¹ Ami Polu, musadi wa Nzambi, nidi thumwa wa Yesu Khidishitu muku sadisa athu awana asola Nzambi kikuma kya lukwikilu luowu ni kwijika kyedika kya mambu ma Nzambi. ² Mosu medi kaka mu kusha mutshima ku moyi wa mvula ni mvula mu kilaji kya hanini Nzambi wenda kuleka kudihuna, yanjika tangwa dikulu. ³ Tangwa dyenji ki dialunga: wa katungulula kisweki kya ndaka yenji mu malongi maphedi ami muku nulonga. Nya hangidi kisalu mwenekina mu lutumu lwa Nzambi muhulushi wetu. ⁴ Kudi ayi Tite, mwana wemi mu lukwikilu, khenda ni ngemba ya Tata Nzambi yikhadi nyayi. ⁵ Ami nya kushishidi ku Kleta, kikuma wushi yima yosu mu ndonga yitwa lekidi kumanisa, ni mukushia amambuta ma dibundu mu kosu dimbu phila yi nya kulongidi. ⁶ Mbuta dibundu kalungidiku ku khala ni kifu kia bola, afeti ku khala yala wa mukhetu mu moshi, ana jenji ephi afeti kukhala alemvuka, kilawu loni ni kukonda lujitu. ⁷ Mboti twadisi wudi ni kisalu kya tadila mambu ma Nzambi, akhadi wa konda kifu kya bola. Kakhalaloku ni lulendu, kwakula kwingi loni, kwivanga khabu jngi loni, kunwa maluvu lawu loni, kingolongolu loni, nzala yingi ya mbongu loni. ⁸ Kashi afeti ku khala muthu wenda kuyamba anzenza, ni kuzola kaka mambu ma waha, afeti ku khala muthu wa mayela, wa masonga, wa mboti, wenda kudiyala. ⁹ Afeti ku kangama kaka ku musamu wa kiedika phila ya yilongukidi, mu phila etshi ahungi athu kikesa mu malongi ma waha, asungiki ephi athu enda kuleka malongi menama. ¹⁰ Kikuma kudi ni athu engi kaku labangoku malongi menamana, Ajeneshi mu katshi ka ayuda enda kuhuna athu lawu mu pqnji jowu ja uzoba. Enda asenda athu lawu mu nzila ya lufwa. ¹¹ Mboti ku washya mu boloku kikuma enda kulonga mambu ma konda funu, ni kunona matapishi ma soni, enda kubwisa yikanda lawu mu kisakasaka. ¹² Mukatshi kowu yala mu moshi wa mayela wa kudidi etu : Enu akwa Crete nudi kaka akhubidi, nwa bola, nudi mudi ambiji akhabu, amolu nwa zola kaka kudia. ¹³ Kitemu eki kidi kia kiedika, kieni kioki wanganini kikuma asobi akhadi ni lukwikilu lwa ngolu. ¹⁴ Nulaboku epi panji jia hukhubidi jienda kulonga ayuda ni zi tshiku ziathu jenda kuvengumuna mambu ma kiedika. ¹⁵ Athu awa edi ni mitshima ya pimbu, mambu mosu medi ma waha; kashi awa edi ni mitshima wa bola adizanga ni kudibebisa mu jitshiku jiowu. ¹⁶ Enda kwakula etshi ejiya Nzambi, Kashi mambu menda kuhanga, menda ku wafunda etshi kejiku Nzambi. Edi athu ambi, ka kwivilangoku Nzambi, yisalu yowu epi yosu ya bola.