¹ Kiela Yesu wa manisa mu kwakula mambu menamana, wa katuka ku Ngadidi waya ku thothu ya zude mu sambwa dia Yordani. ² Athu lawu a mu labanga, mweni wakhedi ku wa wuka. ³ Afadishi ejidi ku mwakusa ni ku mu meka, a mu leza etshi: "Tshiku yenda ya hana njila kudi yala mu kujiya wala kikuma kia koshu diambu?" ⁴ Yesu wa vutudidi etshi: "Kandiku nu tanganga etshi oyu wa wa wa hangidi mu kishina, wa hangidi yala ni mukhetu. ⁵ Mweni wakudidi epi etshi: "kienikioki yala wa ka katuka kunzu ya tata endji ni mamenji, waya kubundangana ni mukhetu wendji, owu mbadi akhekina muthu mumoshi." He kesuku epi athu mbadi, kashi ekhina muthu mumoshi. ⁶ Kienikioki yosu ya bunda Nzambi, kusiku ni muthu wu ku yi kapula. ⁷ Eni a mulejidi etshi: "Kikuma khiakhi Moshi a tu hwedidi ndjila ya kuhwa mukhetu mukanda wa kujiya wala ni ku muleka?" ⁸ Mweni wa waleza etshi: "Kikuma enu mutshima mia nu kola, kienikioki Moshi a nuhwedi ndjila ya kujiya wala ni akhetu jienu, kashi ku kishina makhediku kienekina lo. ⁹ Ami nia nu leza etshi, koshu wajiya wala ni mukhetu wendji, konda ku mu kwata ni kuta mbongi ni yala mwekha, waya kukwela mukhetu mwekha, mweni epi wata mbongi. Oyuna wa kwela mukhetu wa leka mu wala wata mbongi ni mweni. ¹⁰ Alonguki alejidi Yesu etshi: " Yivwa etshi mambu ma yala ni mukhetu medi kienikina, pila ya kukwela yishiku." ¹¹ Kashi Yesu wa wa lejidi etshi: "Keshiku athu oshu a lunga kukumbula malongi menama kashi kaka awana ahwa ndjila ya kukumbula. ¹² Kikuma kudi ni a thongu edi akobu yandjika kutetuka kowu. Kudi athongu ekha enda kutonguna kudi athu, kudi ni ekha adikhinisa athongu owu mweni kikuma kia kifumu kia ku wulu. Koshu muthu wamona etshi wa lunga kukumbula malongi menama leka a ma kumbudi." ¹³ He a mu nehinini kiatshi kia ana kikuma kia ku washia mokhu ha mutwa ni ku a sambila, kashi alonguki ayandjikidi ku wa nganina. ¹⁴ Kashi Yesu wakudidi etshi : "hwangenu ana bibi ndjila nu wa lekisa oku mu kwiza kudi ami, kikuma kifumu kia ku wulu kidi kudi athu edi a wa fwana eni." ¹⁵ Mweni wa washia mokhu ha mutwa, kumanima wa katuka henahana. ¹⁶ Tala, muthu mumoshi wejidi kudi Yesu wakula etshi: "Longi, ekhi ya mboti nia lunga kuhanga mu ku nona moyi wa mvula ni mvula?" ¹⁷ Yesu wa muleza etshi: " Kikuma kiakhi wudi ku ngu lombanga mambu medi mamboti? Muthu mumoshi kaka wudi wa pimbu, kashi wu zola ku nona moyi jitisa tshiku jia Nzambi." ¹⁸ Muthu mwenoyuna wa muleza etshi:" khia tshiku?" Yesu wa mu leza etshi: " Wu jiya oku muthu, wuta oku mbongi, wu kaba oku, wuta oku kithemu kia luvunu, ¹⁹ jitisa tatenu ni maminu, zola mukwenu mudi ayi mweni. ²⁰ Ngunza yala wa muleza etshi: "Ami nienda ku hanga moshu yandjika thama. Ekhi epi nidi nayi fhunu?" ²¹ Yesu wa muleza etshi: " Yivwa wazola wukhadi wa lunga, ndanga wendi, wu sumbishi yoshu yi wudi nayi, wu yi kapidi atsukami, ayi wa kunona kimvwama kiahitangana kidi ku wulu. Wiji ku ngu laba. ²² Kiela ngunza yala wevwa ma kudidi Yesu, wa katuka ni khenda jioshu kikuma wakhedi ni kimvwama kingi. ²³ Yesu wa leza alonguki jiendji etshi: " Nia nu leza ni kiedika kioshu etshi, Yidi pashi kudi kudi mvwama mu kwingila mu kifumu kia ku wulu. ²⁴ Nia nu leza epi etshi,!yishiku kamu pashi kudi shiamo mu kuhita mu buku dia ndongu, Kashi pashi jingi kudi mvwama mu kwingila mu kifumu kia Nzambi. ²⁵ Kiela alonguki evwa kienekina, ayituka ni kwakula etshi: "Nani he wa lunga kuhuluka?" ²⁶ Yesu wa wa tadidi wakula etshi: "Medi ma kola kudi athu, kashi kudi Nzambi moshu medi mazeya." ²⁷ He Petulu wa vutididi mvutu wakula etshi: " Tala, etu twasala kushisa yima yetu yoshu mu ku kulaba ayi. Ekhi he twa kanona?" ²⁸ Yesu wa waleza etshi: " Kiedika nidi ku nu lezanga, enu nu ku ngu labanga ami, mu yilumbu yikwizanga kumesu, kia kela Mwana muthu wa shikama ha kitshi kiendji kia lukumu, enu epi nwaka shikama ha yitshi kumi ni yadi ya kifumu, nwa ka sambisa yikanda kumi ni yadi ya Yiseledi. ²⁹ Koshu muthu wa shisa manzu mendji, apangi jiendji, amala ni akhetu, tatendji, mamendji ni lupangu lwendji kikuma kia jina diemi, wa ka nona hitila khama ya kimvwama kia moyi wa mvula ni mvula. ³⁰ Kashi lawu dia athu edi athethi kikimweni akasudila, awa asudila aka thethikila.