¹ Kuyanjika kwa panji jia waha jidi kwakudilanga Yesu Khidishitu, mwana wa Nzambi. ² Mbikudi Yesaya wa sonikini mu mukanda wenji etshi: "Talenu, nia tumisa ngenji wemi kudi enu. Mweni waka kuhangikila nzila. ³ Yidi ndaka ya muthu wudi kwakudilanga mutemu mudi fufuma, etsi: 'Hangikenu ndjila ya fumu, selenu miseya yikhadi yonunuka.'" ⁴ Yoani wejidi kubotika mu thotu ya zelu ni zelu ni kulonga mbotika ya kusoba yifu kikuma kia mvidishilu ya masumu. ⁵ Akwa kifutshi kia Yuda osu ni akwa Yeluselemi akedi kwenda kudi mweni. Akhedi kuwa botika mu meya me Yoludani. Akhedi kukumbula masumu mowu. ⁶ Yoani wa vwatanga muledi wa mavuji ma mikoku ni mukaba wa kiketa kia mbiji wa mutemu. ⁷ Wakhedi kulonga etshi : "Muthu wu kwizanga kumanima memi wudi ni ngolu jia hita jiamemi, nia lungidiku kukasulula mishinga ya sapatu jienji. ⁸ Ami, nienda nia nu botikidi mu meya, mweni waka nu botika ni pevi la Longu." ⁹ Mejidi kubwa etshi kilumbu kienakina Yesu wejidi kudimbu dia Nazaleti mu thotu ya Galilea, amubotiki kudia Yoani mu meya ma Yoludani. ¹⁰ Tangwa Yesu awudikidi mu meya, wa mona wulu dianzuluka, pevi ya mu kulumukima mudi bembi. ¹¹ Wevwa ndaka ya katuka ku wulu yakula: " Ayi wudi mwan'emi wu nia zola hengi. Wenda kunguhwa kieshi." ¹² Kumanima pevi ya mu senda mu thotu ya zelu ni zelu. ¹³ Wakhedi yilumbu makumi mawana mu thotu ya zelu ni zelu. Satana weza kumu hukumuna. Wa jinganga ni ambiji a mutemuni, awanjo ni ku mu hangila. ¹⁴ Ku manima ma kusha Yoani mu boloku, Yesu wendidi ku Galilea mu kulonga tsangu ya mboti jia Nzambi. ¹⁵ Ni kwakula etshi: "Tangwa dia lunga, kifumu kia Nzambi kia kokuluka, balulenu mitshimia, kwikilenu ya mboti." ¹⁶ Tangwa dia kibanga mu khulu ya jiya dia Galilea, wa mona Simoni ni Andela pangi wa Simoni waatanga wanda mu meya, kikuma akhedi alowi. ¹⁷ Yesu wa waleza, yizenu nu ngu labi, ni kunwikinisa alowi athu. ¹⁸ Mumbala yimoshi, ashisa wanda amu laba. ¹⁹ Yesu kia kibanga wa mweni halaha, Jaki mwana wa Zebede ni Yoani mwakienji, akhedi mu watu ahangikanga mawanda. ²⁰ Wa watambika, ashisa tat'owu Zebede mu watu ni athu jiowu akisalu, eni amu laba. ²¹ Wendidi ku Capernawumi, kilumbu kia lumingu, Yesu waya ku inzu ya yisambu wa yandjika kulonga. ²² Athu ayitukidi mu kwivwa malongi menji, kikuma ka longidiku mudi afumu atshiku.Mweni wa longanga ni kifumu kiosu. ²³ Kaka tangwa dienedina, muthu mumoshi wakhedi ni pevi jia bola mu inzu ya yisambu wakula kiangolu. ²⁴ "Ekhi yidi ha katshi ni etu ni ayi Yesu wa Nazaretha? wejidi kutu mwanga? Niejiya mboti nani wudi, ayi wa konda masumu wa katuka kudi Nzambi." ²⁵ Yesu wa nganina pevi ya bola, wa yileza etshi: "Dibati, wudika mukatshi ka muthu oyu." ²⁶ Pevi ya bola ya mu bwisa hashi, ya wudika kudi muthu mweni, ni kwenda ni kutatula kiangolu. ²⁷ Athu osu ayituka, ayanjika ku dihula owumweni, "Ekhi yiyi? Malongi ma katataka ma kulonga ni kifumu kiosu. Wenda wakula ni jipevi ya bola ni kumwivila." ²⁸ Swalu, tsangu jia Yesu jia kibidi mu thothu yosu ya Galilea. ²⁹ He tangwa dia wudika mu nzu ya yisambu, waya kunjia Simoni ni Andela, owuosu ni Jaki ni Yoani. ³⁰ Mu kwenda ku tala mahenda wa mukhetu wa Simoni wakhedi wa langala, ni kuyela he aleza Yesu. ³¹ Tangwa dia tudidi Yesu, wa mukwata kukoku, wa muzangulusa. Makhashi mahwa, wa kola, wa yanjika kuhanga yima ya kudia. ³² Kingweja kyenekina pipa kubwa kadi loni, ayandjika ku munehina athu osu akhedi ni makhashi ni awana akhedi ni pevi ja bola. ³³ Dimbu diosu dyeza kuzala ha kisu kya nzu. ³⁴ Wa hulushidi athu lawu akhedi ni makhashi ma mutshindu ni mutshindu ni awana akhedi nu pevi ja bola, kahwediku pevi ja bola tangwa dya kwakula kikuma ja khedi kumwijiya. ³⁵ Watokimini mu suka suka diosu kuma ki kwakhedi ni kapipa, waya kukhala enji mweni wa yanjika kusamba Nzambi. ³⁶ Simoni ni athu akhedi nawu ayanjika ku muhenga. ³⁷ Amu mona amu leza etshi athu osu henda akuhenga. ³⁸ Mweni wakula etshi twendenu kuma kweka ni mu membu mekha kikuma niendi kulonga epi. Kieni kioki niejididi. ³⁹ Aya mu thotu yosu ya Galilea yandjika kulonga mu manzu mosu ma isambu, ni kukanga jipevi jia bola. ⁴⁰ Muthu mu moshi wakhedi ni makhashi ma bwashi weza kudi mweni, wa yandjika kumu bondila, wa fukama wa lomba lusadisu ni kwakula, ivwa wa zola walunga kungu kodisa. ⁴¹ Yesu khenda jia mukwata wa tandulula koku dienji wa mukwata, wa muleza etshi : Nia zola. kola. ⁴² Thama loni, bwashi dia mukatuka muthu wakola. ⁴³ Yesu wamu lekisa kwakula wamu leza ndanga wendi kweyi. ⁴⁴ Wamu leza etshi ulezoku muthu ndanga wudi lombuludi kudi anganga Nzambi uhani makabu ma kukatula nvindu ma sonikini Moise mu mikanda yenji. Kikuma uhani kimbangi kudi heni. ⁴⁵ Mweni kama, wa wudika wayanjika kwenda kuleza athu osu, ni kwenda kulonga ndaka ya Nzambi he Yesu phila kulonga ephi ndaka ya Nzambi loni mu membu mekha. Kyeni kyoki wa sola kasu homa ha moshi enjimweni. athu ayandjika kwiza muma mwosu.