¹ Muntangu Yesu kayeluti, wumona muntu mpofu tuka kabutukila. ² Minlongoki miyani minyufula:<< Mfumu, mu nki diambu yo muntu kabutukila mpofu? kadi mudiambu di masumu go ma bibuti biyani? ³ Yesu wubavutudila:<< ka mukikuma ki masumu ku kani mawu ma bibuti biyani, kansi musande mavanga ma Nzambi mamonika mu yani. ⁴ Tufeti ganga mavanga ma yuna wumfila ntangu kuna muini. kadi mpimpa yilueki kani muntu kalendi gata nkutu ku. ⁵ Bukina nde yikinu gogini nza, ngina kia ku nza. ⁶ Muntangu Yesu kamanisa goga momuini mambu, wulosa mati ga ntotu, wusala nteba, ye mati, ye wukusa mawu mu mesu ma mpofu. ⁷ Kunima wuntela:<< ndawe yobila ku zinga ki Silowe ( kisongidila ntumua.)>> buna mpofu wuyenda, wuyobila ye wuvutuka ye kue moni. ⁸ Buna mfinangani ziyani ye bobuini bamona bukayelombingi mu nteti bata:<< kayani ku mpofu yoyini wufongedingi ye lombanga?>> ⁹ Bankaka bata:<< nkatu, kansi bafuaneni.>> kansi wubatela:<< munu kibeni yoyini.>> ¹⁰ Bantela:<< go ngeyi yoyuani, bue kumini mukumona bobuini?>> ¹¹ Wubavutudila:<< muntu yoyini babokidilanga Yesu gengi ntebe ye wunkusidi yawu mu mesu. kunima wunteledi:<< ndawe yobila ku zinga ki Silowe>> ntumameni, ye bobuini ngita mona>> ¹² Banyufula:<< kue kena?>> wubavutudila:<< kizeyi ku. ¹³ Banata mpofu ku Bamfalisi. ¹⁴ Kansi kisabala ntangu Yesu kaganga nteba ye kanzibula mesu. ¹⁵ Bamfalisi banyufula muntangu bawu mu momuini maluta musande kayantika mona. wubavutudila:<< nteba katudidi mu mesu ma munu. ngiobedi, ye bungangi ndendedi mona.>> ¹⁶ Bamfalisi bankaka bata kimbangi:<< muntu yoyini katukidi ku Nzambi ku, kadi keta zitisa kisabala ku.>> kansi bankaka bagogedingi:<< bue nsumuki kafeti ganga masivi ma mpila yoyini?>> mpaka zibua mu kubagambasa ga kati kibawu. ¹⁷ Bagogisa mpofu yo yibeluka:<< nki gogedi mu yani, kadi wukuzibuedi mesu mangeyi?>> mpofu wubavutudila:<< mbikudi.>> ¹⁸ Kansi kabazola kuikila ku nde wukala mpofu kansi bobuini keta mona. buna babokila bibuti biyani. ¹⁹ Bayufula bibuti:<< yoyini muana wubenu kedika? wubutuka mpofu? bue bugengi nde bobuini lendedi mona?>> ²⁰ Bibuti biyani bibavutudila:<< tuzeyi nde muana betu yoyini wubutuka mpofu. ²¹ Katuze ku bue kamueneni kani mpi yoyuani wunzibuedi mesu. lunyufula, wuna mbuta mu gana mvutu mu momuini mantadidi. ²² Bibuti biyani bigoga buna mudiambu dibonga bu bamfalisi. kadi banyudayo bakibakila makani mukula mu nluka konsu yuna si wusambila Klisto. ²³ Mukuma kina, bibuti biyani bavutudila:<< mbuta kena yani mosi, lunyufula. ²⁴ Babokila diaka mu nkumbu yinzodi yoyini wukala mpofu, ye bantela:<< vutula matondu ma nkembu ku Nzambi kadi tuzeyi bongangi nde yoyini muntu nsumuki.>> ²⁵ Wubavutudila:<< go nsumuki go mpi nkatu, kizeyi nkutu ku. kansi dimosi nzeyi: nteti yikala mpofu, kansi bobuini ngita mona.>> ²⁶ Kunima bantela:<< nki kakugengi ye bue kabuluedi mesu mangeyi?>> ²⁷ Wuvutula ye ta:<< yiluteledingi makulu kansi kaluzoledi kunguila ku munki diambu luzoledi yivutukila diaka? luzoledi diaka benu lukuma minlongoki miomini?>> ²⁸ Bamfinga ye bantela: ngeyi wuna nlongoki wuyani; betu tuna minlongoki mi Mose. ²⁹ Tuzeyi nde Nzambi wugogila ku Mose; kansi yoyini, katuzeyi ku kue katukidi. ³⁰ Mpofu wubavutudila ye ta:<< ngitukulu nde kaluzeyi ku kue katukidi. yidina ka mbuesesi mesu. ³¹ Tuzeyi nde Nzambi kalemvukilanga ku tambula sambu ki bansumuki; kansi wutambulanga mu nlemvu sambu kikonsu yoyini wukusambilanga ye ganganga luzolu luyani. ³³ Tuka luyantiku lu nza, kani tuwa ku nde muntu muesesi mpofu yikingutukila. ³² Go muntu yuna kena wu Nzambi ku, nga kalendedi nkutu ganga diodini ku.>> ³⁴ Bamvutudila:<< benu bodi lubutukila mu masumu, ye nge, zoledi tulonga?>> ye bankula mu nluka. ³⁵ Yesu, bukawa nde bankula mu nluka, wumona diaka ye wuntela:<< kuikidi kuaku ku muana Nzambi?>> ³⁶ Wuvutula:<< nani kena musa yinkuikidila, Mfumu?>> ³⁷ Yesu wuntela:<< wuta kumona kadi yoyini takuisa bungangi.>> ³⁸ Mpofu wumvutudila:<< Mfumu, nkuikidi.>> ye wunsambila. ³⁹ Kunima Yesu wuta:<< mudiambu dimfundusu yiyisila mu nza musande babena bampofu bamona, ye bobuini bamonanga bakuma bampofu.>> ⁴⁰ Bamfalisi bankaka bakala yani, bubawa buna, bata:<< tuna diaka betu bampofu?>> ⁴¹ Yesu wubavutudila:<< go lukala bampofu, nga kaluna ye masumu ku. kansi bungangi luta goga: tuta mona. kansi masumu mabenu meta zinga.