⁰ Taem Jisas i kambak bakegen long narasaed long lagun ia, ol man oli glad tumas blong lul hem from oli stap wet long hem. ⁴¹ Nao i gat wan man i kam luk hem nem blong hem Jaeras, we hem i wan lida blong haos blong prea blong ol laen blong Israel. Hem i kam nildaon long leg blong Jisas i krae long hem blong i kam long haos blong hem. ⁴² From we kolosap gel blong hem i ded. Gel ia hemi wan pikinini nomo we hem i gat, mo hem i gat twelf yia. Nao taem Jisas i stap wokbaot i go, ol man oli fasfas tumas klosap long hem. ⁴³ Mo i gat wan woman we i kam we hem i gat sik blong ol woman, mo sik ia i stap long hem blong twelf yia finis, mo i no save finis. Hem i lusum fulap mane blong hem long ol docta, be i nogat wan i save mekem hem i kam gud bekegen. ⁴⁴ Nao hem i kam bihaen long Jisas mo pusum han mo tatsem en blong klos blong Jisas. Nao wantaem nomo sik blong hem i finis. ⁴⁵ Nao Jisas i askem se, "Ei hu i tajem mi? Olgeta oli talem se, "Masta plante man tumas oli stap, yumi fasfas ia." ⁴⁶ Be Jisas i talem se, "No, wan man i tajem mi, mi mi harem sabe se paoa blong mi i aot blong mekem wan samting." ⁴⁷ Nao taem woman ia i luk we hem i no save haet, hem i kam be i seksek we i seksek mo i nildaon i ona long Jisas. Nao long fes blong evriwan hem i talemaot from wanem hem i tajem Jisas, mo i talemaot se sik blong hem ia i finis. ⁴⁸ Mo Jisas i talem long hem, "Dota blong mi, bilif blong yu i mekem yu yu gud bakegen.Yu go, yu nomo wari bakegen." ⁴⁹ Taem Jisas i stap toktok yet wan man we i aot long haos blong Jaeras i kam nao i talem se, "Smol gel blong yu ia i ded finis, i gud ia talem long tija ia i nomo kam." ⁵⁰ Be taem Jisas i harem tok ia, hem i talem long Jaeras se, "Yu no harem nogud. Yu bilif long mi nomo mo gel blong yu bae i kam gud." ⁵¹ Nao taem Jisas i go kasem haos blong man ia, hemi talem long man ia blong oli nomo folem hem, hem i tekem Pita, Jon mo Jemes wetem papa mo mama blong gel ia olgeta ia nomo oli bihaen long hem, oli go insaed. ⁵² Ol man insaed long haos ia oli stap krae we oli krae bigwan from gel ia, be hem i talem long olgeta se, "Yufala i no krae, gel ia i no ded ia. Hem i stap slip nomo." ⁵³ Ol man ia oli laf long Jisas from oli save se hem i ded finis. ⁵⁴ Be Jisas i holem han blong gel ia mo i singaot se, "Smol gel! Yu stanap!" ⁵⁵ Nao gel ia i laef bakegen mo wantaem nomo i stanap. Nao Jisas i talem long olgeta se, "Yufala i givim sam kakae long hem." ⁵⁶ Nao papa mo mama blong gel ia oli sapraes tumas. Jisas i talem long tufala se yufala i no mas talemaot samting ia long ol man.