¹ Paulo na Timotei, vear otshia e Yezu- Kristu, ya wasantu inkum ili ti Yezu- Kristu ne wiya e Filipia, ya wa ntwadisi ti wa diakono; ² Tea Nzeam, ti Nkum Yezu- Kristu wopiagni ngrasia ti ngemba. ³ Ndakeara nsag- na- viye ya Nzeam eme na vii agnu ankum alekani me, ⁴ ne bisamu ime inkum djwi na gnu, ndesami n'osiang. ⁵ Ndapea nsag- na- vie djwi na elignu ondii omog n'along, yim ko eshuu enteang tii opeane. ⁶ Ndadjir memen wur eyibani otshia ene ne kati egnu ayakiaka nde tii ko eshuu eyayia Yezu- Kristu. ⁷ Eli wuo oshin obansa me enagn djwi na gnu gnankum, djwi otsame omvaragni n'etura eme. Ayignu vear ayinsarisike ata ne ngrasia, ata ne bolog ime, ata n'oshin olelongikime oshuong owuo. ⁸ Djwi, Nzeam ali ntiegn eme, ndoleangagni na ngagn e Yezu- Kristu. ⁹ Atsame nding ne bisamu ime ngean: "Ngagn egnu elegi mvean, ti waagn enjia vii". ¹⁰ Nsama djwi ojiagni ipwo na vim elenga wuo, djwi okwonagni bifu, oyiagni na masonga eshuu eyayia Kristu. ¹¹ Djwi mpi oyuragni na mbeam i lunungu iyim ya Yezu- Kristu, na nkembo ti osiang o Nzeam. ¹² Atwung, ndaleang ojiagni gnugnun vii amilog ya me, etikie wuo djwi along atsu nteang. ¹³ Nsuka ewo, nkori imintshung wo djwi na Kristu watijia ya ayer- nkuu ankum ali n'evuru e nkum ti vear amuu ankum, ¹⁴ ata atwung entsign amidjir Nkum wativea kikesa n'oshin omintshung wo, walelong wapilur diaka womo ve. ¹⁵ Amuu, vi- a- vii, walelong n'etura epwo, na kimpala. Kansi amuuwalelong Kristu na ngangn. ¹⁶ Vearalelong na ngangn, wajia wuwun me ndatuba djwi na along a Nzeam. ¹⁷ Kansi amuu agni, wali ko na nginu otshia, walelong ne dzin i Kristu na nginu ipwo, ko djwi na nkeampea me mpay, me wur emitshung wo. ¹⁸ Kaku djwi ve! Ata eli oshin oyen su, ata eli vi- a- vii, walelong ko Kristu: ndi n'osiang, ayayiame ko n'osiang. ¹⁹ Djwi ndajia memen enagn ayatshim wo djwi n'evug eme, ko djwi na bisamu ignu, n'oshin olensarisi Mpeve e Yezu- Kristu; ²⁰ Djwi na ekaagn eme, mpayayug nsogn ve. Kansi, na kikesa eme e nshuu inkum ata opeane, ndadjir memenKristu ayavey nde lokumu ne djuung ime, ata ne luzingu eme ata n'ewa eme. ²¹ Djwi Kristu ali luzingu eme, ata ewa mpi eli mfunu djwi na me. ²² Kansi yug nzinga ne djuung elawur mbeam etshia eme, mpijia ve nge esison me. ²³ Djwi eli na vim ape esison me: ndaleang wuo ndim ne buu enentsu ngya ti Kristu, enagn eli vim elenga mfunu! ²⁴ Kansi na nsatsuga ne buu ene eli djwi na wuo egnu. ²⁵ Ndajia memen ayasametsuga ti gnu djwi otukatsagni nteang djwi n'osiang ognu ne lukwikilu egnu. ²⁶ Mby ntagnu eyakeame ondii oli gnuayayiagnu n'osiang ne dzin i Kristu. ²⁷ Zingagni n'oshin oleang along a Kristu. Kiagni oshin onagn djwi ata ntiyiaondii oli gnu, ata ndi etey na gnu, ngyugike watuba wuwun olagni biu, na nginu imog. Ngyugike wuwun olekiagni otshia ondii omog na nginu imogdjwi na lukwikilu e oshuong owuo. ²⁸ Opiyugagni wa mbeni womo ve. Ene eli kidimu ewa djwi na wo, kansi djwi na gnu, eli kidimu e evug eyim ya Nzeam. ²⁹ Djwi amopeagni ngrasia eyim ya Kristu, epa ko djwi na ndjir ya nde ve, kansi mpi djwi na ngyen mpay djwi na nde. ³⁰ Djwi oleviyagni oshuru (conflit) oshin oyiyenikignu etay eme, mpi olayugagni eli ya me opeane.